Nupela Program Bilong Kibung Sekit

Ol man bilong dispela graun i laik bai yumi bilip olsem pasin bilong dispela graun bai stap oltaim oltaim. Tasol Baibel i no tok olsem. (1 Jo. 2:​15-17) Baibel i helpim yumi long save gut olsem wok bilong ‘bungim ol gutpela gutpela samting hia long graun’ em bai lus nating. Bilong strongim lain bilong God, kibung sekit bilong sevis yia bilong 2007 bai stori long, “Bungim Ol Gutpela Samting . . . Long Heven.”​—⁠Mt. 6:​19, 20.

Pasin bilong tingim mani kago samting i insait long samting em Efesus 2:2 (NW ) i kolim olsem “strong bilong win, em spirit i stap insait long bel bilong ol man i sakim tok.” Win i stap long olgeta hap na ol manmeri i wok long pulim dispela win, na olsem tasol “spirit bilong dispela graun” i stap long olgeta hap. (1 Ko. 2:12) Em inap tru long stiaim tingting bilong ol man, olsem na Baibel i tok dispela spirit i gat “strong.” Nupela program bilong kibung sekit bai helpim yumi long abrusim tingting bilong ol man bilong dispela graun long painim mani kago, na putim tingting i go stret long ol samting i bikpela samting tru. (Mt. 6:33) Na tu, dispela program bai helpim yumi long bilip na wetim Jehova taim yumi mekim yet wok bilong autim tok, maski wanem ol hatwok na hevi i painim yumi.

Yu mas pasim tok long bel olsem yu bai stap long kibung inap tupela de olgeta na bai yu putim yau na “holim strong long tingting” olgeta tok yu harim. (Hi. 2:⁠1) Raitim sampela sotpela tok long notbuk, em ol tok yu yet inap bihainim long i stap bilong yu na long wok autim tok bilong yu. Sapos yu stap long kibung kirap long stat bilong program na i go inap long pinis bilong en, dispela bai kirapim na strongim yu long wok yet long ‘bungim ol gutpela samting long heven’!