Yu Bihainim Ol Tok Yu Lainim Long “Ol Tisa Bilong Tok Bilong God” Kibung Distrik?
1 Ol man i bin go long kibung distrik bilong las yia, ol inap luksave olsem lain bilong Jehova i gat laik long inapim wok bilong ol long stap olsem ol tisa bilong Tok Bilong God. (Mt. 28:19, 20) Taim yu go bek long haus, yu bin tingting long bihainim wanem ol tok long i stap bilong yu na long wok autim tok?
2 Tok Bilong Baibel i Gutpela Long Skulim Man: As tok bilong namba wan de i stori gut long 2 Timoti 3:16. As tok bilong kibung i soim olsem bilong “Yumi Inap Tru Long Stap Olsem Ol Tisa Bilong Tok Bilong God,” yumi mas tingim tru Tok Bilong God, na ting tok bilong en i winim tru olgeta tingting na save bilong ol man, na yumi mas mekim wok long en long olgeta taim. Na tu, long olgeta de yumi mas beten long kisim spirit holi bilong helpim yumi long mekim wok autim tok na kamapim nambawan bikpela pasin bilong en—em pasin bilong laikim tru ol narapela. Na yumi mas larim oganaisesen bilong Jehova long graun i skulim yumi ol wokman bilong God long rot bilong ol miting bilong kongrigesen.
3 Tok i gat tripela hap i kamap long Fraide, “Skulim Yumi Yet Taim Yumi Skulim Ol Narapela,” i tok long yumi mas i stap olsem gutpela piksa long pasin bilong (1) bihainim ol lo bilong God long olgeta stretpela pasin Kristen, (2) bihainim pasin bilong stadi gut, na (3) rausim ol tingting i stap long bel em Satan inap mekim wok nogut long en. Bihain long dispela, yumi kisim save long ol gutpela rot bilong lukautim famili bilong yumi long ol piksa nogut bilong pasin sem. Ol papamama i mas stap olsem gutpela piksa na ol i no ken lukim liklik ol piksa bilong pasin sem, na ol i mas skelim gut ol piksa samting ol pikinini i lukim long Intenet na TV. Yu bin kirap long bihainim wanem ol tok bilong Fraide?
4 Laspela tok bilong dispela de i strongim tingting bilong yumi long amamas long lait i kam long Jehova, na long pas gut wantaim ol Kristen God i bin makim, na strongim pasin wanbel i stap namel long lain bilong Jehova. Olsem wanem? Sapos yu save long tok Inglis, yu bin ritim nupela buk Isaiah’s Prophecy—Light for All Mankind II?
5 Yumi Inap Long Skulim Ol Arapela Man: Skripsa bilong namba tu de em 2 Timoti 2:2. Olsem wanem? Taim yu harim tok i gat tripela hap i kamap long Sarere moningtaim, yu bin tingim ol tok ol i kamapim long pasin bilong (1) painim ol man i gat gutpela bel, (2) kirapim ol long kisim sampela save moa, na (3) skulim ol long bihainim olgeta tok Krais i bin givim? Yu save bihainim ol tok yu lainim, olsem soim ol man bilong haus wanpela o tupela skripsa na mekim ol tok i opim rot bilong mekim gobek?
6 Program bilong apinun i kamapim klia olsem em i bikpela samting long bihainim pasin bilong Bikpela Tisa, em Jisas. Long wanem ol rot yu traim long bihainim moa yet pasin bilong em? Ol tok yu kisim save long en long namba tu tok i gat tripela hap long dispela de, yu ting olsem wanem yumi ken “Larim Skul i Kam Long God i Helpim Yumi Moa Yet”? Yu bin bihainim wanem ol tok bilong helpim yu long putim gut tingting bilong yu long ol samting yu stadi long en na long ol miting bilong kongrigesen?
7 Tru tumas, buk Kisim Helpim Long Skul Tiokratik Bilong Autim Tok bai helpim yumi long kisim gutpela save long mekim ol tok na lainim ol narapela long Tok Bilong God. Mipela i laik bai dispela buk i ken kamap long Tok Pisin na Hiri Motu long pinis bilong 2002. Na tu, yumi bin amamas tru long kisim buk Putim Yau Long Tok Profet Bilong Daniel! Brata i tokaut long dispela buk i tok: “Dispela buk long ol tok profet bilong Daniel bai kirapim yumi long laikim moa yet Tok Bilong God na em bai helpim yumi long save gut long ol tok profet bilong Baibel em truim bilong planti i kamap pinis.” Dispela i kamapim klia olsem taim i sot pinis, a? Nau yumi stadi long dispela buk long Buk-Stadi bilong Kongrigesen. Taim yumi olgeta i lusim hap taim long olgeta wik bilong redim gut ol tok bilong stadi, dispela buk bai helpim yumi tru.
8 Tingim Dispela Taim Yumi Stap Long En na Kamap Tisa: Hibru 5:12 i redim tingting bilong odiens long harim ol tok bilong Sande. Tok i gat tripela hap i kamap long moningtaim, “Tok Profet Bilong Malakai i Redim Yumi Long De Bilong Jehova,” i kirapim yumi long givim ol nambawan gutpela samting bilong yumi long God, na nolaik tru long olgeta kain pasin giaman bambai yumi ken abrusim bagarap long bikpela de bilong Jehova. Pilai bilong Baibel, “Rispektim Wok Bos Bilong Jehova,” i kamapim klia olsem wanem pasin antap, laik bilong kisim bikpela namba, pasin jeles, na pasin bilong stap gut long wanpela man i no stret long stap gut long em, em ol samting Kora na lain bilong em i mekim, i kirapim ol long bikhet long Jehova yet. Tok i kamap bihain long pilai i kamapim klia olsem em i bikpela samting long daun long man God i makim bilong mekim wok bos insait long famili na kongrigesen. Pablik-tok “Husat Ol i Wok Long Skulim Olgeta Lain Long Tok i Tru?,” i kamapim klia olsem ol Witnes Bilong Jehova i save mekim olsem. Ol i narapela kain long lain Kristendom em ol i tok tasol long ol i lainim ol man long tok i tru bilong Baibel.
9 Tru tumas, Jehova i skulim yumi long kamap gutpela tisa bilong Tok bilong em. Yumi mas bihainim ol tok yumi lainim, na ‘yumi mas was gut long ol pasin bilong yumi yet na long wok yumi mekim bilong skulim ol manmeri, na God bai kisim bek yumi na ol manmeri i save harim tok bilong yumi.’—1 Ti. 4:16.