“Mi Sanap Strong! Mi Sanap Strong! Mi Sanap Strong!”
1 Dispela tok bilong wanpela Kristen i bin stap gut long God long kalabus nogut bilong ol Natsi, i kamapim tingting bilong planti tausen Witnes—sampela i stap laip yet na sampela i dai pinis—em ol i bin holimpas bilip maski lain Natsi i mekim nogut long ol. (Ef. 6:11, 13) Gutpela stori bilong ol long sanap strong na winim ol hevi i stap long video Jehovah’s Witnesses Stand Firm Against Nazi Assault i kirapim tru bel bilong yumi. Mipela i laik kirapim olgeta long kongrigesen long lukim dispela video na toktok wantaim na kamapim tingting bilong yupela long ol samting yupela i lukim long video.
2 Mipela i laik bai ol dispela askim i stap daunbilo i ken kirapim tingting bilong yupela: (1) Wanem ol as na ol Witnes Bilong Jehova i sanap strong tru taim ol Natsi i mekim nogut long ol? (2a) Ol Natsi i laik bai ol Witnes i mekim wanem bilong tok gude long Hitler, tasol ol Witnes i no laik mekim olsem? Bilong wanem ol i no laik mekim olsem? (2b) Dispela i mekim wanem long i stap bilong ol famili bilong ol Witnes? (3) Ol i salim hamas Witnes i go long ol banis kalabus nogut? Ol i givim wanem mak long ol? Lain Gestapo i mekim wanem long ol? (4) Ol brata bilong yumi i no laik mekim wanem bilong ol i ken lusim kalabus? (5a) Long wanem taim na olsem wanem ol Witnes Bilong Jehova i tokaut long ol samting nogut Hitler i mekim? (5b) Dispela i kirapim Hitler long mekim wanem? (6) Olsem wanem pasin bilong ol lain bilong Jehova long stap wanbel wantaim i helpim ol yet na ol narapela na ol i no bagarap olgeta long ol samting bilong skin na spirit? (7) Wanem singsing bilong Kingdom ol i bin raitim insait long banis kalabus nogut? (8) Strongpela bilip bilong husat ol man, meri, na ol yangpela i kirapim yu long stap gut long Jehova, maski wanem wanem samting i kamap? (Lukim tu yiabuk bilong 1999, pes 144-147.) (9) Yu wanpela Witnes Bilong Jehova, olsem na dispela video i kirapim yu long pilim olsem wanem long pasin bilong no stap olsem man bilong dispela graun?
3 Gutpela pasin bilong ol Witnes Bilong Jehova em yumi lukim long video Stand Firm inap helpim ol yangpela—em inap helpim tu ol yangpela i no Witnes—long mekim stretpela pasin taim sampela lain i no orait long narapela lain, o ol wanlain i pulim ol, o ol i mas mekim pasin i stret wantaim maus bilong bel. Sapos yu wanpela yangpela i save go long haiskul o long wanpela bikpela skul, yu inap givim dispela video long tisa bilong yu bambai em i ken soim long klas? Ating yu inap givim dispela video long ol na stori liklik olsem dispela video i stori long wanpela samting i bin kamap long bipo em planti man i no save long en, o yu ken tok olsem dispela video em i gat wanpela stori i lainim yumi long bihainim stretpela pasin.
4 Dispela video Stand Firm em i wanpela gutpela tul tru bilong soim olsem wanem ol tok God i save skulim yumi long en i save strongim yumi long ol samting bilong spirit bilong yumi ken sanap strong na mekim pasin i stret. (1 Ko. 16:13) Soim dispela video long olgeta man i gat laik long save long tok i tru.