Ogas Em Spesel Mun Bilong Mekim Bikpela Wok Tru!
Tilim Nupela Liklik Nius Long Olgeta Hap Bilong Graun
1. Klostu nau bai yumi kamap long 100 yia bilong taim Kingdom i bin kirap mekim wok, olsem na wanem bikpela wok bai kamap long olgeta hap?
1 Klostu nau bai yumi kamap long 100 yia bilong taim Kingdom Bilong God i bin kirap mekim wok. Olsem na i stret long yumi givim biknem long Jehova long rot bilong mekim bikpela wok tru! Long Ogas bai yumi mekim bikpela wok long olgeta hap bilong graun long tilim nupela liklik nius nem bilong en Hau Bai Yumi Inap Kisim Bekim Bilong Ol Bikpela Askim Long Laip? Dispela liklik nius bai kirapim ol man i ritim long go long Baibel bilong kisim ol bekim, na i stori tu long olsem wanem jw.org inap helpim ol long kisim sampela save moa.
2. Olsem wanem yumi inap insait long dispela bikpela wok bai kamap long Ogas bilong “litimapim nem bilong Bikpela”?
2 Litimapim Nem Bilong God: Bilong helpim ol pablisa long mekim bikpela wok moa, i gat wanpela gutpela samting em ol pablisa husat i laik mekim wok painia haptaim long Ogas bai amamas long en. Long dispela mun, ol pablisa i baptais pinis ol bai kisim 30 aua taim ol i mekim painia haptaim. Mun Ogas i gat 5-pela Fraide, 5-pela Sarere, na 5-pela Sande, olsem na planti pablisa em ol i wok mani fultaim o go long skul namel long wik ol inap long mekim wok painia haptaim. Sapos yu gat wanpela Baibel stadi o pikinini i wok long kamap strong na em i laik kamap pablisa, toktok wantaim lain elda long dispela. Em bai gutpela long ol i kamap pablisa na wok wantaim yumi long dispela spesel mun! Planti painia oltaim i save kisim malolo long Ogas taim ol i inapim pinis ol aua bilong ol bilong wanpela yia, tasol ating ol inap long stretim sediul bilong ol na bai ol i inap insait tru long dispela spesel wok. I gutpela long ol famili i kirap nau long stori long ol samting ol bai mekim bilong insait long dispela bikpela wok bai kamap long Ogas bilong “litimapim nem bilong Bikpela.”—Esr. 3:11; Snd. 15:22.
3. Yumi laik bai dispela spesel wok i kamapim wanem gutpela samting?
3 Tru yumi bin mekim wankain wok bilong tilim ol liklik nius samting long bipo, tasol yumi laik bai wok nau yumi mekim i mas bikpela tru winim long bipo. Yumi laik wok strong na namba bilong ol aua, pablisa, na ol painia haptaim long Ogas bai go antap winim bipo. Taim sevis yia bilong 2014 i pinis, yumi laik bai Jehova i blesim wok bilong lain bilong em long olgeta hap bilong graun long mekim bikpela wok tru bilong autim tok long mun Ogas winim ol narapela mun!—Mat. 24:14.