Askim

◼ Taim ol i askim kongrigesen long helpim ol man long stretim ol samting bilong planim man, ol dispela askim inap kamap:

Husat i ken mekim tok bilong planim man i dai? Em samting bilong famili bilong man i dai pinis. Ol i ken makim wanpela brata i baptais pinis na i gat gutpela nem. Sapos ol i askim lain elda long makim wanpela brata, orait ol bai makim wanpela elda i gat save na em i ken mekim wanpela tok olsem i stap long autlain bilong Sosaiti. Tru yumi no ken litimapim nem bilong man i dai pinis, tasol i stret long stori long ol gutpela pasin bilong dispela man o meri.

Inap yumi mekim wok long Haus Kingdom? Yumi inap, sapos ol lain elda i tok orait na sapos bung i no kamap long taim bilong mekim ol miting. Yumi inap mekim wok long Haus Kingdom sapos man i dai em i gat gutpela nem na em i pablisa bilong kongrigesen o pikinini bilong wanpela brata o sista. Sapos dispela man i gat nem nogut long ai bilong ol manmeri, long wanem, em i mekim sampela pasin i no stret long Kristen i mekim, o sapos i gat sampela samting inap nogutim nem bilong kongrigesen, ating ol elda i no ken larim ol i mekim wok long Haus Kingdom.​—⁠Lukim buk Lo, p. 62, 63.

Haus Kingdom i no bilong mekim bung bilong planim ol man i no bilip. Tasol ol i ken mekim, sapos famili bilong man i dai ol i strongpela pablisa i baptais pinis, o planti pablisa long kongrigesen i save olsem em i bin laikim tok i tru na i gat gutpela nem long ples long bihainim ol stretpela pasin, na sapos ol i no bungim ol pasin bilong graun insait long bung.

Taim ol elda i givim tok orait long mekim wok long Haus Kingdom, ol bai skelim olsem, ol man i save kisim bodi i kam long taim bilong mekim tok o nogat. Sapos ol i save mekim olsem, ol elda i ken orait long kisim bodi i kam insait long Haus Kingdom.

Olsem wanem long bung bilong planim ol ausaitman? Sapos man i dai em i gat gutnem long ples, orait, long haus o long ples matmat, wanpela brata i ken mekim wanpela gutpela tok bilong Baibel. Kongrigesen i no inap mekim tok bilong planim man i gat nem long mekim pasin pamuk na pasin nogut, o ol pasin bilong em i no bin stret wantaim ol lo bilong Baibel. Wanpela brata i no ken wok bung wantaim wanpela pris pasto bilong mekim lotu o insait long bung ol i mekim long wanpela haus lotu bilong Bikpela Babilon.

Olsem wanem sapos man i dai em i rauspela man? Kongrigesen bai i no inap insait long dispela, na ol i no inap mekim wok long Haus Kingdom. Sapos rauspela man i bin kamapim klia olsem em i tanim bel na em i laik bai ol i kisim bek em, ating bel bilong brata bai i no gat tok long mekim wanpela tok bilong Baibel long haus o long ples matmat, bilong autim tok long ol man i no bilip na mekim isi bel bilong ol wanblut. Tasol paslain long mekim olsem, gutpela sapos brata i toktok wantaim lain elda na tingim gut tok ol i givim long em. Sapos i no gutpela long dispela brata i insait long dispela samting, ating wanpela brata em i wanfamili bilong man i dai, em i ken mekim wanpela tok bilong mekim gut bel bilong ol wanblut.

Yumi inap kisim sampela tok moa long Wastaua, Oktoba 15, 1990 (tok Inglis), pes 30, 31; Februeri 1, 1982, pes 22; Disemba 1, 1980, pes 3-6; Jun 1, 1978 (tok Inglis), pes 5-8; Jun 1, 1977 (tok Inglis), pes 347, 348; Me 1, 1972, pes 120; na long Kirap! bilong Jun 8, 1991, pes 10, 11; na bilong Mas 22, 1977 (tok Inglis), pes 12-15.