Skulim Ol Narapela Long Ol Samting God i Laik Yumi Mas Mekim
1 Yumi inap painim yet planti manmeri em ol i no kisim yet ol samting bilong spirit, olsem ol i no ‘harim ol tok bilong Jehova.’ (Amo 8:11, NW) Sampela i bilip olsem God i stap, tasol ol i no save long laik bilong em na long ol samting em i laik yumi mas mekim. Olsem na yumi mas skulim ol long tok i tru bilong Kingdom em inap helpim ol long kisim laip. Taim yumi redim gut ol samting na yumi redi long autim tok long olgeta taim, yumi inap painim ol manmeri i gat laik long kisim save long ol samting Jehova i laik yumi mas mekim.
2 Long mun Epril na Me, bai yumi tilim sabskripsen bilong Wastaua. Yu inap tilim tu sabskripsen bilong Kirap! o bilong tupela nius wantaim sapos ol man i laikim, olsem long taim yu autim tok long ol stua o long ol Baibel-stadi o long ol gobek bilong yu. Sapos man i no laik kisim sabskripsen, traim long tilim ol magasin wan wan. Na tu, long namba wan taim, bai yumi tilim buklet God i Laik Yumi Mas Mekim Wanem? Ol gutpela piksa na ol gutpela askim bilong kirapim tingting i mekim na planti man i laikim dispela buklet. Ol tok i stap daunbilo inap helpim yumi long mekim gutpela wok long ol magasin na buklet bilong yumi.
3 Painim Ol Man: Long ol hap em planti man i no save stap long haus taim yumi autim tok, ol gutpela samting i kamap taim yumi go painim ol man long wanem wanem hap ol i stap long en na toktok wantaim ol. Pepa yumi bin kisim wantaim Wok Kingdom bilong Septemba 1996 i kirapim yumi long autim gutnius long olgeta hap—long rot, long ol PMV, long pak, long ples bilong putim ol ka, na long ol ples bisnis. Taim wanpela brata painia i mekim wok long hap bilong ol ples bisnis, em i toktok wantaim wanpela man Filipin bipo em i save kisim ol magasin taim em i stap long ples. Em i singautim brata i go insait long ofis na em i tokim brata olsem nau em namba wan taim em i lukim wanpela Witnes long Papua Niugini. Em i kisim 20 magasin na wanpela buk Creation! Wanem ol gutpela samting i bin kamap taim yu autim tok long olgeta kain hap? Wastaua na Kirap! na buklet Yumi Mas Mekim Wanem? ol i gutpela tru bilong mekim wok autim tok long kain kain rot, long wanem, ol i kamapim ol tok i save helpim ol man na kirapim tingting bilong ol.
4 Bilong Kirapim Toktok: Laspela pes bilong Wok Kingdom bilong Oktoba 1996 i kamapim sampela tok long olsem wanem yumi ken redim ol tok bilong yumi yet bilong tilim Wastaua na Kirap! Ol dispela tok i gutpela tu taim yu redim tok bilong yu bilong tilim buklet Yumi Mas Mekim Wanem? Ol tok yumi mekim i mas sotpela, o yumi ken pulim liklik na stori long wanpela tok bilong Baibel. Em i bikpela samting long tingim gut ol tok yumi mekim bilong kirapim tok, long wanem, ol dispela tok inap kirapim man long harim yet tok bilong yumi. Ol gutpela samting i bin kamap taim sampela i mekim dispela tok: “Mi kaunim wanpela stori i bin strongim mi tru, na mi laik soim long yu.” O yu ken kamapim wanpela gutpela askim bilong kirapim man long toktok wantaim yu.
5 Sapos i stret long hap bilong yu, long dispela mun yu ken mekim kain askim olsem bilong toktok wantaim ol man:
◼ “Long nau yumi lukim planti rait nabaut long ol banis samting, na pipia i stap nabaut, na ol samting i bagarapim win na wara. Wanem samting inap klinim dispela graun na em bai kamap wanpela gutpela ples bilong i stap long en?” Larim man i bekim tok, na tokim em yu gat sampela tok bilong helpim em long save, olsem wanem na long wanem taim olgeta hap bilong graun bai kamap wanpela gutpela gaden. Soim em wanpela hap tok, wanpela skripsa, na wanpela gutpela piksa long wanpela nupela magasin, na tokim em long kisim long rot bilong sabskripsen. Sapos em i no laik kisim, tilim ol magasin wan wan long 30 toea. Paslain long yu lusim em, stretim rot bilong toktok moa wantaim em long narapela taim.
◼ “Yu ting God i laik yumi mas i stap namel long ol hevi kain olsem i save painim yumi long nau?” Taim man i bekim tok pinis, yu ken tok: “Ating yu save gut long beten Jisas i bin skulim lain bilong em long en, olsem askim God long salim Kingdom bilong em i kam. Sampela taim yu bin tingting, Kingdom bilong God em wanem samting tru?” Opim buklet Yumi Mas Mekim Wanem? long stadi 6, na kaunim ol askim long kirap bilong stadi. Nau, taim yu wok long kaunim paragraf 1, kamapim bekim bilong namba wan askim. Tokim man, olgeta askim i gat wankain sotpela bekim olsem. Tilim buklet long 40 toea, na traim long stretim rot bilong bung gen bilong stori moa long Kingdom.
◼ “Planti man i tingim ol lotu i olsem as bilong ol hevi i painim ol man, na i no samting bilong stretim hevi bilong ol man. Yu yet i gat wanem tingting long dispela?” Taim yu harim pinis tingting bilong man, soim em wanpela tok bilong ol nupela Wastaua em inap amamas long en na i stori long ol samting ol lotu giaman i no bin mekim o i stori olsem pinis bilong ol i klostu. Askim em sapos em i laik kisim Wastaua long olgeta taim long posofis long rot bilong sabskripsen. Sapos em i no laik kisim, tilim ol magasin wan wan long em. Paslain long yu lusim em, kisim nem bilong em na kolim nem bilong yu, na tokim em yu bai kam bek lukim em bambai yu ken stori long olsem wanem lotu i tru i bin helpim ol manmeri.
◼ “Planti hevi i painim ol famili long nau, olsem na yu save ting, wanem em rot tru bilong ol famili i ken stap amamas?” Wetim em i bekim tok, na nau tokim em, long Baibel God i kamapim rot tru bilong ol famili i ken stap amamas. Ating yu ken kaunim Aisaia 48:17. Opim buklet Yumi Mas Mekim Wanem? long stadi 8, na stori long sampela skripsa bilong Baibel ol i raitim long dispela stadi bilong helpim wan wan insait long famili. Kaunim ol askim i stap long kirap bilong dispela stadi. Askim man sapos em i laik kaunim ol bekim bilong en. Sapos em i laik, givim buklet long em bambai em i ken lukim, na tokim em, em inap kisim long 40 toea tasol. Tokim em bai yu kam bek gen long narapela taim bilong stori moa long ol gutpela tok i stap long Baibel em inap helpim ol famili long i stap amamas.
6 Pepa yumi bin kisim wantaim Wok Kingdom bilong Mas 1997 i kirapim yumi long strongim bel long mekim ol gobek. Em i tok yumi ken mekim wok long buklet Yumi Mas Mekim Wanem? bilong kirapim ol Baibel-stadi. Sapos yumi no inap long mekim long namba wan taim, orait mekim long taim yumi mekim gobek. Nambawan samting ol manmeri i mas kisim em ol i mas kisim save long ol samting God i laik yumi mas mekim na ol i mas bihainim dispela. (Kl 1:9, 10) Bai yumi helpim tru ol narapela long Epril na Me sapos yumi kirap long skulim ol long ol samting Jehova i laik yumi mas mekim bilong kisim laip.—1 Ko 9:23.