Kisim Yet Ol Gutpela Samting Long Wastaua na Kirap!
Nau yumi no inap kisim moa sabskripsen bilong Wastaua na Kirap! long rot bilong sabskripsen, olsem na yumi mas wok strong na bai yumi yet na ol man yumi autim tok long ol, i no lus long kisim wanpela magasin.
Ol Magasin Bilong Yu Yet: Taim sabskripsen bilong yu i pinis, apim namba bilong ol magasin long oda bilong yu long kongrigesen. Ol papamama i mas putim oda long ol magasin na bai i gat inap long olgeta wan wan bilong famili. Raitim nem bilong yu long magasin bilong yu yet na bai yu no popaia na tilim long ol man. Taim ol nupela magasin i kam, ol brata i lukautim ol magasin bai stretim ol kwik na yupela inap kisim ol magasin long Haus Kingdom.
Bringim Ol Nupela Magasin Long Ol Man: Ol pablisa i mas wok strong long kirapim wanpela raun bilong bringim ol nupela magasin i go long ol man i laik kisim. Taim yu yet i bringim ol magasin i go long ol kain man olsem, dispela bai opim rot long yu inap kirapim laik bilong ol long kisim sampela save moa, na kirapim ol Baibel-stadi.—Lukim Wok Kingdom Bilong Yumi, Oktoba 1998, pes 12.
Ol Lain i Mas Kisim Helpim: Sapos wanpela man i gat laik tru long ritim ol magasin, tasol em i sindaun long wanpela longwe teritori, orait em i ken kisim yet sabskripsen bilong ol magasin. Sapos kain man olsem i sindaun long teritori bilong kongrigesen, tasol yu i no inap bringim ol nupela magasin long em, yu ken kamapim dispela samting long Kongrigesen Sevis Komiti. Sapos ol i orait, yu ken wokim sabskripsen bilong dispela man. Yu ken mekim wok long sabskripsen pepa (M-1-MP na M-101-E).
Yumi ken bilip tru olsem Jehova bai wok yet long blesim olgeta hatwok yumi mekim bilong tokaut long Kingdom long rot bilong Wastaua na Kirap!