Autim Gutnius Bilong Wanpela Gutpela Samting Tru
1 Inap 117 yia, nius Wastaua i bin mekim wok bilong helpim tok i tru bilong Baibel. Long nau, ol i save wokim 18,950,000 bilong olgeta wan wan nius long 125 tok ples. Inap longtaim pinis Kirap! tu i bin tokaut long Baibel, na nau ol i save wokim 15,730,000 long 80 tok ples.—Skelim wantaim Kolosi 1:23.
2 Ol Magasin i Helpim Yumi Long Ol Samting Bilong Spirit: Wastaua na Kirap! i bin helpim planti milion manmeri i gat gutpela bel long ol samting bilong spirit. Ol i save kamapim ol gutpela stori bilong strongim bilip bilong yumi. Olsem: Long Wastaua bilong Februeri 1, 1996, yumi bin stadi long ol tok i kamapim olsem yumi gat wok long bilip long Jehova na tok bilong em long Baibel. Wastaua bilong Mas 1, 1996, i bin strongim yumi long mekim yet wok bilong Jehova na wet tasol long em. Em i gutpela tru long save gut long insait bilong tok profet bilong Sefanaia! Na Wastaua bilong Mas 15, 1996, i bin kamapim gutpela stori bilong strongim tru bilip bilong ol Kristen long pasin bilong i stap gut long God. Wastaua bilong Me 15, 1996 i bin stori long olsem wanem pasin bilong kaunim na stadi long Tok Bilong God long olgeta taim em inap helpim yumi. Ol dispela stori i bin helpim yumi long save gut long Tok Bilong God, na yumi pilim moa yet ol wok bilong Kingdom.
3 Na tu, ol dispela nius i save kamapim long taim stret ol tok bilong bihainim ol pasin bilong God, ol stretpela pasin Kristen, na ol narapela bikpela samting. Ol i save kamapim stret ol samting tru i wok long kamap long i stap bilong yumi. Olsem na i stap bilong yumi long nau i gutpela, taim yumi wet long ol tok promis bilong God long ol gutpela samting moa bai kamap long bihain.—Ais 48:17; 1 Ti 6:19.
4 Sapos yumi skelim gen ol tok i stap long pes 4 bilong Kirap!, dispela bai helpim gut yumi long tokim ol man long olgeta hap olsem dispela magasin i wanpela gutpela samting bilong ol yangpela na ol lapun i kaunim. Kirap! i tok: “Wok bilong Kirap! em bilong givim save long olgeta wan wan long famili. Em i soim yumi long rot bilong karim ol hevi bilong nau. Em i toksave long ol samting i kamap long graun, na i stori long ol manmeri bilong planti ples, na skelim ol lotu na wok bilong saiens. Na em i mekim sampela wok moa. Em i kamapim long ples klia as bilong ol samting nau i kamap long graun, tasol em i no helpim wanpela lain politik, o litimapim ol man bilong wanpela kain skin na daunim ol narapela. Na bikpela wok bilong dispela nius, em i save kirapim ol man long bilip tru long tok promis bilong God, em i tok long kamapim gutaim na bel isi em bai senisim dispela pasin nogut bilong nau.”
5 Tilim Ol Nius Long Ol Narapela: Mekim gutpela pasin long tilim Wastaua na Kirap! (Skelim wantaim 1 Timoti 6:18.) Yu mas i gat ol magasin i stap wantaim yu bambai yu inap tilim long ol man yu bungim. (Sav 11:6) Long dispela mun, yumi olgeta, ol yangpela na ol nupela pablisa tu, yumi ken insait tru long mekim wok bilong tilim ol magasin. Yumi ken kamapim sotpela tok long ol nupela magasin taim yumi mekim olsem. Yumi mas save gut long ol tok i stap insait long ol magasin, na yumi ken givim bel tru long tilim long ol man.
6 Wastaua na Kirap! i gat ol tok em olgeta man i mas kisim save long en. Taim yumi tilim ol, em wanpela gutpela rot bilong helpim ol narapela long save long gutnius olsem i gat wanpela gutpela samting tru bai kamap bihain!