Pilim Tru Ol Samting Bilong Wok Tiokratik
1 Taim em i stretim rot bilong stretim gen tempel, King Josaia i mekim tok amamas long ol man bilong mekim dispela wok, na em i tok: “Mi save, ol man bilong bosim wok ol i no man bilong giaman na paulim mani. Olsem na hetpris i no ken askim ol long ol bai i mekim wanem long dispela mani.” (2 Kin. 22:3-7) Ol dispela man i pilim tru ol samting i holi, na dispela i bin kamap ples klia long wok ol i bin mekim long dispela mani. Long nau, taim yumi mekim wok holi bilong autim gutnius bilong God, yumi tu i mas mekim gut wok long ol samting yumi bin kisim.
2 Long Wok Autim Tok: Taim yumi pilim ol bikpela tok i stap long ol buk na nius bilong yumi, na yumi tingim mani ol i bin tromoi bilong wokim, dispela bai kirapim yumi long tingim gut ol dispela buk. Yumi no ken tilim nating ol nius bilong yumi long ol man em ol i no pilim ol tok bilong Baibel. Sapos man i no givim bel long harim gutnius yumi autim, yumi ken givim em wanpela liklik nius, na yumi no givim ol narapela buk samting.
3 Yumi mas tilim ol nius long pasin i makim olsem yumi tingim ol tok bilong en i bikpela samting. No ken lusim nating long pablik ples we ol bai stap nabaut. Bilong abrusim pasin bilong bungim nating planti nius, skelim gut ol buk na nius yu gat long haus paslain long yu kisim sampela nius moa. Sapos long olgeta taim sampela nius yu kisim i save stap yet, orait tingting long daunim oda bilong yu.
4 Ol Buk na Nius Bilong Yu Yet: Yumi mas putim oda long ol buk na nius yumi gat wok long en tasol. Yumi mas tingting gut taim yumi putim oda long ol buk samting we ol i bin tromoi bikpela mani bilong wokim, olsem ol deluxe Baibel, Reference Bible, Concordance, Index, buk Insight, na buk Proclaimers.
5 Olsem wanem? Yu save raitim nem na atres bilong yu long ol buk na nius bilong yu yet? Dispela pasin bai helpim yu na bai i no gat wok long yu kisim narapela buk samting bilong senisim buk yu bin lusim. Sapos wanpela buk singsing, Baibel, o wanpela buk bilong stadi i lus, ating yu inap painim long hap ol i putim ol samting i lus long en long Haus Kingdom o ples kibung.—Lu. 15:8, 9.
6 Yumi mas wok strong long bihainim gutpela tingting taim yumi mekim wok long ol buk na nius bilong yumi. Long dispela rot yumi kamapim klia olsem yumi mekim gut wok long ol samting Jehova i givim yumi bilong mekim wok bilong Kingdom.—Lu. 16:10.