Tilim Kingdom Nius Namba 38 Long Novemba!
1. Ol man i gat wanem ol askim long ol man i dai pinis? Olsem wanem bai yumi bekim ol dispela askim long Novemba?
1 Dai em i wanpela birua i save painim yumi olgeta, maski yumi gat wanem kain bilip. (1 Kor. 15:26) Planti man i laik save ol man i dai pinis ol i stap we, na ol bai lukim ol gen o nogat. Olsem na insait long wanpela mun, ol kongrigesen long olgeta hap bilong graun bai insait long wok bilong tilim Kingdom Nius Namba 38, nem bilong en Tru Tru Ol Man i Dai Pinis Inap Stap Laip Gen? Dispela spesel wok bai kirap long Novemba 1. Taim dispela wok i pinis, bai yumi mekim wok long dispela nius long taim bilong autim tok wankain olsem ol narapela liklik nius.
2. Stori long wei ol i wokim Kingdom Nius Namba 38.
2 Wei Ol i Wokim: Ol i wokim Kingdom Nius Namba 38 long wei em yumi inap foldim na bai het tok na ol dispela tok “Bai yu tok . . . yes? nogat? ating?,” bai i stap long fran na man inap lukim. Taim man i opim Kingdom Nius, em bai lukim tok bilong Baibel i bekim dispela askim i stap olsem het tok, na ol tok promis bilong Baibel we inap helpim em. Em bai luksave long ol risen na dispela bai helpim em long bilip long Baibel. Long baksait bilong Kingdom Nius i gat wanpela askim we bai kirapim tingting bilong em, na yu ken tokim em olsem i gat rot bilong kisim sampela save moa.
3. Bai yumi mekim wanem bilong tilim Kingdom Nius Namba 38?
3 Wok Bilong Tilim: Wok bilong tilim Kingdom Nius bai wankain long wok bilong tilim invatesen pepa bilong Memorial na bilong kibung distrik. Ol elda bai stretim rot long olsem wanem bai kongrigesen inapim ol teritori bilong ol, na samting ol i mekim i stret wantaim tok long pas bilong Epril 1, 2013. Ol kongrigesen i no gat bikpela teritori i ken helpim ol kongrigesen i stap klostu em ol i gat bikpela teritori. Taim yumi kisim Kingdom Nius Namba 38 bilong tilim, yumi mas kisim inap bilong tilim long wanpela wik. Taim yumi pinisim pinis olgeta teritori, yumi ken tilim tu long ol pablik ples. Sapos yumi tilim pinis olgeta Kingdom Nius paslain long mun i pinis, yumi ken tilim ol samting bilong tilim long dispela mun. Long namba 1 Sarere bilong Novemba, bai yumi mekim dispela spesel wok na yumi no mekim wok bilong kirapim ol Baibel stadi. Long ol wiken, yumi mas tilim tu ol magasin sapos i stret long mekim. Olsem wanem? Yu stretim rot pinis long insait long dispela spesel wok?