Taim Ol i Kam Lukim Yumi Dispela Inap Helpim Yumi
1 Sakius i bin amamas tru taim Jisas i kam long haus bilong em. Na dispela i bin helpim em tru!—Lu 19:2-9.
2 Long nau, Krais Jisas i mekim wok olsem Het bilong kongrigesen na em i tokim ol elda long “lukautim gut ol manmeri bilong God.” (1 Pi 5:2, 3; Jo 21:15-17) Ol wasman long kongrigesen i save mekim wok tisa long ol miting na ol i go pas long wok autim tok, na tu, long pasin sori ol i save helpim ol wan wan brata sista insait long kongrigesen. Olsem na wan wan taim ol elda bai kam bilong helpim yu, ating taim yu stap long haus, o long Haus Kingdom, o taim yutupela i wok wantaim long autim tok, o long sampela narapela taim. Olsem wanem? Bai yu pret taim wanpela elda i kam lukim yu? Nogat, yu no ken pilim olsem. Taim ol i kam lukim yu, dispela i no makim olsem yu bihainim sampela pasin i no stret. Olsem na i gat wanem as na ol i kam bilong lukim yu?
3 Pol i tok em i laik i go lukim ol brata bambai em “i ken save, ol i stap gut, o nogat.” (Ap 15:36) Tru tumas, ol elda i olsem ol wasman i gat pasin sori, na ol i laik save yu stap orait o nogat. Ol i laik givim ol gutpela tok bilong Baibel long yu bilong helpim na strongim yu. Jehova em gutpela wasman bilong yumi, em i laik bai yumi olgeta wan wan i kisim kain helpim olsem.—Ese 34:11.
4 Amamas Long Elda i Kam Lukim Yu: Pol i bin i go lukim ol brata bilong em, long wanem, em i laik ‘givim sampela presen bilong spirit long ol bilong strongim ol, na em i laik bilip bilong ol i ken helpim em na bilip bilong em i ken helpim ol.’ (Ro 1:11, 12) Nau long taim bilong las de i gat kain kain hevi long en, yumi olgeta i mas kisim sampela tok bilong strongim yumi long ol samting bilong spirit, na yumi mas kisim helpim bilong sanap strong yet long bilip. Tru tumas, taim wanpela elda i kam lukim yu na yu amamas long dispela, ol tok em i kamapim bai strongim yu na long dispela rot narapela i ken strongim narapela.
5 Yu mas amamas long ol gutpela samting yu inap kisim long rot bilong ol elda taim ol i kam lukim yu. Sapos yu gat sampela hevi o askim em yu tingting planti long en, yu mas save olsem ol elda i stap long kongrigesen bilong helpim yu. No ken surik long toktok wantaim ol long sampela hevi em inap long daunim yu long ol samting bilong spirit. Pilim tru dispela gutpela rot Jehova i redim, na amamas long ol blesing yu kisim long rot bilong ol elda taim ol i kam lukim yu.