Ol Magasin Bilong Yumi i Bilong Helpim Olgeta Kain Man
1. Olsem wanem gutpela wokboi i gat savetingting i bihainim pasin bilong aposel Pol?
1 Aposel Pol i bin bihainim kain kain pasin long autim gutnius bambai em inap kisim bek “olgeta kain man,” na olsem tasol, gutpela wokboi i gat savetingting i yusim ol magasin bilong yumi long bringim gutnius i go long ol manmeri bilong kain kain sindaun na kain kain bilip. (1 Kor. 9:22, 23) Bilong mekim gutpela wok long ol Wastaua na Kirap! yumi mas tingim ol man em ol dispela magasin bai i stret long ol.
2. Ol tok bilong nius Kirap! i bilong helpim wanem kain lain?
2 Kirap!: Dispela nius i bilong helpim ol manmeri em ol i kain olsem “ol man bilong Atens” em aposel Pol i bin autim tok long ol. (Apo. 17:22) Ol dispela man i bilong ol lain em ol i no gat nem Kristen, na ol i no save long ol tok bilong Baibel. Olsem tasol, nius Kirap! i bilong helpim ol man em ol i no save tumas long Baibel o ol i no gat save liklik long Baibel. Ating ol i no save liklik long ol bilip Kristen, o ol i no trastim ol lotu, o ol i no save olsem ol tok bilong Baibel inap helpim ol man. Namba wan wok bilong Kirap! em bilong helpim ol man long save olsem God em wanpela man i stap tru. Na tu, narapela wok bilong dispela nius em bilong helpim ol man long bilip long tok bilong Baibel na helpim ol long kliagut olsem ol Witnes Bilong Jehova ol i narapela kain long ol narapela lotu.
3. Wastaua bilong pablik i bilong helpim wanem lain? Na Wastaua bilong stadi i bilong helpim wanem lain?
3 Wastaua: Wastaua bilong pablik i bilong helpim ol lain em ol i bilip long God na rispektim tok bilong Baibel. Ol i save long sampela tok bilong Baibel, tasol ol i no gat stretpela save long tok i tru bilong Baibel. Ol i wankain olsem ol lain em Pol i tok ol i “pret long God.” (Apo. 13:14-16) Wastaua bilong stadi i bilong ol Witnes Bilong Jehova. Aposel Pol i save olsem ol lain i ritim ol pas bilong em ol i save long tok bilong Baibel na ol i gat stretpela save long tok i tru. (1 Kor. 1:1, 2) Ol stori ol i raitim insait long Wastaua bilong stadi i bilong ol man i save kam long ol miting bilong yumi na ol i save long ol tok tiokratik.
4. Bilong wanem yumi mas save gut long olgeta stori i stap insait long nius Wastaua na Kirap!?
4 Taim yumi tilim ol nius, yumi save stori long Wastaua tasol o Kirap! tasol, na taim yumi tilim long man, yumi save tilim tupela nius wantaim. Olsem na yumi mas putim mak long ritim na save gut long ol stori i stap insait long Wastaua na Kirap! Taim yumi mekim olsem, yumi bai save gut long wanem stori yumi ken kamapim long ol man yumi bungim.