Mekim Yet Gutpela Pasin i Litimapim Nem Bilong God
1 Maski yumi stap long wanem wanem hap, pasin bilong yumi na bilas bilong yumi i save kamapim olsem yumi wanem kain man na yumi lotuim wanem kain God. Ol man inap luksave moa yet long dispela pasin bilong yumi long taim bilong ol bikpela bung bilong lain bilong God; long dispela taim planti manmeri i save lukim yumi. Taim yumi stap olsem gutpela piksa, dispela i litimapim nem bilong Jehova. (1 Pi 2:12) Tasol sapos wanpela o tupela i no mekim pasin i stret o ol i no tingting gut na mekim wanpela samting, dispela inap bagarapim nem bilong God na ol lain bilong em. (Sav 9:18b) Yumi mas tingim olsem ol man bilong ausait i save skelim oganaisesen bilong yumi na dispela God yumi lotuim taim ol i lukim ol pasin yumi mekim, olsem na dispela i mas stiaim yumi long ‘mekim olgeta samting bilong givim biknem long God.’—1 Ko 10:31.
2 Bihainim Gutpela Pasin Long Kibung: Maski yumi mekim wok long wanem kain haus bung long taim bilong kibung, yumi ken ting em i olsem wanpela bikpela Haus Kingdom. Yumi mas mekim gut skin na pasim klos i stret wankain olsem yumi save mekim taim yumi go long ol miting bilong kongrigesen. Long taim bilong kibung na bihain long kibung, ol brata na sista i mas abrusim pasin bilong pasim ol klos i no stret o sampela kain klos ol lain bilong graun i save pasim na i bihainim pasin na tingting bilong ol man bilong dispela graun, long wanem, dispela inap mekim na i hatwok long luksave olsem yumi narapela kain long ol dispela lain. Ol sista i mas pasim klos i stret na gutpela, na ol i mas tingim gut olsem ol i no ken pasim sket o klos i sotpela tumas o em i gat narapela kain stail. (1 Ti 2:9, 10) Taim yumi stap long kibung, o taim yumi stap long haus bilong ol brata o long sampela haus slip, o yumi go baim ol samting long stua—long olgeta taim pasin bilong yumi i mas kamapim olsem yumi wokman bilong God, na yumi no ken mekim wanpela samting inap pundaunim narapela man.—2 Ko 6:3.
3 Baptais bai kamap long Sarere long moningtaim long kibung. Wastaua bilong Epril 1, 1995, pes 30, i stori long wanem tingting na pasin yumi mas kamapim long taim bilong baptais. Em i tok olsem yumi mas “tingim baptais i olsem wanpela bikpela samting. Em i no taim bilong mekim sampela kain singaut, o taim bilong mekim pati, o bilong lap nabaut, nogat. Na tu, em i no taim bilong bel hevi na pes drai.” Em i no gutpela long ol man i kisim baptais i pasim klos bilong waswas i pas tumas long skin, maski ol i man o meri. Olgeta i mas tingim olsem baptais bilong ol Kristen em i wanpela bikpela samting, na em i samting yumi ken amamas long en.
4 Husat Inap Kisim Kat Bilong Kibung? Ol kat bilong kibung i helpim yumi long luksave long ol brata na em i tokaut long kibung bilong yumi. Tasol yumi no ken givim nating dispela kat long ol man. Kat man i pasim i makim olsem dispela man i gat gutpela nem long wanpela kongrigesen bilong ol Witnes Bilong Jehova.
5 Kat i gat hap bilong raitim nem bilong man na nem bilong kongrigesen. Olsem na dispela man i mas bung olgeta taim wantaim dispela kongrigesen nem bilong en i stap long dispela kat. Sosaiti i save salim ol kat i go long olgeta wan wan kongrigesen. Ol i ken givim wanpela kat long olgeta wan wan pablisa i baptais pinis na ol pablisa i no baptais yet. Na tu, ol pikinini na ol narapela i save go long miting olgeta taim na ol i wok long kamap strong na i laik autim tok, ol i ken kisim wanpela kat. Em i no stret long givim wanpela kat bilong kibung long wanpela man i raus pinis long kongrigesen. Taim kongrigesen i kisim kat, ol elda i mas lukim olsem ol i bihainim dispela tok taim ol i tilim ol dispela kat.
6 Nau yumi stap long pinis bilong taim bilong las de, olsem na yumi mas i gat ol kibung distrik bilong yumi, winim olgeta taim bipo. Em samting Jehova i givim long yumi bilong yumi ken stap strong long ol samting bilong spirit na yumi gat stretpela tingting. Olsem na yu mas strong long kam long 3-pela de olgeta bilong “Ol Man Bilong Bihainim Tok Bilong God” Kibung Distrik bilong dispela yia. Olsem wanem yu ken mekim olsem? Taim kibung i no kamap yet, tokim bos bilong yu olsem yu laik kisim malolo bambai yu ken go long olgeta de bilong kibung. Sapos yu sot long mani na yu no kirap yet long bungim mani bilong i go long kibung, orait yu mas kirap nau long mekim. Beten askim Jehova long helpim yu long winim ol samting i laik pasim yu. Taim yu mekim olsem, yu ken wetim dispela taim yu bai amamas long bung wantaim ol brata sista na kisim amamas long harim ol tok bilong laip i stap oltaim oltaim i kam long gutpela Papa bilong yumi long heven, Jehova.—Skelim wantaim Jon 6:68.
7 Pita i tokim yumi olsem ‘yumi mas givim laip bilong yumi long God na wokabaut long pasin holi na bihainim olgeta pasin bilong God.’ (2 Pi 3:11) Taim ol man i gat gutpela bel i harim ol tok bilong yumi na lukim ol pasin yumi mekim long “Ol Man Bilong Bihainim Tok Bilong God” Kibung Distrik, dispela bai helpim ol long save long nambawan God bilong yumi na ol bai lotuim em, long wanem, em inap tru long olgeta man i mas givim biknem long em na litimapim nem bilong em.—1 Ko 14:24, 25.