Ol Miting i Save Kirapim Yumi Long Mekim Gutpela Wok
1 Tupela bikpela samting long lotu bilong yumi em ol miting na wok autim tok. Dispela tupela samting i wok wantaim. Narapela i helpim narapela. Ol miting Kristen i save kirapim yumi long mekim ol gutpela wok, na wanpela gutpela wok tru em wok bilong autim tok bilong Kingdom na kamapim ol disaipel. (Hi 10:24) Sapos yumi no kam long ol miting, i no longtaim na bai yumi no autim tok moa, long wanem, bai i no gat wanpela samting long kirapim yumi long mekim olsem.
2 Long ol miting long olgeta wik, yumi kisim ol kaikai bilong spirit bilong kirapim yumi long autim tok. Long olgeta taim yumi harim tok olsem taim i sot pinis, na dispela i kirapim yumi long bringim tok bilong Baibel i go long ol man bilong helpim ol long kisim laip. Ol miting i save strongim yumi long mekim yet wok autim tok. (Mt 24:13, 14) Sapos yumi bekim tok long ol miting, dispela i save helpim gut yumi long kamapim bilip bilong yumi long ai bilong ol narapela. (Hi 10:23) Taim yumi insait long Skul Bilong Wok Autim Tok, yumi lain long mekim gut wok autim tok na mekim wok tisa bilong yumi i kamap gutpela moa.—2 Ti 4:2.
3 Ol Miting Bilong Wok i Kirapim Yumi Long Autim Tok: Long haus, yumi olgeta i mas redim ol tok bilong Wok Kingdom. Taim yumi go long Miting Bilong Wok na lukim ol soim i kamap, nau dispela tok i pas strong long tingting bilong yumi. Long taim bilong autim tok, yumi ken tingim gen ol tok bilong Wok Kingdom, na ol soim long pasin bilong autim tok, na dispela bai helpim yumi long autim gut tok. Planti pablisa i bin mekim olsem.
4 Bilong bihainim ol tok i bin kamap long ol Miting Bilong Wok, sampela i save pasim tok long wok wantaim ol narapela long autim tok. Ol pablisa i tingim yet ol gutpela tok ol inap mekim wok long en na ol i laik tru long traim ol dispela tok, long wanem, ol dispela miting i bin kirapim ol long autim tok long olgeta wik.
5 Long ol miting Kristen yumi bung wantaim ol wanbilip na ol i ken kirapim yumi long mekim ol gutpela wok, na i no gat narapela samting inap helpim yumi olsem ol miting. Bilong wok autim tok bilong yumi i ken kamap gutpela, yumi mas kam long ol miting bilong kongrigesen long olgeta taim. Yumi olgeta i ken kamapim klia olsem yumi amamas tru long dispela gutpela samting Jehova i givim long yumi taim yumi ‘no lusim pasin bilong bung wantaim’ ol brata.—Hi 10:25.