Gutpela Pasin Bilong Yumi i Litimapim Nem Bilong God
1 Ol samting Jehova i bin wokim i kamapim klia tru ol pasin bilong em, maski ol dispela samting i no inap toktok. (Sng. 19:1-3; Ro. 1:20) Na olsem tasol, gutpela pasin bilong yumi, ol pasin Kristen, na bilas i stret i litimapim nem bilong God. (1 Pi. 2:12; 3:1-4) Long pasin bilong yumi, yumi olgeta i mas i gat laik long “givim biknem long dispela tok yumi save autim, em tok tru bilong God.”—Ta. 2:10.
2 Olsem wanem ol man i gat sin inap mekim tok bilong Baibel i kamap gutpela moa? Ol inap mekim olsem taim Baibel i stiaim ol na holi spirit i strongim ol. (Sng. 119:105; 143:10) Tok bilong God “i gat laip, na em i wok strong i stap. Em i sap moa, na i winim bainat i gat tupela sap.” (Hi. 4:12) Em i go insait tru long bel bilong yumi na i helpim yumi long kamap nupela man. (Kl. 3:9, 10) Holi spirit i helpim yumi long kamapim ol gutpela pasin, olsem pasin bilong helpim ol man na mekim gutpela pasin long ol, stap bel isi, na daunim laik bilong olpela bel. (Gal. 5:22, 23) Olsem wanem? Yumi wan wan i larim tok na spirit bilong God i stiaim wokabaut bilong yumi?—Ef. 4:30; 1 Te. 2:13.
3 Ol Narapela i Lukim: Taim yumi bihainim ol lo bilong Jehova na wok strong long kamapim ol pasin bilong em, ol narapela bai luksave long dispela. Olsem: Tingim wanpela man em ol wanwok bilong em i save tok bilas long em, long wanem, em i sotpela man. Wanpela sista i wok long wankain ofis olsem dispela man, oltaim em i mekim gutpela pasin rispek long em. Dispela i kirapim man long askim sista long i gat wanem as na em i gat narapela kain pasin. Sista i tok, em i mekim pasin rispek, long wanem, em i bihainim ol stiatok bilong Baibel long laip bilong em. Em i autim gutpela tok bilong Kingdom tu long dispela man. Man hia i kirap stadi long Baibel na bihain em i winim mak bilong kisim baptais. Taim em i go bek long kantri bilong em, ol wanblut bilong em i kirap nogut long gutpela pasin bilong em na sampela bilong ol i kam insait long tok i tru.
4 Long ples wok, long skul, o taim yumi bung wantaim ol wanblut na neiba, gutpela pasin bilong yumi, na wok bilong yumi long autim tok, inap kirapim ol narapela long litimapim nem bilong God.—Mt. 5:16.