Olsem Wanem? Mun Ogas Bai Kamap Mun Bilong Mekim Gen Bikpela Wok?
1 Long yia 1963, lain bilong Jehova i bin mekim bikpela wok. Yu save bilong wanem? Long dispela yia namba bilong lain pablisa long olgeta hap i bin i go antap long wan milion. Yumi bin amamas tru long planti manmeri olsem ol i bin autim tok bilong Kingdom! Long nau, i gat wan milion pablisa long Yunaitet Stets tasol. Long Papua Niugini, yumi gat 3,500 samting pablisa insait long ol kongrigesen. Tasol long olgeta wan wan mun, samting olsem 600 bilong yumi i no save putim ripot bilong wok autim tok.
2 Redi Long Mekim Wok: Long Wok Kingdom bilong Julai 1998, yumi bin putim mak long winim 3,400 pablisa. Mipela i amamas tru long toksave olsem, long mun Epril yumi winim pinis dispela namba. Em namba wan taim yumi kisim bikpela namba olsem! Olsem wanem? Yumi inap mekim gen o winim dispela namba long mun Ogas? Yes yumi inap, sapos yumi olgeta wan wan i mekim wok bilong yumi. Sapos wok bilong yumi i kamap gutpela, mun Ogas bai kamap wanpela mun bilong mekim bikpela wok!
3 Bai yu stap we long mun Ogas? Sapos yu go raun long sampela hap o yu kisim malolo, no ken lusim tingting long mekim wok autim tok. Kisim sampela liklik nius, ol buklet, o ol magasin i go wantaim yu bambai yu ken autim tok long ol man yu bungim. Sapos yu go long ples bilong yu, yu ken autim tok wantaim ol pablisa long dispela hap, o tilim ol buk na nius samting long ol man bilong ples.
4 Sapos sampela hap bilong skin bilong yu i bagarap, yu ken insait yet long mekim wok autim tok. Yu inap autim tok long ol dokta, ol nes, o ol narapela i kam lukim yu. Ating yu ken autim tok long rot bilong pas o telefon.
5 Sampela bai amamas sapos ol narapela i helpim ol long autim tok long Ogas. Ol elda, ol wokman, na ol wasman bilong Buk-Stadi i mas stretim ol samting bambai sampela pablisa i ken helpim ol dispela pablisa. No ken lusim tingting long putim ripot bilong yu hariap long pinis bilong mun bambai kongrigesen i ken kaunim yu olsem wanpela pablisa i bin mekim wok long Ogas.
6 Tingim Gut Dispela Gutpela Wok: Wok autim tok em wanpela ‘gutpela samting tru God i putim long han bilong yumi.’ (2 Ti 1:14) Yumi amamas tru long gutpela wok yumi kisim bilong autim gutnius. (1 Te 2:4) Taim yumi tingim olgeta samting Jehova i bin mekim bilong helpim yumi, dispela i mas kirapim yumi long mekim yet dispela nambawan bikpela wok long olgeta taim. Yumi no ken larim wanpela samting i pasim yumi long mekim wok autim tok long olgeta mun bilong yia. Nau long mun Ogas, yumi ken mekim gen bikpela wok bilong Jehova, na tingting strong long autim nem bilong em long olgeta taim bihain!—Sng 34:1.