Stadi Long Tok Profet Bilong Daniel
1 Long wik i kirap long Februeri 4, bai yumi stadi long buk Putim Yau Long Tok Profet Bilong Daniel! long ol Buk-Stadi Bilong Kongrigesen. Planti ol i ritim pinis dispela gutpela buk yumi kisim long kibung distrik, tasol nau bai yumi kisim ol gutpela samting taim yumi toktok long dispela buk olsem wanpela grup. Mipela i laik singautim na strongim olgeta pablisa, ol man i laik harim tok, na ol pikinini, long kam bilong skelim gut Buk Daniel long olgeta wik.—Lo 31:12, 13.
2 Sediul Bilong Stadi na Pasin Bilong Stadi: Mipela i salim sediul bilong stadi long buk Tok Profet Bilong Daniel long ol kongrigesen. Lukautim gut sediul na bai em i stap wantaim buk bilong yu. Sediul i soim sapta na ol paragraf bilong buk na ol ves bilong Buk Daniel em yumi bai skelim long olgeta wik. Ol tok i stap daunbilo i stori long olsem wanem na long wanem taim bai yumi skelim sampela tok bilong buk. Long pinis bilong stadi long olgeta wik, em i gutpela sapos brata i lukautim stadi i mekim riviu wantaim grup long ol ves bilong Buk Daniel em lista i makim bilong dispela wik. Skelim gut taim na ritim na stori long ol dispela ves. Sampela ves i wankain long tupela wik, long wanem, bai yumi wok long skelim yet ol dispela ves.
3 Redi Bilong Stadi Gut: Mipela i no bin makim planti paragraf tumas bilong stadi long en long olgeta wik na bai i gat taim bilong stori gut long ol tok. Fopela hap bilong stadi i sotpela. Olsem na long pinis bilong stadi long wik i kirap long Mas 25, brata i lukautim stadi i ken mekim riviu long Daniel 2:1-40. Long wik i kirap long Epril 15, em i ken mekim riviu long Daniel 3:1-30. Long wik i kirap long Jun 24, yupela i ken stori gut long ol tok piksa na skripsa i stap long pes 139. Yupela i mas skelim sat i stap long pes 188 na 189 long stadi bilong wik i kirap long Julai 22.
4 Redim gut stadi bilong olgeta wan wan wik na bekim ol tok. Amamas long yu ken bung wantaim oganaisesen bilong Jehova long graun na kisim save na gutpela tingting ol gutpela Kristen God i bin makim ol i kamapim. (Dan. 12:3, 4) Kirapim ol narapela long kam oltaim long Buk-Stadi. Yumi olgeta i mas putim yau long tok profet bilong God em Buk Daniel i kamapim long ples klia.—Hi. 10:23-25; 2 Pi. 1:19.