Skul Gileat i Salim Ol Misineri “i Go Inap Long Olgeta Hap Bilong Graun”
WINIM 50 yia pinis, Wastaua Baibel Skul Bilong Gileat i bin salim ol misineri i go long ol narapela narapela hap. Long Septemba 11, 1999, ol sumatin bilong klas namba 107 bilong Skul Gileat i winim skul. Dispela klas i gat 48 sumatin na ol i bilong 11-pela kantri, na Sosaiti i makim ol long i go mekim wok long 24 narapela narapela kantri. Ol bai wok wantaim ol narapela misineri em ol i bin mekim bikpela wok bilong truim laspela tok Jisas i bin mekim paslain long em i go long heven. Em i bin tok profet olsem ol disaipel bilong em “bai i autim tok bilong [em] . . . i go inap long olgeta hap bilong graun.”—Aposel 1:8.
Program bilong bung bilong winim skul i bin kamap long Wastaua Edukesen Senta long Patesen, Nu Yok. Dispela bung i wanpela gutpela bung tru na ol i wokim long hap i gat ol naispela diwai na purpur samting. Ol sumatin i winim skul ol i amamas tru, long wanem, ol wanblut, ol pren tru bilong ol, na ol man ol i bin singautim—ol i kam bung. Namba bilong ol man i bin bung bilong harim tok na ol man i bin lukim tok long rot bilong video long Bruklin na Wolkil em inap olsem 4,992.
Mekim Gut Wok Bilong Jehova na Man i Sindaun Klostu Long Yu
“Husat Man i Laik Bihainim Jehova?” Em nem bilong tok bilong kirapim program, em Carey Barber i mekim. Em wanpela bilong Lain Bilong Bosim Ol Witnes na em i siaman bilong program bilong winim skul. Em i tok olsem dispela em i wanpela bikpela tok ol lain Israel long taim bilong Moses i mas tingim gut. Em i tokim ol sumatin i winim skul na ol man i kam bung olsem planti Israel i bin dai long ples wesan nating, long wanem, ol i no bin stap gut long Jehova na bihainim em. Taim ol i lotuim pinis dispela imis gol, orait “ol i sindaun long kaikai na dring, na bihain ol man i go pilai long ol meri.” (Kisim Bek 32:1-29) Jisas i tokim ol Kristen long was gut long wankain samting, olsem: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol.”—Luk 21:34-36.
Narapela man i mekim tok em Gene Smalley, em i bilong Dipatmen Bilong Raitim Tok, na em i askim ol sumatin: “Olsem wanem? Yupela Inap Kamapim Tru Olsem Yupela i Man Bilong Mekim Gut Bel Bilong Man?” Em i tok dispela tok Grik pa·re·go·riʹa ol i kisim na mekim wok long en long tok Inglis bilong givim nem long wanpela marasin bilong pinisim pen. Tasol aposel Pol i mekim wok long dispela tok Grik long Kolosi 4:11 bilong stori long pasin bilong ol wanwok bilong em. Ol i tanim dispela tok long Baibel olsem “helpim.”
Long ples wok bilong ol, ol dispela misineri i winim skul i ken kamap olsem gutpela helpim tru long nau sapos ol i daunim ol yet na kamap olsem man bilong helpim gut ol brata na sista long hap ol i go wok long en na wok gut wantaim na laikim ol wanwok misineri.
Bihain Daniel Sydlik, em wanpela bilong Lain Bilong Bosim Ol Witnes, em i toktok long “Bikpela Lo Ol Kristen i Mas Bihainim.” Em i stori olsem dispela lo Jisas i kolim long Matyu 7:12, i tok “olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol,” dispela tok i no makim tasol olsem yumi no ken mekim nogut long ol narapela na em tasol, nogat; yumi mas mekim ol gutpela pasin long ol narapela.
Bilong bihainim gut dispela tok, i gat 3-pela samting ol i mas tingim: Ai bilong ol i mas lukim ol samting, bel bilong ol i mas pilim hevi bilong ol man, na ol i mas i gat laik long helpim ol man. Em i pinisim tok olsem: “Sapos yumi pilim olsem yumi gat laik long helpim ol man, orait kwiktaim yumi mas mekim. Yumi mas wok strong long helpim ol narapela man olsem yumi laik bai ol i mas mekim long yumi.” Ol misineri i mas mekim moa yet dispela samting taim ol i go mekim wok long narapela kantri bambai ol i ken helpim ol man long bihainim lotu Kristen tru.
Ol Tisa i Givim Gutpela Tok Bilong Tingim Gen
Karl Adams em i tisa bilong Skul Gileat, na em i strongim ol misineri i winim skul long “Wok Yet Long Kamap Strong.” Kamap strong long wanem samting? Namba wan, ol i mas kamap strong long save na mekim gut wok long dispela save. Long Skul Gileat, ol sumatin i bin lain long pasin bilong skelim gut ol stori bilong Baibel bambai ol i ken save long sampela samting moa bilong dispela stori. Ol tisa i bin kirapim ol sumatin long tingim olsem wanem ol wan wan stori i ken helpim ol. Em i kirapim ol long mekim yet dispela pasin.
Brata Adams i tok: “Namba tu samting, wok yet long mekim pasin sori na mekim i kamap strong moa. Pasin sori em wanpela samting em inap kamap bikpela taim yumi wok long mekim. Taim yumi no mekim pasin sori, dispela pasin inap pinis.” (Filipai 1:9) Nau ol i kamap misineri na sindaun bilong ol bai senis, olsem na ol i mas kisim moa yet pasin bilong laikim ol narapela. Na namba tri: “Yupela i mas larim marimari bilong Krais i strongim yupela, na yupela i mas kisim planti save moa long em.” (2 Pita 3:18) Brata i tok: “Dispela em nambawan gutpela pasin marimari Jehova i bin mekim long yumi long rot bilong Pikinini bilong em. Taim yumi pilim tru dispela pasin marimari, yumi amamas tru long mekim laik bilong God na yumi mekim ol wok em i givim yumi long mekim.”
Narapela tisa bilong Skul Gileat, em Mark Noumair, em i toktok long “Maski Wanem Wanem Samting i Painim Yu, Mekim Pasin Sori, na Bai Yu Inap Stap Strong.” Em i tokim ol: “Lain long karim ol hevi bai painim yu long mekim wok misineri na mekim long pasin sori, na bai yu inap mekim. Ol man i laikim Jehova, ol tasol em i save stretim ol. Maski yu pilim olsem sampela tok ol i givim long yu i no stret, o yu ting ol i sutim tok long yu, o ol i no mekim pasin i stret long yu, tasol pasin bilong laikim Jehova na pasin bilong yu long pas gut wantaim Jehova bai helpim yu long stap strong na karim dispela hevi.”
Brata Noumair i tok olsem wok misineri i gat planti wok bilong en. “Tasol sapos yu mekim tasol na yu no laikim tru ol narapela, yu bai no amamas. Sapos yu no laikim ol narapela, yu no inap amamas long mekim ol wok bilong yu long haus olsem wok bilong kukim kaikai, baim samting long stua, wasim ol prut, na boilim wara. Yu mas askim yu yet olsem, ‘Bilong wanem mi mekim ol dispela samting?’ Em nau, sapos yu tok olsem, ‘Hatwok mi mekim i helpim ol narapela na ol i no ken kisim sik, na em i mekim ol wanwok misineri bilong mi i amamas,’ orait yu bai i no hatwok long mekim dispela wok.” Brata Noumair i tok: “Ating ol i mas givim tok long yu bilong stretim yu na yu mas orait long en, o yu mas inapim wok bilong yu long wok misineri, o yu mas stretim ol hevi, orait sapos yu mekim long pasin sori, dispela bai helpim yu long karim hevi na mekim yet wok bilong yu. ‘Dispela pasin bilong givim bel bilong yumi long ol arapela, em i no inap pinis.’ ”—1 Korin 13:8.
Bihain Wallace Liverance, em tisa bilong Skul Gileat, em i lukautim wanpela liklik pilai bilong sampela gutpela samting i painim ol sumatin taim ol i wok wantaim ol kongrigesen ol i go long en taim ol i stap long skul. Ol i go autim tok long ol haus, na tu, ol i mekim wok long skul ol i kisim long wok misineri na ol i autim tok long ol ples ol draiva bilong ol trak i save malolo na kisim kaikai samting, na long ples bilong wasim klos, long ples bilong kisim tren, na long ol narapela ples.
Ol Olpela Misineri i Strongim Ol
Olsem wanem? Taim ol nupela misineri i go long ol narapela kantri, i gat as na ol i mas tingting strong? Ol inap winim hatwok bilong mekim wok long narapela kantri? Ol brens-ofis i save mekim wanem bilong helpim ol nupela misineri na bai wok bilong ol i ken kamap gutpela? Bilong bekim ol dispela askim na ol narapela askim, Steven Lett bilong Dipatmen Bilong Wok Autim Tok na David Splane bilong Dipatmen Bilong Raitim Tok i toktok wantaim ol brata i bin kam bilong skul long lukautim brens. Ol dispela brata ol i kam long skul bilong brens long Wastaua Edukesen Senta. Ol i wok long komiti bilong brens long Spen, Hong Kong, Laibiria, Benin, Madagaska, Brasil, na Japan.
Ol dispela wokman bilong Jehova i bin mekim wok longpela taim na planti bilong ol i bin mekim wok olsem misineri inap planti yia, ol i strongim ol sumatin i winim skul, na ol i strongim tu ol papamama na wanblut bilong ol i bung. Ol hevi i bin painim ol dispela brata na ol narapela wanwok misineri, olsem na ol i tok olsem ol misineri inap karim ol dispela hevi. Raimo Kuokkanen em i wanpela misineri bilong Madagaska, na em i tok: “Ol hevi ol misineri i kisim ating em bai i bikpela, tasol ol inap stretim dispela hevi, na Sosaiti i save helpim yumi.” Östen Gustavsson i mekim wok long Brasil long nau, na em i tok: “Mipela yet i no bin makim dispela wok mipela mekim, nogat; mipela i bin kisim dispela wok. Olsem na mipela i wok strong long mekim yet dispela wok.” James Linton i save mekim wok long Japan, na em i tok wanpela samting i bin helpim em i olsem “em i lukim ol brata i wok misineri ol i mekim yet dispela wok.” Wok misineri em i wanpela gutpela rot bilong kisim amamas long mekim wok bilong Jehova na lukautim ol sipsip bilong em.
Abrusim Ol Hevi Em Inap Daunim Yu Long Ol Samting Bilong Spirit
Theodore Jaracz, em wanpela bilong Lain Bilong Bosim Ol Witnes, em i bin skul long klas namba 7 long Skul Gileat long 1946. Em i mekim laspela tok, nem bilong en “Hatwok Bilong Stap Strong Long Ol Samting Bilong Spirit.” Pastaim em i stori long ol pasin nogut tru i wok long kamap long narapela narapela hap bilong graun, tasol em i tok olsem i gat sampela bikpela hevi i nogut moa yet na i wok long painim ol man.
Brata Jaracz i stori long Song 91, na em i kolim “bikpela sik” na “samting nogut” i bin mekim na planti milion manmeri long olgeta hap ol i gat sik na ol i dai long ol samting bilong spirit. Satan na ol spirit nogut bilong em i giaman na mekim wok long ol samting i kain olsem sik, em kain kain save giaman em ol save bilong graun na ol samting bilong skin i as bilong en, bambai em inap mekim yumi i slek na kilim yumi i dai long ol samting bilong spirit, tasol Jehova i strongim yumi olsem ol dispela hevi bai i no inap daunim “man i go long God Antap Tru, bilong God i ken lukautim em.”— Song 91:1-7.
Brata Jaracz i tok: “Hatwok yumi mas winim, em yumi mas stap strong long bilip; yumi mas stap long ples em Jehova i ken lukautim yumi. Yumi no ken stap olsem ol man bilong tok bilas em ol i no tingim ol samting bilong spirit. Dispela em wanpela hevi i save painim yumi long nau. Em dispela hevi i save painim yumi olgeta insait long oganaisesen. Na dispela hevi em inap painim yupela tu long wok misineri bilong yupela.” (Jut 18, 19) Tasol em i tokim ol nupela misineri i winim skul olsem ol inap stap strong long ol samting bilong spirit long wok misineri bilong ol. Em i tokim ol long tingting long olsem wanem ol brata bilong yumi long Rasia, long Esia, na long ol kantri long Afrika i karim ol hevi, maski i gat tambu long wok bilong ol, na ol i biruaim ol nogut tru, na tok bilas long ol, na ol man i giaman na tok olsem ol Witnes i no bilip long God, na ol i sutim ol tok giaman long ol. Na planti taim ol hevi bilong skin tu i painim ol. Ol dispela hevi i kamap long taim wanpela lain i pait long narapela lain na ol brata i sot long ol samting ol i mas kisim bilong helpim ol long stap laip.
Taim yumi slek long ol samting bilong spirit, “em i bikpela samting long painim as bilong dispela hevi na mekim wok long tok bilong Baibel na stretim.” Em i kolim ol stori bilong ol man long Baibel. Jehova i tokim Josua long kaunim Lo long olgeta de. (Josua 1:8) Taim ol i painim Buk Lo long taim bilong Josaia na ol i bihainim ol tok bilong en ol i kaunim, Jehova i blesim ol. (2 King 23:2, 3) Timoti i bin kisim save long buk i gat tok bilong God kirap long taim em i liklik yet. (2 Timoti 3:14, 15) Ol Beria i lain bilong harim tok; na tu, ol i “gutpela lain,” long wanem, ol i save skelim tok bilong Baibel long olgeta de. (Aposel 17:10, 11) Wanpela man i save moa yet long Tok Bilong God na i save mekim wok long en, em Krais Jisas, na em i nambawan gutpela piksa.—Matyu 4:1-11.
Bilong pinisim tok, Brata Jaracz i givim gutpela tok long ol nupela misineri olsem: “Nau yupela i redi long mekim wok misineri. Na yupela bai i go mekim wok long ol narapela kantri, na tru, yupela bai i go long planti hap bilong graun. Sapos yumi winim ol hevi na hatwok na yumi stap laip long ol samting bilong spirit, orait yumi bai sakim ol samting i laik pasim yumi long mekim wok yumi bin pasim tok long mekim. Yupela bai givim bel long autim tok, na kirapim ol narapela long bihainim pasin bilong bilip bilong yupela, na mipela bai beten wantaim yupela na bai ol dispela man yupela i skulim ol, Jehova bai mekim ol i kamap laip gen long ol samting bilong spirit olsem em i bin mekim long yumi. Na bai planti man moa i lusim bagarap bilong spirit i wok long kamap long graun long nau. Ol bai bung wantaim yumi na namba bilong ol man bilong mekim laik bilong Jehova bai i go bikpela. Na Jehova i ken mekim gut long yupela na bai yupela inap helpim ol long mekim olsem.”
Siaman i kaunim ol tok ol i salim i kam long ol narapela narapela kantri long graun bilong tok gude long ol sumatin, na bihain em taim bilong ol sumatin i winim skul ol i kisim pepa setifiket bilong ol. Na bihain ol i kaunim wanpela gutpela pas ol sumatin i bin raitim bilong tok tenkyu. Ol sumatin i amamas tru long Jehova na oganaisesen bilong em long ol i bin kisim gutpela skul, na ol i amamas tu long ol bai i go mekim wok misineri long “olgeta hap bilong graun”!—Aposel 1:8.
[Blok long pes 29]
Ol Samting Bilong Ol Sumatin
Hamas kantri ol i kam long en: 11
Hamas kantri ol bai go long en: 24
Hamas sumatin: 48
Hamas ol i marit: 48
Krismas bilong ol, averes: 34
Hamas yia long tok i tru, averes: 17
Hamas yia long wok painia, averes: 12
[Piksa long pes 26]
Klas Namba 107 i Winim Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 8 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.