“Ol Manmeri Bilong God, Yupela i Mas Laikim Em Tru”
Bung Bilong Tingim i Dai Bilong Jisas Long Epril 4
1 Inap sampela yia i go pinis, taim Yukren i stap aninit long gavman Komiunis, ol bikman i putim ai long ol brata, na moa yet long taim de bilong Kaikai Bilong Bikpela i wok long i kam klostu. Ol i laik painimaut ol brata bai bung we. Dispela i putim hevi long ol brata, long wanem, ol bikman i save long wanem wik samting dispela bung bai kamap long en. Ol brata inap mekim wanem? Long haus bilong wanpela sista i gat rum aninit long haus em bikpela wara i kam insait long en. Ol bikman i no ting ol man bai bung long kain hap olsem, olsem na ol brata i wokim plua i kam antap abrusim mak bilong wara. Maski ol i no gat bikpela spes na ol i mas brukim baksait taim ol i sindaun long dispela plua, ol bikman i no painim ol taim ol i mekim Memorial.
2 Pasin bilong ol brata bilong Yukren long strong long bihainim tok bilong Baibel long tingim i dai bilong Jisas i kamapim klia pasin bilong ol long laikim tru God. (Lu. 22:19; 1 Jo. 5:3) Taim yumi gat ol hevi, pasin bilong ol dispela brata inap strongim yumi na kirapim yumi long tingting strong long kam long Kaikai Bilong Bikpela long Epril 4. Taim yumi mekim olsem, yumi soim olsem yumi gat wankain tingting olsem man bilong raitim song. Em i tok: “Ol manmeri bilong God, yupela i mas laikim em tru.”—Sng. 31:23.
3 Helpim Ol Narapela Long Laikim God: Pasin bilong laikim God i kirapim yumi tu long singautim ol narapela long kam long dispela bung. Namel pepa bilong Wok Kingdom bilong Februeri i kirapim yumi long wokim lista bilong ol man yumi tingting long singautim long Memorial. Olsem wanem? Yu wok strong long singautim olgeta dispela man i stap long lista bilong yu? Lusim haptaim bilong stori long ol long dispela bung i bikpela samting olsem wanem. Yu ken kolim gen de na taim Memorial bai kamap long en, o sapos yu tokim ol long bai yu go wantaim ol long Memorial, dispela inap strongim ol long kam.
4 Long Memorial, wok strong long tok welkam long ol man i kam, na soim olsem yumi amamas long ol i kam. Olsem wanem yu ken helpim ol long laikim Jehova moa yet? Amamas long bekim ol askim bilong ol. Redi long tokim ol long stadi long Baibel, sapos i stret long mekim olsem. Singautim ol long kam long ol miting bilong kongrigesen. Ol elda i mas tingim tru ol Kristen i bin lusim wok autim tok em ol i kam long Memorial. Ol i ken stretim rot bilong go lukim ol dispela bratasista na strongim ol long kirap gen long mekim wok, ating ol i ken kamapim sampela tok moa em tok bilong Memorial i bin kamapim.—Ro. 5:6-8.
5 Mekim Pasin Bilong Yumi Yet Long Laikim Jehova i Go Bikpela: Pasin bilong tingim tingim gutpela presen bilong pe bilong baim bek man inap mekim na pasin bilong yumi long laikim Jehova na Pikinini bilong em i go bikpela moa. (2 Ko. 5:14, 15) Wanpela Witnes em i bin go long Memorial inap planti yia pinis, em i tok: “Mipela i save amamas na wetim tru Memorial. Long olgeta yia Memorial i wok long kamap bikpela samting moa long mipela. Inap 20 yia i go pinis, gutpela papa bilong mi i dai, na taim mi lukluk long bodi bilong em, bel bilong mi i pilim tru pe bilong baim bek man. Bipo em i samting mi klia long en long tingting, tasol mi no pilim. Yes, mi bin save long ol skripsa i stori long dispela samting na mi inap lainim ol man long en! Tasol taim mi lukim tru samting nogut bilong i dai, bel bilong mi i amamas tru long ol gutpela samting dispela pe bilong baim bek man bai kamapim bilong helpim yumi.”—Jo. 5:28, 29.
6 De bilong Memorial bilong dispela yia i wok long i kam klostu, olsem na lusim haptaim bilong redim bel bilong yu long dispela bung. Skelim long bel ol ves bilong Baibel ritim bilong Memorial, olsem i stap long buklet Skelim Sampela Tok Bilong Baibel Long Olgeta De—2004 na long 2004 Calender. Sampela i amamas long ritim gen sapta 112-116 long buk Nambawan Man taim ol i mekim famili stadi. Sampela narapela i mekim sampela stadi moa long ol buk na nius em wokboi i gat gutpela tingting i bin wokim. (Mt. 24:45-47) Taim yumi beten, yumi olgeta i ken tok tenkyu long dispela pe bilong baim bek ol man. (Sng. 50:14, 23) Tru tumas, long taim bilong Memorial long dispela yia, gutpela sapos yumi tingim pasin bilong Jehova long laikim yumi na painim rot bilong kamapim klia olsem yumi laikim em.—Mk. 12:30; 1 Jo. 4:10.