Helpim Ol Rabisman Long Wetim Gutpela Samting
1 Jisas i tingim tru ol man i stap rabis. Sampela taim em i wokim mirakel na givim kaikai samting long ol man na oraitim sik bilong ol, tasol bikpela wok bilong em i bilong autim “gutnius” long ol rabisman. (Mt. 11:5) Wok autim tok bilong ol Kristen i wok yet long helpim ol rabisman na ol arapela man tu.—Mt. 24:14; 28:19, 20.
2 Samting Tru Bilong Wetim: Planti taim ol pris pasto bilong Kristendom i tok promis long ol rabisman olsem ol bai kisim gutpela sindaun sapos ol i givim planti mani long lotu. Tasol Baibel i tok Kingdom Bilong God tasol bai pinisim hevi bilong stap rabis na stretim olgeta hevi bilong ol man. (Sng. 9:18; 145:16; Ais. 65:21-23) Taim yumi helpim ol rabisman long save long tok i tru bilong Baibel, yumi helpim ol long wetim gutpela samting na long save long God na lotuim em.—Mt. 5:3.
3 Ol Farisi long taim bilong Jisas ol i ting ol rabisman i samting nating, na ol i kolim ol olsem ‘am-ha·’aʹrets, o “ol manmeri bilong graun.” Tasol Jisas i “save laikim ol tumas.” (Sng. 72:13, 14) Yumi ken bihainim pasin bilong Jisas na “mekim gut” long ol rabisman long rot bilong tingim ol tru na pilim hevi bilong ol. (Snd. 14:31) Yumi no laik mekim tok i daunim ol man i sindaun long ol pipia haus o les long autim tok long ol. Nogat. Planti man husat i save harim na bihainim tok bilong Kingdom em ol man i stap rabis.
4 Helpim Ol Nau: Taim yumi lainim ol rabisman long ol stiatok bilong Baibel, dispela i helpim ol long nau na ol i no stap rabis olgeta. Olsem, Baibel i tambuim pasin bilong spak, pilai laki, lespasin, smok, na ol narapela pasin i save pinisim mani bilong man. (Snd. 6:10, 11; 23:21; 2 Ko. 7:1; Ef. 5:5) Baibel i strongim ol man long stap stret na wok strong, em ol pasin ol bos i laik bai ol wokman i gat. (Kl. 3:22, 23; Hi. 13:18) Wanpela lain i givim askim long ol bos, na planti ol i tok taim ol man i kam painim wok, ol i laikim ol man i gat stretpela pasin.
5 Jehova i save tingim tru hevi bilong ol rabisman. Klostu nau Jisas Krais bai helpim “ol rabisman i singaut long em.” (Sng. 72:12) I go inap long dispela taim, yumi gat gutpela wok bilong mekim gut bel bilong ol narapela, ol rabisman tu, long rot bilong autim tok bilong Baibel i helpim ol long wetim gutpela samting.