Video United by Divine Teaching—i Skelim Pasin Bilong Ol Brata Long Stap Wanbel Tru
Wanpela wasman raun i sindaun long Baibel-stadi ol i mekim wantaim wanpela meri i no bin kirap yet long go long ol miting bilong kongrigesen. Wasman raun i tokim em long lukim video United by Divine Teaching. Long dispela wik meri ya i go long miting na i tok em i amamas long em i kam. Olsem wanem dispela video inap kamapim kwik gutpela kaikai olsem? Meri i pilim tru pasin bilong yumi long stap olsem brata brata namel long ol man i pait na birua long narapela.—Jo. 13:35.
Lukim dispela video na pilim pasin sori na bel isi i stap namel long ol Witnes Bilong Jehova long olgeta hap. Bihain tingim ol dispela askim:
(1) Bilong wanem “God i Skulim Yumi” i gutpela nem bilong kibung distrik bilong 1993-1994?—Mai. 4:2.
(2) Tok i tru bilong Baibel i bin mekim wanem long sampela famili? Em i bin mekim wanem long famili bilong yu?
(3) Bilong wanem em i bikpela samting long Jehova i mas skulim yumi?—Sng. 143:10.
(4) Ol i mas mekim wanem bikpela wok bilong redim ol bikpela kibung intenesenel?
(5) Long ol kibung Kristen yu bin go long en, yu bin lukim wanem ol samting i truim tok bilong Song 133:1 na Matyu 5:3?
(6) Wanem ol samting i soim olsem pasin bilong God long skulim ol man i kamapim ol bikpela samting?—KTH 7:9.
(7) Long wanem taim planti Kristen tru i bin kisim baptais, winim olgeta taim bipo?
(8) Wanem ol tok bilong Maika, Pita, na Jisas i kamap tru namel long ol Witnes Bilong Jehova?
(9) Wanem samting i helpim yu long save tru olsem famili i stap amamas na wanbel em i no wanpela driman nating tasol?
(10) Yu laik soim dispela video long husat? Bilong wanem yu laik soim long ol?
Taim wanpela sista i lukim pinis dispela video, em i tok: “Dispela video i helpim mi long tingim moa yet olsem long nau stret planti brata sista Kristen long olgeta hap ol i stap gut long wok bilong Jehova. . . . Pasin bilong yumi long stap wanbel olsem ol brata brata em i wanpela gutpela samting tru!”—Ef. 4:3.