Yumi Mas i Go Bek Planti Taim
1 Long namba wan taim wanpela man i kam toktok wantaim yu long gutnius, wantu yu bin kirap long bihainim dispela tok? Sapos nogat, ating yu amamas tru, long wanem, ol Witnes Bilong Jehova i bin kam lukim yu planti taim na bihain yu orait long ol i ken stadi long Baibel wantaim yu. Taim yu autim tok planti taim long teritori bilong yu, i gutpela long tingim dispela samting.
2 Long olgeta taim sindaun bilong ol man i wok long senis. Ol nupela nupela hevi i painim ol, ol i harim stori bilong ol samting nogut i wok long kamap long hap bilong ol na long olgeta hap bilong graun, ol i sot long mani, o wanpela long famili i bin dai o kisim sik. Ol kain samting olsem inap kirapim ol na bai ol i gat laik long kisim save long as bilong ol dispela hevi. Yumi mas skelim olsem ol man i wok long tingting planti long wanem samting na nau yumi mas kamapim ol gutpela tok bilong mekim gut bel bilong ol.
3 Em Wanpela Wok Bilong Helpim Ol Man Long Abrusim Bagarap: Tingim ol man bilong helpim ol man i bin kisim bikpela bagarap. Maski sampela i no painim planti man i abrusim bagarap long hap ol i wok long en, ol i no les na lusim wok, long wanem, ol wanwok bilong ol long ol narapela hap ol i wok long painim planti man i bin abrusim bagarap. Wok bilong yumi long helpim ol man long abrusim bagarap i no pinis yet. Long olgeta wan wan yia, yumi save painim planti handet tausen manmeri em ol i gat laik long abrusim “bikpela hevi tru.”—KTH 7:9, 14, NW.
4 “Olgeta manmeri i singaut long nem bilong Jehova, bai em i kisim bek ol.” (Ro 10:13-15, NW) Dispela tok i mas kirapim yumi olgeta wan wan long wok strong yet long autim tok. Kirap long namba wan taim yumi autim tok long teritori bilong yumi na i kam inap long nau, ol pikinini i go bikpela pinis, na nau ol yet inap wokim tingting long wanem samting bai painim ol long bihain na i gat wanem as bilong i stap bilong yumi. Yumi no inap save husat tru bai harim tok. (Sav 11:6) Planti man bipo ol i birua bilong tok i tru, nau ol i kisim tok i tru. Wok bilong yumi i no bilong skelim ol man, nogat, yumi mas helpim ol long harim tok na abrusim bagarap em bai painim ol man bilong dispela graun. Olsem ol disaipel bilong Jisas long bipo i bin mekim, yumi mas go oltaim long ol man na traim long kirapim ol long kisim save long tok bilong Kingdom.—Mt 10:6, 7.
5 Rot i op yet long yumi mekim wok autim tok, na dispela i kamapim klia pasin marimari bilong Jehova. (2 Pi 3:9) Taim yumi go planti taim bilong helpim ol narapela long harim tok, yumi kamapim klia pasin sori bilong God, na long dispela rot yumi litimapim nem bilong em.