Mekim Gutpela Wok Long Baibel
1 Maski yumi gat laik long tilim wanem buk o nius long taim yumi autim tok, i gutpela sapos yumi makim wanpela skripsa i save kirapim tingting bilong man em yumi ken kamapim long ol man i laik harim tok. (Hi. 4:12) Sapos yu makim wanpela skripsa insait long buk o nius em yu laik tilim, dispela bai opim rot long yu soim dispela buk o nius long man bilong haus. Long sampela hap, ol pablisa i save holim Baibel long han taim ol i go bungim man o taim ol i autim tok long ol haus.
2 Pastaim Ritim Wanpela Skripsa: Sampela pablisa i save kirapim tok long rot bilong kamapim wanpela askim long man bilong haus long wanpela skripsa bilong Baibel, na nau ol i kirap ritim dispela ves. Dispela i stiaim tingting bilong man bilong haus i go long Baibel. Olsem wanem? Sampela bilong ol dispela kirap bilong tok bai i gutpela long teritori bilong yu?
◼ “Sapos yu gat strong inap long mekim, bai yu kamapim ol dispela senis?” Ritim Kamapim Tok Hait 21:4.
◼ “Yu save bilong wanem yumi stap long dispela taim nogut?” Ritim 2 Timoti 3:1-5.
◼ “Yu ting hap yumi stap long en bai i gutpela moa sapos olgeta man i bihainim dispela tok?” Ritim Matyu 7:12.
◼ “Yu ting ol pikinini bilong yu bai inap i stap long kain taim em dispela ves i stori long en?” Ritim Song 37:10, 11.
◼ “Yu ting wanpela taim bai kamap we dispela tok i stap long ves hia bai kamap tru?” Ritim Aisaia 33:24.
◼ “Yu save long senis bai kamap long ol gavman olsem dispela ves i toktok long en?” Ritim Daniel 2:44.
◼ “Olsem wanem? Yu bin i gat laik long givim dispela askim hia long God?” Ritim Jop 21:7.
◼ “Yu ting bai i gat rot long yumi lukim gen ol famili bilong yumi i dai pinis?” Ritim Jon 5:28, 29.
◼ “Olsem wanem? Yu ting ol man i dai pinis ol i save long ol samting ol man i stap laip i mekim?” Ritim Saveman 9:5.
3 Stori Gut, Tok Piksa, Helpim Man: Taim wanpela man i amamas long harim tok, no ken toktok hariap tumas, lusim haptaim bilong kamapim gut insait bilong skripsa, mekim tok piksa, na soim olsem wanem tok bilong skripsa yu ritim bai helpim em na bai em i kliagut long en. (Neh. 8:8) Taim ol man i kliagut na bilipim Tok Bilong God, dispela inap mekim na ol inap kamapim ol gutpela senis long i stap bilong ol.—1 Te. 2:13.
4 Wok yet long mekim gutpela wok long Baibel bilong kirapim laik bilong ol man long harim tok. Yu ken mekim wok long wankain pasin taim yu mekim ol gobek: (1) Makim wanpela skripsa i stret. (2) Kamapim wanpela askim long dispela ves bilong Baibel. Orait nau yu ken ritim. (3) Kamapim insait bilong skripsa, mekim tok piksa, na soim olsem wanem tok bilong skripsa bai helpim man. Taim yu mekim gobek, wok strong long helpim man long kisim sampela save moa long Baibel. Sapos yu mekim olsem ating i no longtaim na bai yu kirapim wanpela Baibel stadi!
[Askim Bilong Stadi]
1. Yu ken mekim wanem bilong redi long autim tok?
2. (a) Olsem wanem yumi ken kirapim tok bilong yumi long rot bilong ritim wanpela skripsa? (b) Wanem ol tok bilong Baibel em ol man long teritori bilong yu bai i gat laik long save long en?
3. Olsem wanem yumi inap helpim ol man long kliagut long tok bilong Baibel yumi ritim long ol?
4. Olsem wanem yumi ken mekim gutpela wok long Baibel taim yumi mekim ol gobek?