Famili i Bung Wantaim Bilong Lotuim Jehova
1 Long taim bilong ol man i bin raitim Baibel, famili olgeta i save mekim ol samting wantaim. Ol i mekim ol wok bilong haus, na bikpela samting moa famili olgeta i lotuim Jehova wantaim. (Wkp. 10:12-14; Lo 31:12) Long planti hap long nau, ol famili i no save mekim planti samting tumas wantaim. Tasol ol Kristen i luksave olsem em i bikpela samting long olgeta insait long famili i mekim ol samting wantaim, na moa yet long ol samting bilong lotu. Yumi save olsem Man i as bilong famili, em i mas amamas tru long lukim olgeta insait long famili i bung wantaim bilong lotuim em!
2 Autim Tok Wantaim: Sapos famili i wok wantaim long autim tok, dispela bai helpim ol long pas gut wantaim. Olsem na elda husat i save autim tok wantaim ol arapela insait long kongrigesen, em bai autim tok tu wantaim meri na ol pikinini bilong em. (1 Ti. 3:4, 5) Maski ol wasman raun i gat planti wok tru, ol i save makim taim bilong wok wantaim meri bilong ol long autim tok.
3 Ol papamama husat i save autim tok wantaim ol pikinini bilong ol, ol inap helpim ol long mekim gut dispela wok. Ol pikinini bai lukim amamas papamama i kisim long wok autim tok, na tu, ol bai luksave long pasin bilong papamama long laikim Jehova na ol arapela man. (Lo 6:5-7) Maski ol pikinini i bikpela, em i bikpela samting long papamama i mekim yet wok autim tok wantaim ol pikinini. Tupela marit i gat 3-pela pikinini man em ol i gat 15 i go 21 krismas, ol i save wok yet wantaim ol long autim tok. Papa i tok: “Long olgeta taim mipela i autim tok wantaim, mipela i save skulim ol long sampela samting. Mipela i mekim ol samting na bai dispela wok i strongim ol na i givim amamas long ol.”
4 Redim Ol Samting Wantaim: Planti famili i pilim olsem taim ol i redim ol samting bilong autim tok wantaim, dispela i save helpim ol. Ol pikinini i save amamas long mekim traim pasin bilong autim tok wantaim ol narapela long famili o long i stap olsem man bilong haus. Sampela famili i save lusim sampela minit long pinis bilong famili stadi bilong mekim olsem.
5 Yumi save kisim bikpela amamas moa taim yumi insait long ol bikpela wok na yumi mekim wantaim ol man yumi laikim. Taim olgeta long famili i wok wantaim long autim tok long ol haus na mekim ol gobek na Baibel stadi, ol i save kisim bikpela amamas! Olsem na taim yu na famili bilong yu i lotuim Jehova, yu inap tokaut olsem: “Mi wantaim famili bilong mi, mipela bai i lotu long Bikpela tasol.”—Jos. 24:15.