Helpim Ol Baibel-Stadi Long Kamap Strong
1 Wanem samting i wankain long wanpela nes long Tansania, wanpela yangpela long Ajentina, na wanpela mama long Latvia? Yiabuk bilong 1997 (p. 8, 46, na 56) i tok, ol dispela 3-pela hia i bin kamap strong hariap long Baibel-stadi bilong ol, long wanem, ol i amamas long mekim stadi long buk Save sampela taim long olgeta wan wan wik. Sosaiti i bin tok, i gutpela ol pablisa i ken wok strong long stadi long wanpela sapta bilong buk long olgeta wan wan stadi. Tasol sampela i pilim olsem dispela i hatwok. Ating save na sindaun bilong wan wan sumatin i bikpela samting bilong mekim olsem, tasol ol gutpela samting i bin kamap taim ol brata sista i gat save long mekim wok tisa ol i bihainim ol tok i stap daunbilo.
2 Olsem pepa yumi bin kisim wantaim Wok Kingdom bilong Jun 1996 i stori long en, yu mas skulim Baibel-stadi bilong yu long redim stadi. Long namba wan stadi, em i gutpela long stori gut long em na soim em long pasin bilong redim stadi. Soim buk Save bilong yu yet long em. Redim namba wan stadi wantaim em. Helpim Baibel-stadi long painim ol bikpela tok i bekim stret ol askim i stap daunbilo long pes na makim ol long pen samting. Sampela pablisa i bin givim ol Baibel-stadi wanpela kala pen bilong ol i ken mekim wok long en. Kirapim ol sumatin long opim Baibel na kaunim olgeta skripsa taim ol i redim stadi. Taim yu mekim olsem, yu bai lainim ol tu long redi long kam long Buk-Stadi Bilong Kongrigesen na Stadi Wastaua.—Lu 6:40.
3 Wanpela gutpela tisa em bai kirapim sumatin long toktok, na em yet i no mekim planti toktok. Em bai was gut na bai em i no ken stori planti long ol liklik tok. Wan wan taim tasol em bai kamapim ol tok o stori bilong ol narapela buk. Em bai kamapim gut ol bikpela tok bilong dispela stadi. Sampela i bin givim sampela buk moa long ol sumatin bambai ol i ken painim bekim bilong ol askim. Na tu, ol Baibel-stadi bai kisim sampela save moa sapos ol i go long ol miting bilong kongrigesen.
4 I no olsem yupela i mas opim Baibel na lukim olgeta skripsa i stap long stadi. Yupela i ken kamapim sampela bikpela tok bilong ol skripsa em ol i raitim tok bilong en long paragraf. Taim yupela i mekim rivyu, kamapim klia ol bikpela skripsa yupela i bin stori long en na kirapim sumatin long tingim ol.
5 Olgeta Wan Wan Stadi i Mas Inap Hamas Minit?: I no olsem yupela i mas stadi inap wanpela aua tasol. Sampela man i gat bikpela hap taim na ating ol i laik stadi longpela taim moa. O ating sumatin i gat laik long stadi 2-pela o 3-pela taim long olgeta wik. Dispela i gutpela helpim long ol man i ken mekim olsem.
6 Olsem Aisaia 60:8 i kamapim, long nau planti handet tausen ol nupela manmeri i litimapim nem bilong Jehova ol “i spit i kam olsem klaut . . . na olsem ol pisin i flai i kam bek long haus bilong ol,” ol i kam insait long ol kongrigesen bilong lain bilong Jehova. Yumi olgeta i mas mekim wok bilong yumi na wok gut wantaim Jehova taim em i hariapim wok bilong bungim ol manmeri i olsem sipsip.