Graun Bai Pinis​—Pret, i Laik Save, na Les Pinis

Yu pilim olsem wanem long Disemba 21, 2012, em det long kalenda bilong lain Maya we planti man i tok bai i gat bikpela senis long graun olgeta? Samting em yu ting bai kamap, dispela inap mekim yu amamas, bel hevi, o les pinis. Yu ting dispela em narapela popaia gen ol man i mekim long graun bai pinis?

Tasol olsem wanem long “pinis bilong dispela graun” em Baibel i stori long en? (Matyu 24:​3, King Jems Nupela Testamen) Sampela i pret long graun bai i paia. Ol narapela i laik save tasol long wanem samting bai kamap. Planti i les pinis long harim dispela tok olsem klostu nau graun bai pinis. Tasol yu ting ol man i gat dispela tingting bikos ol i bilip long stori nating na i no stori tru?

Ating bai yu kirap nogut long kisim save long ol tok Baibel i mekim long pinis bilong dispela graun. Baibel i kamapim as na yumi mas wet long pinis bai kamap, na tu, Baibel i tokaut olsem sampela man bai pilim olsem pinis i no kam hariap na ol i les pinis long wet. Mipela i laik singautim yu long skelim ol bekim em Baibel i kamapim long sampela askim em planti man i gat long pinis bilong dispela graun.

Yu ting graun bai paia na pinis?

TOK BAIBEL I MEKIM: “Yu [God] bin putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.”​—SONG 104:5.

Graun bai i no inap bagarap long rot bilong paia o long ol narapela samting. Baibel i tok, dispela graun em ples ol man bai stap oltaim long en. Song 37:29 i tok: “Ol stretpela man bai i kisim graun God i givim ol, na bai ol i stap oltaim long en.”​—Song 115:16; Aisaia 45:18.

Bihain long God i wokim graun, em i tok graun “i gutpela,” na long nau em i gat wankain tingting yet long graun. (Stat 1:31) God i no gat tingting long bagarapim graun, em i promis olsem em bai “bagarapim ol man i wok long bagarapim graun,” na lukautim graun na bai graun i no ken bagarap olgeta.​—Revelesen 11:18.

Tasol ating yu tingting planti long tok bilong 2 Pita 3:7. Dispela ves i tok: “Skai na graun bilong nau i wetim paia i kamap.” Olsem wanem? Dispela tok i makim olsem graun bai paia na pinis? Sampela taim Baibel i save yusim ol tok olsem skai, graun, na paia bilong makim sampela narapela samting. Olsem, Song 97:1 i tok: “Bikpela i stap king. Graun, yu mas amamas. Na ol ailan, yupela i mas belgut.” Ves i kolim dispela tok “graun” bilong makim ol manmeri.

Ol tok bilong 2 Pita 3:​7, i soim olsem skai, graun, na paia long dispela ves i makim narapela samting. Ves 5, na 6 i tok long ol samting i bin kamap long Bikpela Tait long taim bilong Noa. Graun bilong yumi i no bin bagarap na pinis olgeta, nogat. Bikpela Tait i bin bagarapim wanpela lain bikhetman olsem “graun.” Na tu, Bikpela Tait i bagarapim samting i olsem “skai” em ol man i bin mekim wok bos bilong bosim ol manmeri. (Stat 6:11) Olsem tasol, 2 Pita 3:7 i tok profet long ol man nogut na ol gavman nogut bai bagarap olgeta, i olsem paia i kukim ol na ol i pinis olgeta.

Wanem samting bai kamap taim graun i pinis?

TOK BAIBEL I MEKIM: “Ol manmeri i stap longwe long God, ol bai pinis na laik bilong ol tu bai pinis, tasol man i bihainim laik bilong God em bai stap oltaim oltaim.”​—1 JON 2:17.

Graun i pinis i no makim graun tru tru, nogat, olsem Baibel i tok em i makim olgeta manmeri long graun em ol i no bihainim laik bilong God. Olsem wanpela dokta i laik katim na rausim tiuma bilong sik kensa long bodi bilong sikman bambai em i ken seivim laip bilong sikman, olsem tasol, God bai bagarapim ol man nogut na ol gutpela manmeri i ken stap amamas long graun. (Song 37:9) Olsem na graun bai pinis em i gutpela samting, a?

Sampela Baibel i strongim dispela tingting olsem graun bai pinis em i gutpela samting taim ol i tanim dispela tok olsem “pinis bilong dispela taim.” (Matyu 24:3) Long dispela taim, God bai bagarapim ol man nogut tasol, dispela i makim olsem graun bai stap yet na ol stretpela man bai stap long en. Baibel i sapotim dispela tingting, long wanem, Baibel i tok long “taim i kamap bihain.”​—Luk 18:30.

Jisas i kolim dispela taim bai kamap bihain olsem “taim bilong wokim ol samting i kamap nupela.” Long dispela taim em bai kamapim gutpela sindaun long ol manmeri olsem God i gat laik long en long pastaim. (Matyu 19:28) Bai yumi amamas long:

• Graun i kamap Paradais we olgeta man bai sindaun gut na i no pret long wanpela samting.​—Aisaia 35:1; Maika 4:4.

• Ol wok bilong yumi bai kamapim ol gutpela samting.​—Aisaia 65:​21-23.

• Olgeta kain sik bai pinis.​—Aisaia 33:24.

• Ol lapun bai kamap yangpela gen.​—Jop 33:25.

• Ol man i dai pinis bai kirap bek.​—Jon 5:​28, 29.

Sapos yumi bihainim “laik bilong God” na mekim ol samting em i askim yumi long mekim, orait bai yumi no pret long pinis bilong dispela graun. Bai yumi amamas long wetim dispela taim.

Olsem wanem? Klostu nau graun bai pinis?

TOK BAIBEL I MEKIM: “Taim yupela i lukim ol dispela samting i kamap, yupela i mas save olsem Kingdom bilong God i kam klostu.”​—LUK 21:31.

Long buk The Last Days Are Here Again, Profesa Richard Kyle i tok: “Bikpela senis i kamap wantu tasol na ol man i no sindaun gut wantaim, dispela i mekim na ol man i wok long makim taim graun bai pinis.” Moa yet taim senis na ol hevi i wok long i go bikpela moa na ol man i no save long as bilong en.

Tasol ol profet i bin raitim tok long graun bai pinis, ol i no mekim olsem bilong stori long as na ol samting nogut i wok long kamap long taim bilong ol. Spirit bilong God i bin kirapim ol long stori long ol samting i soim olsem pinis bilong graun i kam klostu. Skelim sampela bilong ol dispela tok profet na bai yu save sapos truim bilong ol i kamap long taim bilong yumi.

• Ol woa, bikpela hangre, bikpela guria, na ol bikpela sik.​—Matyu 24:7; Luk 21:11.

• Pasin bilong brukim lo bai i go bikpela moa. ​—Matyu 24:12.

• Ol man i bagarapim graun.​—Revelesen 11:18.

• Ol man i laikim ol yet tasol, laikim tumas mani na kain kain amamas, na ol i no laikim God.​—2 Timoti 3:​2, 4.

• Famili i no pas gut wantaim.​—2 Timoti 3:​2, 3.

• Ol i no laik luksave long ol samting i soim olsem pinis i klostu.​—Matyu 24:​37-39.

• Ol bai autim gutnius bilong Kingdom long olgeta hap bilong graun.​—Matyu 24:14.

Olsem Jisas i tok, taim yumi lukim “ol dispela samting” yumi ken save olsem pinis i klostu. (Matyu 24:33) Ol Witnes Bilong Jehova i bilip long ol samting i kamap na i soim olsem pinis i klostu, na ol i autim bilip bilong ol long ol arapela insait long 236 kantri.

Ol man i popaia long makim taim graun bai pinis, yu ting dispela i makim olsem pinis bai i no kam?

TOK BAIBEL I MEKIM: “Taim ol manmeri i tok olsem: ‘Nau em i taim bilong bel isi na gutpela sindaun!’ orait bagarap bai kamap long ol wantu tasol, olsem pen i save kamap long meri i laik karim pikinini. Na ol bai i no inap abrusim dispela samting.”​—1 TESALONAIKA 5:3.

Baibel i tok bagarap bai painim dispela graun i wankain olsem pen i save kamap paslain long mama i karim pikinini​—kain pen olsem i no gat rot bilong abrusim na i save kamap wantu tasol. Taim bilong pinis i kain olsem wanpela mama i laik karim pikinini, mama i luksave long ol mak i soim olsem klostu nau em bai karim. Ating dokta bilong em i makim det bilong em long karim, tasol maski sapos mama i no karim long dispela det stret, em i save olsem i no longtaim na em bai karim. Olsem tasol, maski pinis i no kam long taim we ol man i ting em bai kam, dispela i no senisim ol mak i soim olsem yumi stap long “taim bilong las de.”​—2 Timoti 3:1.

Ating bai yu askim, ‘Sapos ol mak i soim olsem yumi stap klostu long taim bilong pinis, orait bilong wanem planti man i no luksave long en?’ Baibel i tokaut klia olsem, taim pinis bilong dispela graun i kam klostu, planti manmeri bai i no tingim tumas ol samting i stap olsem mak bilong en. Ol bai i no inap luksave long ol bikpela senis i wok long kamap na i makim olsem yumi stap long taim bilong las de, ol bai tok bilas olsem: “Long taim ol tumbuna bilong yumi i bin i dai na i kam inap nau, olgeta samting i stap wankain olsem bipo tru taim God i mekim ol samting i kamap.” (2 Pita 3:​3, 4) Yumi ken tok tu olsem, ol mak bilong las de i klia tru, tasol planti manmeri i no tingim dispela samting.​—Matyu 24:​38, 39.

Dispela atikol i kamapim klia sampela tasol bilong ol tok bilong Baibel i soim olsem pinis i kam klostu.a Yu laik kisim sampela save moa? Sapos olsem, i gutpela yu lukim ol Witnes Bilong Jehova na askim ol long lainim yu long ol tok bilong Baibel, i no gat pe. Ol inap mekim Baibel stadi wantaim yu long haus bilong yu, o long narapela ples i stret long yu, o long rot bilong telefon. Wanpela samting tasol yu inap givim em taim bilong yu, na bai yu inap kisim planti gutpela samting.