Askim
Namba Wan King 8:8 i tok man i sanap long Rum Tambu em inap lukim tupela stik bilong karim Bokis Kontrak, olsem na tupela stik i stap olsem wanem?
Taim Jehova i givim piksa long Moses bilong wokim haus lotu sel long ples nating, wanpela bikpela samting bilong en, em Bokis Kontrak. Insait long dispela Bokis ol i bin karamapim long gol, i gat tupela plet ston bilong Lo na sampela samting moa. Bokis i stap insait long Rum Tambu Tru. Long ai bilong Bokis i gat piksa bilong tupela ensel serap ol i bin wokim long gol na wing bilong tupela i op i stap. Long tupela sait bilong Bokis i gat ol ring bilong putim tupela stik ol i bin wokim long diwai akas na karamapim long gol na i bilong karim Bokis. Tupela stik i go insait long ol ring ol i stap long sait sait bilong Bokis. Pes bilong haus lotu sel i lukluk i go long hap is, olsem na taim ol i putim Bokis long Rum Tambu Tru, arere bilong ol stik i lukluk i go long hap not na long hap saut. Na i wankain tu long bihain, taim Bokis i stap long tempel Solomon i wokim.—Kisim Bek 25:10-22; 37:4-9; 40:17-21.a
Ol i hangamapim bikpela laplap olsem banis namel long Rum Tambu Tru na Rum Tambu. Ol pris i sanap long Rum Tambu ol i no inap lukluk i go insait long Rum Tambu Tru na lukim Bokis Kontrak, em God i save kamap antap long en. (Hibru 9:1-7) Olsem na ating yu paul liklik long tok bilong 1 King 8:8: “Tupela stik i longpela tru, na sapos man i sanap long Rum Tambu, em inap lukim arere bilong tupela stik. Tasol sapos man i sanap ausait long dispela rum, em i no inap lukim.” Wankain tok i stap long 2 Stori 5:9. Orait olsem wanem na man i sanap long Rum Tambu long tempel em inap lukim ol stik?
Sampela i bin ting olsem, ol stik i holim laplap na dispela i kamapim ol mak long laplap em ol man inap lukim. Tasol sapos ol stik i lukluk i go long hap not na long hap saut, ol i no inap holim laplap na mekim olsem, a? (Namba 3:38) Na i gat narapela tingting: Sapos i gat liklik spes i stap namel long arere bilong laplap na banis bilong tempel, o long taim hetpris i mas i go insait long Rum Tambu Tru, ating ol man inap lukim ol stik. Laplap i haitim Bokis Kontrak yet, tasol sapos i gat hap spes i stap, orait ol man inap lukim arere bilong ol stik, em ol i longpela, winim longpela bilong bokis. Ating dispela tok i stret, tasol yumi no ken strong long tok olsem.
Tru tumas, i gat planti liklik liklik samting em yumi no save yet long en. Aposel Pol i kolim sampela long pas em i raitim long ol Hibru. Bihain em i tok: “Nau mi no inap kamapim as bilong dispela olgeta samting.” (Hibru 9:5) Bihain, taim ol bilipman i kirap bek long matmat, ating bai yumi inap kisim sampela save moa long rot bilong ol man olsem Moses, Aron, Besalel, na sampela moa em ol yet i bin lukim dispela haus lotu sel na ol i save gut long ol samting bilong en.—Kisim Bek 36:1.
[Futnot]
a Ol i no ken kamautim tupela stik long ol ring, maski Bokis i stap long ples bilong en insait long haus lotu sel. Olsem na ol i no inap kisim ol dispela stik na mekim narapela kain wok long ol. Na i no gat wok long holim Bokis—tasol sapos ol i bin kamautim ol stik long ol ring, orait taim ol i mas kisim Bokis i go long narapela hap, nau bai i gat wok long holim dispela Bokis holi bambai ol inap putim ol stik i go insait gen long ol ring bilong karim Bokis i go. Taim Namba 4:6 i tok long ‘putim tupela stik insait long ol ring,’ ating dispela i makim pasin bilong stretim ol stik taim ol i laik redi long karim dispela hevipela bokis i go long narapela hap bilong wokim kem long en.