Strongim Bel na Autim Tok

¹ Insait long sampela yia i go pinis, ol pablisa long sampela hap i hatwok moa long bungim ol man long haus bilong toktok wantaim ol. Planti i tok, taim ol i autim tok long teritori bilong ol, winim 50 pesen bilong ol man i no i stap long haus. Olsem na bikpela hap taim ol pablisa i lusim i no kamapim wanpela gutpela samting.

² Bipo planti man i save stap long haus long Sande, na ol i save tingim dispela de olsem de bilong malolo. Tasol nau ol samting i senis. Long nau planti man i save wok mani, o mekim ol wok bilong lukautim famili olsem baim kaikai, o ol i painim sampela amamas. Bilong mekim ol dispela samting, ol i mas lusim haus. Olsem na long ol Sande tu, i hatwok long bungim ol man long haus.

³ Taim ol man i no i stap long haus, yumi save ol i mas stap long wanpela hap. Yumi laik toktok wantaim ol man​—⁠em as bilong dispela wok yumi mekim. Olsem na i gutpela sapos yumi toktok wantaim ol man taim yumi bungim ol​—⁠long rot, long maket, o long ples wok. Pol i save go na “toktok wantaim ol manmeri i kam i stap long [ples bung],” bambai em inap autim tok long ol. (Ap 17:17) Dispela wok Pol i bin mekim i karim gutpela kaikai, na long nau tu, dispela kain pasin bilong autim tok i save karim gutpela kaikai.

⁴ Taim yumi wok long autim tok long ol haus, yumi save lukim ol man i wokabaut long rot, o ating ol i sindaun wetim wanpela man. Sapos yumi lap liklik na tok gude, ating dispela inap opim rot long kirapim tok. Sapos haus bilong ol i stap klostu, yumi inap tokim ol, ol i no bin stap long haus taim yumi go painim ol, tasol yumi amamas nau rot i op bilong toktok wantaim ol. Taim planti brata sista i strongim bel liklik na ol yet i wokim rot bilong toktok wantaim man, ol i save kisim ol gutpela ekspiriens.

⁵ Sapos Yu Strongim Bel, Gutpela Samting Bai Kamap: Wanpela brata i tok, em i save toktok wantaim ol man i sanap i stap, o ol i wetim bas, o wokabaut isi isi, o sindaun long ka. Em i save amamas na lap taim em i tok gude long ol, na mekim pasin olsem em i wanpela man i save sindaun klostu long ol na i kam lukim ol. Long dispela rot em i bin tilim planti buk na nius na kirapim planti Baibel-stadi.

⁶ Narapela brata wantaim meri bilong em i wok long autim tok long ol haus na ol i bungim wanpela meri i wokabaut na i karim wanpela bikpela bek kaikai. Ol i kirap toktok wantaim em, na ol i litimapim nem bilong em, long wanem, em i wok strong long lukautim famili bilong em. Nau ol i askim em: “Tasol husat inap lukautim yumi ol manmeri long ol samting yumi mas kisim?” Dispela askim i kirapim tingting bilong meri. Ol i stori liklik wantaim na bihain meri i singautim ol i kam long haus bilong em, na ol i kirap stadi long Baibel.

⁷ Olsem na narapela taim yu autim tok long ol haus, long Sande o long narapela de na ol man i no stap long haus, strongim bel moa na autim tok long ol man yu bungim long rot o long narapela hap. (1 Te 2:⁠2) Sapos yu mekim olsem, ating wok bilong yu long autim tok bai karim gutpela kaikai moa na bai yu kisim bikpela amamas moa long wok yu mekim.