Jisas Bai Pinisim Pasin Bikhet

Jisas i save long hevi man i karim long taim i gat pasin bikhet na pasin i no fea. Maski em i no mekim rong, ol i sutim nating tok long em, paitim em maski em i no brukim lo, kotim, arestim, na givim em bikpela pen na kilim em i dai. Em i no mekim wanpela rong, tasol em i redi long daunim laik bilong em na “givim laip bilong em olsem pe bilong baim bek planti manmeri.” (Matyu 20:28; Jon 15:13) Nau, olsem King bilong Kingdom Bilong God, klostu nau bai em i kamapim pasin fea long olgeta hap bilong graun, na pinisim tru pasin bikhet.​—Aisaia 42:3.

Baibel i stori long laip bai wanem kain bihain long taim Jisas i mekim ol dispela samting:

• “Bai ol man nogut i no stap moa; yu bai painim ol long ples bilong ol, tasol bai yu no inap lukim ol. Tasol ol man i gat pasin daun, ol bai kisim graun olgeta, na ol bai i stap bel isi tru na dispela bai mekim ol i stap amamas moa yet.”​—Buk Song 37:10, 11.

Yumi inap mekim wanem bilong soim tenkyu bilong yumi long olgeta samting Jisas i mekim pinis na ol samting em bai mekim long helpim yumi? Wanpela rot yumi ken mekim olsem em long kisim sampela save moa long “gutnius bilong Kingdom Bilong God,” em dispela gutnius Jisas i bin autim tok long en long ol manmeri. (Luk 4:43) Ritim dispela atikol “What is the Kingdom of God?”