Yupela i Stap “Long Ai Bilong Olgeta”!
1 Aposel Pol i tok: ‘Mipela i stap long ai bilong olgeta manmeri na ol ensel wantaim.’ (1 Ko. 4:9) Wanem insait bilong dispela tok, na dispela i mas mekim wanem long yumi taim yumi mekim wok autim tok long nau?
2 Long wanpela man Korin, taim em i harim dispela tok “long ai bilong olgeta manmeri,” ating em bai tingim wanpela spot bilong ol Rom em ol i save resis long pait na kapsaitim blut, na long pinis bilong pilai ol i sanapim ol man ol i bin makim bilong i dai long ai bilong planti tausen manmeri na kilim ol i dai. Na olsem tasol, bikpela lain—ol man na ol ensel—ol i bin lukim ol Kristen long taim bilong ol aposel i kisim bagarap, long wanem, ol i autim tok bilong Kingdom. (Hi. 10:32, 33) Planti man i pilim tru pasin bilong ol long sanap strong, wankain olsem planti man long nau i save pilim pasin bilong yumi long sanap strong. Husat i save lukim yumi?
3 Ol Manmeri: Sampela taim ol nius i save stori long wok bilong lain bilong Jehova. Tru, yumi save amamas long ol gutpela ripot em tok bilong ol i tru na i stori long wok bilong yumi, tasol yumi save olsem ol man i no laikim yumi sampela taim ol i save kamapim ol ripot nogut. Tasol yumi mas wok yet long kamapim olsem yumi wokman bilong God, maski ol man i ‘litimapim nem bilong yumi, na sampela i daunim nem bilong yumi.’ (2 Ko. 6:4, 8) Ol man i gat gutpela bel ol i luksave olsem yumi disaipel tru bilong Jisas Krais.
4 Ol Ensel: Ol spirit tu i save lukim yumi. Satan wantaim ol spirit nogut bilong em ol i lukluk—tasol ol “i belhat nogut tru,” na ol i laik pasim wok bilong “autim tok bilong Jisas.” (KTH 12:9, 12, 17) Ol gutpela ensel bilong God ol i lukluk i stap na ol i amamas taim wanpela sinman i tanim bel. (Lu. 15:10) Taim yumi save olsem ol ensel i ting wok autim tok bilong yumi i bikpela samting tru, na dispela wok i helpim ol man, orait dispela i strongim yumi!—KTH 14:6, 7.
5 Taim ol man i birua long yu o yu ting wok autim tok bilong yu i no karim gutpela kaikai, tingim olsem ol bikpela lain man na ensel i lukluk long yu. Taim yu sanap strong, dispela i kamapim klia pasin bilong yu long stap gut long God. Bihain, pasin bilong yu long “ran strong long dispela gutpela resis” bai helpim yu long “kisim laip i stap gut oltaim oltaim.”—1 Ti. 6:12.