Yu Orait Long Ol i Bung Long Haus Bilong Yu?
1 Long taim bilong ol aposel, planti Kristen i bin orait long kongrigesen i ken mekim ol miting long haus bilong ol. (1 Ko. 16:19; Kl. 4:15; Fm. 1, 2) Long sampela kongrigesen long nau, ol i sot long ol ples bilong mekim Buk-Stadi Bilong Kongrigesen na ol bung bilong wok autim tok. Dispela inap mekim na sampela grup bilong Buk-Stadi i gat 30 o winim 30 manmeri i bung, na dispela i winim namba i gutpela long wan wan Buk-Stadi i mas i gat, em inap olsem 15.
2 Gutpela Samting Tru: Olsem wanem? Yu bin tingting long orait long wanpela grup bilong Buk-Stadi Bilong Kongrigesen i ken bung long haus bilong yu? Sapos haus i gat spes, i klin, i gat gutpela lait, na win inap kam gut insait long en, em inap kamap gutpela ples bilong mekim Buk-Stadi. Buk-Stadi i wanpela miting bilong kongrigesen, na em i insait long pasin Jehova i bin putim bilong skulim lain bilong em, olsem na sapos yu orait long wanpela grup bilong Buk-Stadi i ken bung long haus bilong yu, dispela i wanpela gutpela samting tru. Planti em ol i bin orait long grup i bung long haus bilong ol, ol i stori olsem dispela i bin helpim ol long ol samting bilong spirit.
3 Sapos yu ting haus bilong yu i gutpela long ol i ken yusim, orait toksave long ol elda. Ating ol i wok long painim sampela hap moa bilong mekim Buk-Stadi long en. Sapos i no gat rot long mekim Buk-Stadi long haus bilong yu, orait yu ting ol inap mekim ol bung bilong wok autim tok long haus bilong yu? Maski sapos long nau i no gat wok long yusim haus bilong yu, ol elda bai amamas long save olsem ol inap yusim bihain sapos i gat wok long mekim olsem. Ating bihain ol bai mekim Buk-Stadi long haus bilong yu.
4 Soim Gutpela Pasin: Taim yupela i bung long haus bilong wanpela brata, olgeta lain i bung i mas tingim gut ol samting long haus bilong em. Ol papamama i mas was gut na bai ol pikinini i stap tasol long hap bilong mekim stadi, ol i no ken i go nabaut long ol narapela hap bilong haus. Tingim gut ol neiba tu, no ken mekim ol samting i givim nating hevi long ol.—2 Ko. 6:3, 4; 1 Pi. 2:12.
5 Hibru 13:16 i kirapim yumi long no ken lusim tingting long ‘mekim gutpela pasin long ol manmeri. Na sapos sampela i sot long ol samting, orait yumi mas givim sampela samting bilong yumi bilong helpim ol. Yumi no ken lusim tingting long mekim ol dispela kain pasin, long wanem, em dispela kain ofa God i save laikim tru.’ Taim yu orait long wanpela miting bilong kongrigesen i ken kamap long haus bilong yu, dispela em i gutpela rot tru bilong givim ol gutpela samting bilong yu long ol narapela na long “givim biknem” long Jehova.—Snd. 3:9.