Askim Bilong Ol Rida

Ol tempel polis bilong Juda ol i husat? Wanem wok bilong ol?

Sampela Livai i no insait long lain pris, na wanpela wok bilong ol i olsem wok bilong polis. Kepten bilong tempel i bosim ol. Filo em wanpela saveman bilong Juda, na em i stori long wok bilong ol dispela ofisa olsem: “Sampela bilong ol [Livai] i save sanap long dua olsem wasman bilong geit, sampela i save sanap insait [long tempel eria] long fran bilong tempel bilong stopim ol man husat i laik go insait long laik bilong ol yet o ol i popaia na go insait. Sampela i save senis senis long wok long san na nait long was long tempel.”

Sanhedrin inap askim ol dispela polis long helpim ol. Gavman bilong Rom i tok orait long ol dispela polis tasol long karim ol samting bilong pait.

Saveman Joachim Jeremias i tok: “Ol tok Jisas i mekim long taim ol ofisa i kam arestim em olsem wai na ol i no arestim em taim em i save stap long Tempel na skulim ol man (Mat. 26:55), i soim klia olsem ol polis bilong Tempel i bin arestim em.” Dispela saveman i tok ol man i go arestim Jisas paslain long dispela, em ol polis bilong tempel. (Jon 7:32, 45, 46) Bihain, Sanhedrin i salim ol ofisa wantaim kepten bilong ol i go bilong bringim ol disaipel bilong Jisas i kam, na ating ol dispela polis tasol i bin holim Pol na pulim em i go ausait long tempel.—Apo. 4:1-3; 5:17-27; 21:27-30.