Kirapim Ol Man Long Magasin-Raun Bilong Yu Long Harim Tok
1 Planti man yumi bungim long taim bilong autim tok ol i amamas long yumi go lukim ol na ol i save kisim ol buk na nius, tasol ol i no laik yumi stadi wantaim ol long Baibel. Wanpela rot long kirapim laik bilong ol long harim tok em long rot bilong magasin-raun. Taim yu tilim ol magasin long wanpela man, raitim nem na atres bilong em, det yu lukim em, wanem ol magasin em i kisim, na skripsa yu stori long em, na tu, sampela narapela samting yu lukim na dispela inap kirapim laik bilong em long harim tok. Taim yu kisim ol nupela magasin, yu mas painim ol tok i stap insait em ol man long magasin-raun bilong yu bai laikim na kamapim ol dispela stori taim yu go lukim ol. (1 Ko. 9:19-23) Bihain, ating sampela samting ol i ritim insait long ol magasin bilong yumi bai kirapim laik bilong ol long kisim sampela save moa.
2 Tasol yumi save olsem i no planti manmeri bai kamap wokman bilong Jehova taim ol yet tasol i ritim ol magasin. Em i bikpela samting long ol man i mas kam long Jehova long nau, olsem na yumi ken mekim wanem samting moa bilong helpim ol? (Sef. 2:2, 3; KTH 14:6, 7) Yumi ken kirapim laik bilong ol long rot bilong ritim wanpela skripsa i stret long ol long taim yumi go givim ol nupela magasin long ol.
3 Stori Long Wanpela Skripsa: Tingim ol man long magasin-raun bilong yu, na redim sampela skripsa i stret long ol. (Fl. 2:4) Olsem: Sapos wanpela long famili bilong ol man long magasin-raun bilong yu i dai, orait yu ken go bek lukim ol na stori long tok Baibel i mekim long ol man i dai pinis ol i stap olsem wanem na bilip bilong kirap bek. Bilong helpim yu long stori long wanpela skripsa, yu ken mekim wok long ol tok i stap long buk Toktok Gut aninit long ol het tok “Dai” na “Kirap Bek.” Bihain, ating bai yu no hatwok long stori long olsem wanem sik, pasin bilong go lapun, na dai bai pinis olgeta. Bikpela samting em yumi laik toktok wantaim man long samting em i gat laik long save long en na yumi wok long soim em ol tok Baibel i mekim long ol dispela samting.
4 Helpim Ol Long Kliagut: Tru, i gutpela long mekim ol tok i no hatwok long kisim na ol sotpela tok, tasol yumi mas mekim sampela samting moa na i no ritim tasol wanpela skripsa yumi redim. Satan i pasim tingting bilong ol man long harim gutnius. (2 Ko. 4:3, 4) Ol man i save long Baibel ol tu i mas kisim helpim bilong kliagut long ol tok bilong en. (Ap. 8:30, 31) Olsem na lusim haptaim bilong stori gut long skripsa, wankain olsem long tok yu mekim insait long Skul Tiokratik Bilong Autim Tok. (Ap. 17:3) Helpim man long save long olsem wanem tok bilong Baibel inap helpim em long laip bilong em.
5 Sapos man i amamas long ol samting em i lainim, orait taim yu go lukim em gen yu ken kamapim tupela o tripela skripsa moa long em. Wok long painim rot bilong soim em buklet Yumi Mas Mekim Wanem? o buk Save. Long dispela rot, wanpela man long magasin-raun bilong yu inap kirap stadi long Baibel.
[Askim Bilong Stadi]
1. Olsem wanem yumi ken kirapim laik bilong ol man long harim tok taim yumi mekim ol magasin-raun?
2. Bilong wanem em i bikpela samting long ol man i mas kam long Jehova long nau? Yumi ken mekim wanem samting moa bilong helpim ol?
3. (a) Olsem wanem yumi ken redim sampela skripsa bilong stori long ol man? (b) Ol man long teritori bilong yu i save tingting planti long wanem samting?
4. Bilong wanem em i bikpela samting long helpim ol narapela long kliagut long tok bilong ol skripsa yumi yusim? Olsem wanem yumi ken mekim olsem?
5. Olsem wanem wanpela man long magasin-raun bilong yu inap kirap stadi long Baibel?