Bihainim Dediket Bilong Yumi
1 Maski yu bin baptais nau tasol o planti yia i go pinis, ating yu inap tingim yet dispela bikpela samting long laip bilong yu. Baptais i no makim olsem nau yumi pinis long mekim wok bilong God, nogat, em i makim olsem nau yumi kirap long mekim wok bilong God long laip olgeta bilong yumi. (1 Jo. 2:17) Yumi mas mekim wanem bilong bihainim dediket bilong yumi?
2 Bihainim Pasin Bilong Krais: Taim Jisas i kisim baptais, em i “kirapim wok bilong en,” long “autim gutnius bilong kingdom bilong God.” (Lu. 3:23; 4:43) Olsem tasol, taim yumi kamapim long ples klia dediket bilong yumi long Jehova long rot bilong baptais, yumi kamap wokman bilong autim gutnius. Tru, yumi mas lusim bikpela hap taim na wok strong bambai yumi inap i gat kaikai samting, tasol nambawan bikpela wok bilong yumi em wok Kristen bilong autim tok. (Mt. 6:33) Ol man i dediket long God ol i no save taitim bun long kisim planti mani kago o biknem, nogat, olsem aposel Pol, ol i ‘amamas tru long wok bilong God ol i mekim.’ (Ro. 11:13) Olsem wanem? Yu laikim tru gutpela wok bilong Jehova yu holim, na yu givim bel tru long mekim dispela wok?
3 Olsem Jisas i bin mekim, yumi mas “sakim Satan.” (Jems 4:7) Satan i bin traim Jisas bihain tasol long Em i kisim baptais, na long nau tu Satan i mekim olsem long ol wokboi bilong Jehova em ol i dediket pinis. (Lu. 4:1-13) Yumi stap namel long ol samting bilong graun em Satan i bosim, olsem na yumi mas bosim gut skin, na sakim ol samting em inap bagarapim tingting na bel bilong yumi. (Snd. 4:23; Mt. 5:29, 30) Baibel i tokim ol Kristen olsem ol “i no inap . . . kaikai long tebol bilong Bikpela na long tebol bilong ol spirit nogut tu.” (1 Ko. 10:21) Dispela i makim olsem yumi mas was gut na stap longwe long ol amamas nogut, ol poroman nogut, na ol samting nogut long Intenet. Na tu, yumi mas sakim ol buk samting em ol man i bin tromoi lotu i tru ol i kamapim. Taim yumi was i stap na sakim ol dispela samting na ol narapela samting Satan i kamapim bilong trikim yumi, dispela bai helpim yumi long truim dediket bilong yumi.
4 Mekim Wok Long Ol Samting God i Givim: Bilong helpim yumi long bihainim dediket bilong yumi, Jehova i givim yumi ol tok bilong em long Baibel na kongrigesen Kristen. Mekim pasin bilong ritim Baibel na beten long Jehova i kamap olsem pasin yu save mekim long olgeta de. (Jos. 1:8; 1 Te. 5:17) Amamas long ol miting bilong kongrigesen. (Sng. 122:1) Bung wantaim ol man i pret long Jehova na ol i bihainim ol lo bilong em.—Sng. 119:63.
5 Jehova i save helpim yumi, na long dispela rot yumi inap truim dediket bilong yumi na kisim amamas long mekim wok bilong em inap oltaim oltaim.—Sng. 22:26, 27; Fl. 4:13.