Pilim Tru Pasin Sori Bilong Jehova na Kisim Ol Blesing—Hap 2
1 Long hap 1 bilong dispela tok long mun i go pinis, yumi bin kamapim 4-pela rot yumi ken soim olsem yumi pilim tru pasin sori bilong Jehova taim yumi autim tok. (1 Jo. 4:9-11) Nau bai yumi stori long 5-pela narapela rot. Taim yumi givim bel long helpim ol narapela long ol samting bilong spirit, yumi kisim ol blesing.
2 Autim Tok Long Kain Kain Taim na Ples: Dispela em i wanpela gutpela rot bilong painim ol man i laikim tru stretpela pasin na tilim ol gutpela nius long ol. Em i gutpela long makim “taim bilong mekim” wok autim tok long olgeta taim rot i op na long olgeta kain man yumi save bungim. (Ef. 5:16) Ating yumi mas strongim bel bilong autim tok long dispela kain rot, tasol sapos yumi pilim tru pasin sori bilong God na ol samting ol manmeri i sot long en, bai yumi autim tok long olgeta taim rot i op.—2 Ti. 1:7, 8.
3 Gutpela samting i painim wanpela misineri taim em i kirap toktok wantaim wanpela pasindia i sindaun wantaim em long teksi. Man ya i gat laik long harim tok. Misineri i go bek lukim em, na kirap stadi long Baibel wantaim em. Dispela man i kam insait long tok i tru na em i kamap strong na bihain em i kamap elda long kongrigesen!
4 Raitim Ol Pas: Ating sik o bikpela ren samting i mekim na yumi no inap i go na autim tok long ol haus. Yumi ken raitim ol pas, autim tok liklik long ol man yumi save long ol, o long ol man em wanpela bilong famili bilong ol i dai pinis, o long ol man yumi bin bungim long taun tasol ol i go bek long ples, ating long wanpela longwe hap. Yumi ken putim long pas wanpela liklik nius i kamapim sampela tok bilong Baibel na i kirapim man long bekim pas sapos em i gat sampela askim. Raitim atres bilong yu yet o bilong Haus Kingdom na bai man i ken salim pas long en, no ken raitim atres bilong brens-ofis.
5 Autim Tok Long Telefon: Ol brata sista i sindaun long taun na ol i gat telefon, dispela em i wanpela gutpela rot bilong autim tok long ol wanblut na narapela man. Sapos yumi bihainim stretpela tingting, gutpela pasin, na toktok gut, ating ol man bai amamas long toktok wantaim yumi. Yumi ken bihainim planti tok i stap long buk Toktok Gut pes 9-15 bilong kirapim tok taim yumi autim tok long telefon.
6 Tok Amamas Long Ol Nupela Man: Sapos yumi laikim tru ol narapela, bai yumi tingim ol man yumi no save long ol em ol i kam long ol miting bilong yumi, na tok amamas long ol. (Ro. 15:7) Helpim em long luksave olsem em i stap wantaim ol man i laik bai em i stap gut long ol samting bilong spirit. Pasin bilong yumi long tingim em tru na kirapim em long stadi long Baibel inap mekim na em i laik bai yumi helpim em.
7 Gutpela Pasin Bilong Yumi: Gutpela pasin bilong yumi i givim biknem long tok i tru. (Ta. 2:10) Taim ol man bilong graun i tokaut long ol gutpela pasin bilong yumi ol Witnes Bilong Jehova, dispela i litimapim nem bilong God bilong yumi. (1 Pi. 2:12) Dispela tu inap helpim ol narapela long kirap bihainim nupela pasin.
8 Gutpela sapos yumi skelim dispela 5-pela rot bilong soim olsem yumi pilim tru bikpela pasin sori bilong Jehova, na bihainim ol dispela rot. (1 Jo. 4:16) Taim yu mekim olsem, bai yu kisim planti blesing.