Mi Lain Long Wetim Jehova i Helpim Mi
EM STORI BILONG JÁN KORPA-ONDO
Em yia 1942, na long wanpela hap klostu long Kursk, long Rasia, ol soldia bilong Hangari i was long mi. Mipela i stap ol kalabus bilong ol lain i pait long Rasia long taim bilong Namba Tu Pait. Ol i digim pinis matmat bilong mi, na ol i givim 10-pela minit long mi long skelim bai mi sainim wanpela pepa i tok mi no stap moa olsem wanpela Witnes Bilong Jehova o nogat. Tasol mi no ken stori hariap long ol samting i kamap bihain—pastaim mi mas stori long olsem wanem mi bin kamap long dispela hap.
MAMA i karim mi long 1904 long liklik ples Sahor, nau em i stap long hap bilong isten Slovakia. Bihain long Namba Wan Pait, Sahor i kamap hap bilong nupela kantri, em Sekoslovakia. I gat 200 haus na tupela haus lotu long dispela ples, wanpela i bilong ol Katolik Grik na wanpela i bilong ol man i bihainim bilip bilong Kalvin.
Maski mi go long misin i bihainim bilip bilong Kalvin, mi no save bihainim ol lo i makim stretpela pasin mi mas bihainim. Klostu long haus bilong mi, wanpela man i sindaun em pasin bilong em i narapela kain. Wanpela taim em i kirap long toktok wantaim mi na em i givim wanpela Baibel long mi bilong holim inap sotpela taim. Em namba wan taim mi bin holim buk Baibel long han bilong mi. Long dispela taim, olsem 1926, mi maritim Barbora, na liklik taim bihain mipela i kamapim tupela pikinini, Barbora na Ján.
Mi kirap long kaunim Baibel, tasol i gat planti samting mi no klia gut long en. Olsem na mi go lukim pasto bilong mi na askim em long helpim mi. Em i tok: “Baibel i bilong ol man i skul tasol, olsem na maski traim kisim save long en.” Orait nau em i tokim mi long pilai kas wantaim em.
Bihain long dispela, mi go lukim dispela man i bin givim Baibel long mi. Em i wanpela Sumatin Bilong Baibel, em nem bilong ol Witnes Bilong Jehova long dispela taim. Em i amamas long helpim mi, na bihain liklik mi kisim save olsem dispela em i tok i tru. Mi lusim pasin bilong dring planti tumas na mi kirap long bihainim stretpela pasin. Na tu, mi kirap long toktok wantaim ol narapela man long Jehova. Tok i tru bilong Baibel i bin kamap long Sahor bihain liklik long 1920, na i no longtaim na wanpela liklik lain Sumatin Bilong Baibel i kamap long dispela hap na ol i wok strong.
Tasol ol misin i birua nogut tru long mipela. Pris bilong dispela hap i kirapim famili bilong mi long birua long mi—em i tok mi longlong pinis. Tasol nau i stap bilong mi i gat as bilong en, na mi tingting strong long mekim wok bilong trupela God, em Jehova. Olsem na long 1930, mi kisim baptais bilong makim olsem mi dediket pinis long Jehova.
Ol Bikpela Traim i Kamap
Long 1938, hap mipela i stap long en i kam aninit long Hangari—Hangari i helpim Jemani long taim bilong Namba Tu Pait. Long dispela taim ol man i stap long ples bilong mipela ol i no winim 1,000, tasol i gat 50 Witnes i stap. Mipela i wok yet long autim tok, maski long dispela as mipela inap kisim bagarap o go long kalabus.
Long 1940, ol i tokim mi long go insait long ami bilong Hangari. Bai mi mekim wanem? Mi bin kaunim ol tok profet long Baibel i tok ol man bai paitim ol samting bilong pait i kamap olsem ol samting bilong bel isi, na mi save, bihain, God bai pinisim olgeta pait long graun. (Song 46:9; Aisaia 2:4) Olsem na nau mi nolaik tru long pasin bilong pait, na mi pasim tok long bel olsem mi no ken insait long ami, maski wanem wanem samting i painim mi long dispela as.
Kot i givim 14 mun kalabus long mi, na mi inapim dispela taim long haus kalabus long Peks, Hangari. Faipela Witnes moa i stap long dispela haus kalabus, na mipela i amamas tru long mipela inap bung wantaim. Tasol inap sampela mun mi stap wanpis long wanpela rum kalabus na tupela lek bilong mi ol i pasim long sen. Taim mipela i tok mipela no laik mekim sampela wok bilong helpim pait, ol i paitim mipela. Na tu, ol i subim mipela long sanap i stap long de olgeta—i gat tupela aua tasol long taim bilong belo na ol i orait long mipela i ken sindaun. Dispela hevi i stap inap sampela mun. Tasol mipela i stap amamas, long wanem, bel bilong mipela i stap klin long ai bilong God.
Ol i Traim Bilip Bilong Mi
Wanpela taim, inap 15 pris Katolik i kam lukim mipela—ol i laik kirapim mipela long bilip olsem em bikpela samting long mipela mas insait long ami na helpim wok bilong pait. Mipela i tokim ol: “Sapos yupela inap kamapim wanpela tok long Baibel i makim olsem mipela i gat tewel na mipela bai go stret long heven sapos mipela i dai long pait, orait mipela bai go insait long ami.” Tasol ol i no inap mekim, na ol i no laik toktok moa wantaim mipela.
Long 1941 mi pinisim taim bilong mi long kalabus, na mi amamas long wetim dispela taim na mi inap bung gen wantaim famili bilong mi. Tasol sori tru. Dispela samting i no kamap. Ol i pasim mi long sen na kisim mi i go long wanpela ples ami long Sarospatak, long Hangari. Taim mipela i kamap pinis, rot i op long mi ken lusim kalabus olgeta. Ol i tokim mi: “Yu ken go fri sapos yu sainim dispela pepa i tok promis olsem taim yu kamap pinis long ples, yu bai salim 200 mani pengo i kam long mipela.”
Mi tok: “Dispela samting inap kamap olsem wanem? Yu laik mekim wanem long dispela mani?”
Ol i tok: “Long dispela mani yu bai kisim wanpela pepa i tok olsem yu gat sik na yu no winim mak bilong i go insait long ami.”
Nau mi wok long tingting planti. Inap wanpela yia pinis mi kisim bikpela pen na hevi, na nau mi les. Tasol mi inap kamap fri sapos mi orait long baim ami long sampela mani. Mi tok: “Bai mi tingting pastaim.”
Orait bai mi mekim wanem? Mi gat meri pikinini mi mas tingim. Taim mi wok long skelim dispela samting, mi kisim wanpela pas long wanpela wanlain Kristen na dispela i strongim gut bel bilong mi. Em i kamapim tok bilong Jehova em aposel Pol i kamapim long Hibru 10:38: “Stretpela man bilong mi em i bilip, olsem na em bai i stap laip. Na sapos em i surik, orait bai mi no amamas long em.” Bihain liklik, tupela ofisa Hangari long ami-barek i toktok wantaim mi, na wanpela i tok: ‘Mipela i laikim tru pasin bilong yu long stap strong long bihainim ol lo bilong Baibel! Yu no ken les na lusim bilip bilong yu!’
Long de bihain, mi go lukim ol man i tok mi ken go fri sapos mi baim ami long 200 mani pengo, na mi tok: “God Jehova i larim na mi stap kalabus, olsem na em yet bai wokim rot bilong mi ken lusim kalabus. Mi no ken baim dispela samting, nogat.” Olsem na kot i givim 10-pela yia kalabus long mi. Tasol i no dispela samting tasol ol i mekim bilong kirapim mi long pundaun long bilip, nogat. Kot i tok ol bai sori long mi na larim mi i go fri sapos mi orait long go insait long ami inap tupela mun tasol, na ol i orait long mi no ken karim gan samting! Mi sakim dispela samting tu, olsem na 10-pela yia kalabus bilong mi i kirap.
Bikpela Hevi Moa i Kamap
Ol i kisim mi i go gen long kalabus long Peks. Ol i givim bikpela pen moa yet long mi, winim bipo. Ol i pasim tupela han long baksait na hangamapim mi long pos inap tupela aua. Dispela i mekim na skru bilong tupela sol i lus. Planti taim insait long 6-pela mun ol i mekim dispela samting nogut tru long mi. Mi tenkyu long Jehova olsem long strong bilong em tasol mi no bin lusim bilip.
Long 1942 ol i kisim mipela—ol man i stap long kalabus long wok politik bilong ol, ol Juda, na 26 Witnes Bilong Jehova—i go long taun Kursk ol soldia Jeman i bosim. Ol i putim mipela long han bilong ol Jeman, na ol Jeman i givim wok long ol kalabus bilong bringim kaikai, ol gan, na klos, i go long ol soldia i stap long ples bilong pait. Mipela Witnes i no laik mekim dispela wok, long wanem, dispela i kalapim lo bilong God i tok ol Kristen i no ken insait long ol samting bilong pait. Dispela i mekim na ol i salim mipela i go bek long ol Hangari.
Bihain moa, ol i putim mipela long kalabus bilong Kursk. Inap 3-pela taim long wanpela de i go inap sampela de, ol i wok long paitim mipela long kopistik ol i bin wokim long raba. Ol i paitim het bilong mi na mi pundaun. Taim kopistik i paitim het, mi ting: ‘I no hatwok long dai.’ Skin olgeta bilong mi i dai na mi no pilim wanpela samting. Inap 3-pela de ol i no givim kaikai long mipela. Orait nau ol i kisim mipela i go long kot, na kot i tok 6-pela i mas i dai. Ol i kilim 6-pela i dai pinis, na nau mipela 20 tasol i stap.
Ol samting bilong traim bilip bilong mipela long Kursk long Oktoba 1942 em i nogut tru, winim ol narapela samting nogut i bin painim mi. Tingting bilong mipela i wankain olsem bilong King Jehosafat bilong bipo taim bikpela hevi i laik painim lain bilong em. Em i tok: “Dispela bikpela lain ami i laik pait long mipela. Tasol . . . mipela i no gat strong bilong pait long ol. Na mipela i no save bai mipela i mekim wanem, olsem na mipela i lukluk long yu tasol long helpim mipela.”—2 Stori 20:12.
Ol i kisim mipela 20 i go long wanpela hap bilong digim wanpela hul, olsem matmat, bilong planim mipela olgeta wantaim. Inap 18 soldia Hangari i was long mipela. Taim mipela i digim pinis, ol i tok mipela i gat 10-pela minit bilong sainim wanpela pepa, em sampela tok bilong en i olsem: “Ol tok bilong bilip bilong ol Witnes Bilong Jehova ol i no stret. Bai mi no bilip moa long ol dispela tok o helpim dispela tok. Bai mi pait bilong helpim kantri bilong mi, em Hangari . . . Mi sainim pinis nem bilong mi na dispela i makim olsem mi bai go insait long Misin Katolik.”
Tenpela minit inap pinis, orait nau wanpela soldia i singaut: “Tanim i go long han sut! Wokabaut i go long matmat!” Orait nau em i tok: “Namba wan na namba tri kalabus, kalap i go daun long hul!” Ol i givim 10-pela minit moa long tupela brata hia bilong tingim bai ol i sainim dispela pepa o nogat. Wanpela soldia i tokim ol: “Plis, lusim bilip bilong yupela na kam ausait long matmat!” Ol i no mekim wanpela tok. Orait nau nambawan ofisa i sutim tupela long gan.
Nau wanpela soldia i askim dispela ofisa: “Olsem wanem long ol narapela?”
Em i tok: “Pasim ol long rop. Mipela bai givim sampela pen moa long ol, na long siks klok moningtaim bai mipela sutim ol.”
Orait nau mi pret, tasol mi no pret long i dai. Mi pret olsem, nogut mi no inap karim dispela pen na mi surik na lusim pasin bilong i stap gut long God. Olsem na mi wokabaut liklik i go long ofisa na mi tok: “Mipela i bin mekim wankain rong olsem tupela brata bilong mipela i bin mekim, em nau tasol yu bin sutim ol. Yu no laik sutim mipela tu, a?”
Tasol ol i no mekim. Ol i pasim tupela han bilong mipela long baksait na hangamapim mipela. Taim tingting i dai, ol i save kapsaitim wara long mipela. Skin i hangamap na hevi bilong en i mekim na tupela sol i lus long skru na pen bilong en i bikpela moa yet. Mipela i stap olsem inap 3-pela aua. Orait nau wantu, wanpela tok i kamap i tokaut olsem ol Witnes Bilong Jehova i stap yet, no ken sutim ol.
Mi Go Long Hap Bilong Is, na Ranawe
Tripela wik bihain long dispela, ol i kam kisim mipela na mipela i wokabaut i go inap sampela de na nau mipela i kamap long arere bilong wara Don. Ol man i was long mipela i tok mipela i no inap abrusim bagarap—mipela bai dai long dispela hap. Long san ol i givim wok long mipela i no gat as bilong en, olsem: Ol i tokim mipela long digim ol hul na bihain pulimapim graun gen long ol. Long apinun mipela inap raun liklik.
Long tingting bilong mi i gat tupela samting inap painim mipela. Mipela i ken stap long dispela ples na dai long dispela hap, o mipela i ken ranawe lusim ol Jeman na putim mipela yet long han bilong ol Rasia. Tripela tasol bilong mipela i tingting long ranawe na brukim wara Don i ais pinis. Long Disemba 12, 1942, mipela i beten long Jehova na lusim dispela ples. Mipela i kamap long ol Rasia na wantu ol i putim mipela long wanpela banis kalabus i gat 35,000 kalabus long en. Bihain liklik inap sampela mun tasol, i gat 2,300 kalabus tasol i stap. Ol narapela i dai pinis long hangre.
Mipela i Kamap Fri, Tasol Bihain Sampela Hevi Moa i Kamap
Inap long taim dispela pait i pinis na sampela mun moa, mi stap kalabus bilong ol Rasia. Bihain, long Novemba 1945, mi kamap long as ples bilong mi long Sahor. Fam bilong mipela i no stap gutpela, olsem na mi mas kirap na wokim gen ol samting. Meri pikinini bilong mi i bin lukautim fam long taim bilong pait, tasol long Oktoba 1944, taim ol Rasia i kam klostu, ol i lusim fam na i go long hap bilong is. Ol Rasia i stilim olgeta samting bilong mipela.
Samting i nogut moa yet i olsem: Taim mi kam bek long ples, meri bilong mi i gat bikpela sik. Long Februeri 1946, em i dai. Em i gat 38 krismas tasol. Sori tru. Inap faipela yia i gat hatwok long en mi no bin stap wantaim em, na nau ol amamas mitupela inap kisim long bung gen wantaim em i pinis insait long sampela mun tasol.
Mi bung wantaim ol brata spirit bilong mi, na mi go long ol miting na autim tok long ol haus, na ol dispela samting i mekim gut bel bilong mi. Long 1947 mi kisim mani olsem dinau na mi raun inap 400 kilomita bilong i go long wanpela kibung i kamap long Barno. Mi bung wantaim ol brata Kristen bilong mi, na Nathan H. Knorr tu, em presiden bilong Sosaiti Wastaua long dispela taim, na dispela i mekim gut bel bilong mi na strongim mi.
Bihain long pait, mipela i no stap fri inap longpela taim. Long 1948 ol Komyunis i kirap long daunim mipela. Long 1952 ol polis i holim planti brata em ol i go pas long lukautim wok bilong ol Witnes Bilong Jehova long Sekoslovakia, na mi kisim wok bilong lukautim ol kongrigesen. Long 1954 ol i holim mi tu, na kot i givim 4-pela yia kalabus long mi. Pikinini man bilong mi, Ján, na pikinini man bilong em, Juraj, ol i bihainim pasin Kristen na ol i no insait long ol samting bilong pait, olsem na ol tu i kalabus. Mi stap tupela yia long kalabus Pankrats, long Prag. Long 1956 ol i tokaut olsem ol i no ken kotim moa ol man i no laik insait long ol samting bilong pait, na kot i larim mi i lusim kalabus.
Em Nau—Mi Stap Fri!
Bihain, long 1989, lain Komyunis i lusim strong bilong ol long bosim Sekoslovakia, na gavman i orait long wok bilong ol Witnes Bilong Jehova. Olsem na mipela i stap fri long bung wantaim na long mekim wok autim tok long ai bilong ol man. Long dispela taim i gat klostu 100 Witnes long Sahor—olsem wanpela long olgeta 10-pela 10-pela long Sahor ol i Witnes. Long sampela yia i go pinis, mipela i wokim wanpela naispela Haus Kingdom long Sahor, bikpela bilong en inap long 200 manmeri.
Nau mi save sik, olsem na ol brata i save kisim mi long ka i go long Haus Kingdom. Mi amamas taim mi stap long Haus Kingdom na mi amamas long bekim sampela tok long Stadi Wastaua. Na mi amamas moa yet long lukim sampela famili bilong mi inap namba 3 lain tumbuna, na sampela bubu tu, i mekim wok bilong Jehova. Wanpela i bin mekim wok olsem wasman bilong raun bilong ol Witnes Bilong Jehova long Sekoslovakia i go inap long taim em i no inap mekim moa dispela wok, long wanem, i gat sampela wok bilong famili em i mas mekim.
Mi tenkyu long Jehova i bin strongim mi long taim bilong planti traim. Pasin bilong tingim tingim Jehova—olsem lukim dispela Man yumi man i no inap lukim em long ai—dispela samting i bin strongim mi. (Hibru 11:27) Tru tumas, strongpela han bilong em i bin kisim bek mi. Olsem na long dispela as mi wok yet long go long ol miting na autim nem bilong em long ol man inap long skel bilong mi.
[Piksa long pes 25]
Haus Kingdom long Sahor
[Piksa long pes 26]
Mi amamas tru long mi inap bekim sampela tok long Stadi Wastaua