Mekim Gutpela Pasin na Ol Man Bai Litimapim Nem Bilong Yu!
1 “Ol i stap bel isi tru, mi no bin lukim ol narapela man i stap bel isi olsem.” “Mipela i amamas long dispela lain i kam.” Em sampela bilong planti gutpela tok ol man i bin mekim taim ol i lukim yumi bung long kibung distrik long las yia. Ol dispela tok i kamapim klia olsem oganaisesen bilong yumi i gat gutpela nem. (Snd. 27:2; 1 Ko. 4:9) Ol dispela tok i litimapim nem bilong Jehova. (Mt. 5:16) Nau rot i op gen long yumi ken litimapim nem bilong God long “Ol Tisa Bilong Tok Bilong God” Kibung Distrik bilong dispela yia.
2 Long olgeta yia yumi kisim sampela gutpela tok i helpim yumi long tingim pasin yumi mas bihainim long kibung. Bilong wanem? Long wanem, tingting, pasin, na klos na bilas bilong ol man bilong graun i wok long i go nogut moa, tasol yumi no laik bihainim pasin bilong ol. Yumi no laik bagarapim gutnem bilong yumi. (Ef. 2:2; 4:17) Olsem na gutpela sapos yumi tingim ol dispela tok.
3 Mekim Gutpela Pasin—Long Hap Yu Slip Long En: Yumi gat nem olsem lain bilong bihainim stretpela pasin. (Hi. 13:18) Olsem na yumi mas tokaut stret long hamas man bai slip long rum slip bilong yumi. Yumi no ken kukim kaikai long rum sapos ol i tambuim dispela. Taim ol brata i singautim yumi long stap long haus bilong ol, yumi no ken kisim ol samting bilong ol. Yumi pilim gutpela pasin bilong ol brata na dispela i mas kirapim yumi long givim mani bilong baim kaikai samting.
4 Ol man i kirap nogut taim ol i lukim ol yangpela bilong yumi i bihainim gutpela pasin na harim tok. (Ef. 6:1, 2) Ol papamama, plis was gut long ol pikinini bilong yupela bambai ol i no ken bagarapim sindaun bilong ol narapela. Olgeta i mas was gut, nogut ol i pasim strong ol dua o pairap nabaut, tingim dispela moa yet long nait.
5 Mekim Gutpela Pasin—Long Ples Kibung: Mipela i bin lukim olsem sampela brata sista i save lusim ples sindaun bilong ol na ol i no kam bek. Ol i go sindaun nabaut ausait na ol i no harim sampela bikpela tok bilong program. Maski ples kibung i hat na i hatwok liklik long sindaun inap planti aua long en, yumi mas tingting strong long sindaun long sia bilong yumi long program olgeta. Ol atendan bai tokim olgeta man i sindaun ausait o wokabaut raun, long ol i mas go bek long ples bilong sindaun. Olgeta volantia i mas go sindaun hariap taim ol i pinisim wok bilong ol.
6 Ol papamama i mas go wantaim ol pikinini long toilet bambai toilet i ken stap klin na ol pikinini i kam bek hariap long ples bilong sindaun. Em i bikpela samting tu long olgeta i wasim gut han bilong ol bihain long ol i toilet, nogut ol i givim sik long ol narapela. Ol papamama i mas was long ol pikinini, ol i no ken pilai ausait long ples bilong sindaun na pulim tingting bilong ol narapela na ol i no putim yau long program. Pasin bilong kaikai pike o narapela samting i pulim tingting bilong ol narapela na i no stret long mekim olsem long ol miting Kristen.
7 Mekim Gutpela Pasin—Putim Ol Klos na Bilas i Stret: Bihain long wanpela kibung distrik bilong las yia, edita bilong wanpela bikpela niuspepa i tok: “Wanpela bikpela samting mi kirap nogut tru long en, em pasin bilong ol Witnes. Mi bin amamas tru long lukim planti manmeri i bihainim gutpela pasin tru na rispektim ol narapela. Ol i bilas gut, na planti handet famili bilong kain kain skin na lain i wokabaut isi i kam long stediam. Pasin bilong ol i narakain tru long pasin bilong planti narapela lain i save kam long stediam. Ol Witnes i narapela kain long planti lain man. Planti taim yumi lukim ol man i no save bihainim gutpela pasin long ai bilong ol narapela. . . . Tru tumas, i gutpela long lukim ol lain Witnes.” Yumi no ken larim klos na bilas o pasin bilong yumi i bagarapim gutpela pasin bilong spirit i stap long kibung.—Fl. 1:10; 1 Ti. 2:9, 10.
8 Mekim Gutpela Pasin—Long Taim Bilong Baptais: Ol man i laik kisim baptais ol i mas ting baptais em i bikpela samting tru na pasin bilong ol i mas stret long dispela. Ol klos bilong waswas i mas stret na i kamapim olsem man i ting baptais em i samting holi. Em bai helpim tru sumatin sapos paslain long kibung brata i lukautim stadi i skelim wantaim sumatin ol tok i stap long hap “Askim” long Wastaua bilong Epril 1, 1995.
9 Bilas na gutpela pasin bilong yumi i kamapim klia ol bilip Kristen bilong yumi, na i helpim ol man i gat gutpela bel long luksave long tok i tru. Olsem na yumi mas “mekim gutpela pasin tasol” na ol man bai litimapim nem bilong yumi taim yumi stap long “Ol Tisa Bilong Tok Bilong God” Kibung Distrik.—Ro. 13:3.