Askim

Disaipel Jems i tok: “Nogut planti man namel long yupela i kisim wok bilong skulim ol manmeri long pasin God i laikim. Long wanem, taim God i skelim pasin bilong ol manmeri, em bai i glasim gut tru wok bilong yumi ol man i gat wok bilong skulim ol manmeri.” (Jems 3:⁠1) Wanem insait bilong dispela tok bilong em?

Jems i no laik pasim ol Kristen na bai ol i no ken skulim ol man long tok i tru. Long Matyu 28:​19, 20, Jisas i tokim ol disaipel: “Yupela i mas i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.” Olsem na olgeta Kristen i mas mekim wok bilong skulim ol man. Aposel Pol i givim strongpela tok long ol Kristen Hibru, long wanem, ol i no mekim yet wok bilong skulim ol man. Em i tok: “Yupela i kamap Kristen longpela taim pinis, na inap yupela i wok long skulim ol arapela long ol tok bilong God. Tasol nogat. Yupela i sot long tingting, na ol arapela man i mas skulim yupela gen long ol namba wan hap tru bilong tok bilong God.”​—⁠Hibru 5:⁠12.

Orait, Jems i toktok long wanem samting? Em i toktok long ol brata i gat wok long skulim ol manmeri insait long kongrigesen. Efesus 4:​11 i tok: “Em tasol [Krais Jisas, em Het bilong kongrigesen] i givim ol presen olsem. Long sampela man em i givim wok aposel. Na long sampela em i givim wok profet. Na long sampela em i givim wok bilong autim gutnius long ol manmeri. Na long sampela em i givim wok pasto [olsem wok wasman] na wok bilong skulim ol manmeri.” Long taim bilong ol aposel tu, sampela i kisim bikpela wok bilong skulim ol manmeri insait long ol kongrigesen. Long nau, Lain Bilong Bosim Ol Witnes em maus bilong dispela “wokboi i gat gutpela tingting na save,” na ol i gat bikpela wok bilong bosim wok bilong skulim lain bilong God i stap long olgeta hap bilong graun. (Matyu 24:45) Ol wasman bilong raun na ol elda bilong kongrigesen ol tu i gat bikpela wok bilong skulim lain bilong God.

Olsem wanem? Ol man Kristen i winim mak bilong skulim lain bilong God, ating Jems i tokim ol long ol i no ken kisim wok bilong skulim man, nogut God bai glasim gut wok bilong ol taim em i skelim ol manmeri long kot? Nogat. Jems i no tok olsem. Wok elda em i wanpela gutpela wok tru man inap kisim, olsem 1 Timoti 3:1 i tok: “Sapos man i laik i stap wasman bilong sios, em i laikim gutpela wok.” Wanpela mak em Kristen i mas winim bilong kamap elda long kongrigesen, em “i mas save gut long pasin bilong skulim ol manmeri.” (1 Timoti 3:⁠2) Jems i no daunim tok bilong Pol em spirit holi i kirapim em long raitim.

Tasol ating sampela long taim bilong ol aposel ol i bin makim ol yet long kisim wok bilong skulim lain bilong God, tasol ol i no winim mak bilong mekim dispela wok, na lain bilong bosim ol Kristen i no bin makim ol. Ating ol i bin ting ol bai kisim biknem long dispela wok, na ol i laik bai ol man i litimapim nem bilong ol. (Skelim wantaim Mak 12:​38-40; 1 Timoti 5:17.) Aposel Jon i kolim nem bilong Diotrefes, ‘em i laik i stap namba wan bilong ol, na em i no save harim tok bilong Jon.’ (3 Jon 9) Namba Wan Timoti 1:7 i toktok long sampela man “ol i laik skulim ol arapela long lo bilong God . . . tasol ol yet ol i no save long as bilong tok ol i autim, na ol i no klia gut long toktok bilong ol yet.” Tok bilong Jems 3:1 i stret tru long ol man i laik kisim wok bilong skulim lain bilong God, tasol ol i gat tingting i no stret na ol i laik kisim dispela wok. Ol kain man olsem ol inap bagarapim lain bilong God, na taim God i skelim ol manmeri long kot, em bai “glasim” ol moa yet.​—⁠Rom 2:​17-21; 14:⁠12.

Na tok bilong Jems 3:1 i gutpela tu bilong kirapim gen tingting bilong ol man ol i winim pinis mak na ol i mekim wok bilong skulim lain bilong God. Ol i bin kisim bikpela wok, olsem na ol i mas mekim bikpela wok. (Luk 12:48) “Long de God i makim bilong kotim ol manmeri, em bai i tingting long olgeta toktok nabaut ol manmeri i bin mekim na em bai i skelim ol.” (Matyu 12:36) Dispela tok i sutim tru ol elda, em tok bilong ol i gat strong long stiaim ol manmeri.

Jehova bai skelim pasin ol elda i mekim long lain sipsip bilong em. (Hibru 13:17) Ol tok ol i mekim inap helpim o bagarapim laip bilong man. Olsem na elda i mas was gut, nogut em i strong long kamapim ol tingting bilong em yet na bai ol tu i kisim dispela tingting, o em i mekim nogut long ol sipsip olsem ol Farisi i bin mekim. Em i mas laikim ol tru olsem Jisas i bin mekim. Taim elda i skulim lain bilong God, na taim em i insait long wok bilong harim kot, em i mas tingting gut na skelim olgeta tok em i laik mekim, na em i no ken toktok nabaut o kamapim ol tingting bilong em yet. Sapos wasman i larim Jehova na tok bilong em long Baibel, na oganaisesen bilong Jehova, i stiaim em, em bai kisim bikpela blesing moa long God, na bai God i no ken mekim strongpela kot long em taim em i skelim ol manmeri long kot.