‘Olgeta Samting Yupela i Mekim, Yupela i Mas Mekim Bilong Strongim Kongrigesen’
1 Taim yumi mekim ol samting wantaim ol brata bilong yumi, gutpela sapos yumi mekim ol samting i save strongim ol. Bilong mekim olsem yumi mas tingting long lukautim ol long ol samting bilong spirit. Sapos long wok mani bilong yumi, yumi wok long kirapim ol man long baim wanpela samting o baim yumi long mekim wanpela wok, orait yumi mas was gut nogut yumi mekim samting em inap pundaunim ol brata bilong yumi.—2 Ko 6:3; Fl 1:9, 10.
2 Sampela ol i mekim kain kain wok bisnis, na ol i wok long kirapim ol wanbilip Kristen long baim ol samting ol i maketim. Sampela bisnis i save kirapim ol wokman bilong ol long kisim tingting olsem olgeta manmeri ol inap baim samting ol i maketim—ol wanlotu bilong ol tu. Sampela brata ol i stori long ol wanbilip bilong kirapim ol long insait long wok bisnis bilong ol, maski ol wanbilip i no bin askim ol long dispela samting. Olsem wanem? Em i stret long wanpela Kristen i mekim olsem? Nogat!—1 Ko 10:23, 24, 31-33.
3 Ol Brata i Mas Was Gut: Dispela i no makim olsem wanpela Kristen i no inap mekim wok bisnis wantaim wanpela brata. Em i samting bilong ol yet. Tasol sampela ol i kirapim sampela wok bisnis i save strongim pasin bilong mangal, na ol i kirapim ol wanbilip long wok wantaim ol o long givim mani bilong kamapim dispela bisnis. Planti bilong ol dispela bisnis i bagarap, na bikpela mani bilong ol man i insait long ol dispela bisnis i lus nating. Ating laik bilong kisim kwik winmani i kirapim ol manmeri long insait long ol dispela bisnis, tasol sapos dispela bisnis i bagarap, man i go pas long en em i no ken ting em i no gat asua long dispela samting. Pastaim em i mas skelim gut, sapos wok bisnis i bagarap, dispela bai mekim wanem long ol brata bilong em long ol samting bilong spirit na bilong skin. Ol brata i holim sampela wok tiokratik long kongrigesen ol i mas was gut moa yet long ol samting ol i mekim long wok bisnis, long wanem, ating ol narapela i save daun long ol na bilip long ol, na em i no stret long ol i mekim wok nogut long dispela bilip bilong ol. Ating brata i no inap mekim moa ol gutpela wok holi insait long kongrigesen sapos ol narapela i no bilip moa long em.
4 Samting yumi laik mekim em olsem: ‘Olgeta samting yumi mekim, yumi mas mekim bilong strongim kongrigesen.’ (1 Ko 14:26) Yumi no ken mekim wanpela samting i save kirapim ol narapela long mekim sampela wok bisnis insait long kongrigesen. Tok bilong Baibel i as na yumi save bung wantaim, ol wok bisnis, nogat.—Hi 10:24, 25.