Bihainim Dediket Bilong Yumi “Long Olgeta De”
“Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en long olgeta de, na em i mas bihainim mi.”—LUK 9:23.
‘OLSEM wanem? Yumi bin i stap olsem man bilong dediket tru long wok bilong yumi?’ John F. Kennedy, em namba 35 Presiden bilong Yunaitet Stets, em i tok, bilong save long bekim bilong dispela askim, yumi mas skelim wok ol bikman bilong gavman i mekim. Na dispela askim i gutpela bilong skelim wok bilong yumi ol wokman Kristen tu.
2 Orait, wanem insait bilong dispela tok “dediket”? Wanpela buk dikseneri (Webster’s Ninth New Collegiate Dictionary) i tok, em i olsem ‘givim wanpela samting long wanpela god o bilong mekim wanpela wok holi,’ o ‘makim wanpela samting bilong mekim wanpela wok,’ o ‘lusim sampela laik bilong yumi yet bilong givim bel olgeta long wanpela samting.’ Ating John F. Kennedy i bin tingim dispela laspela hap tok, olsem ‘lusim sampela laik bilong yumi yet bilong givim bel olgeta long wanpela samting.’ Tasol long ol Kristen, dispela tok “dediket” i gat bikpela insait moa bilong en.
3 Krais Jisas i tokim ol disaipel: “Sapos wanpela man i laik bihainim mi, orait em i mas daunim laik bilong em yet, na em i mas karim diwai kros bilong en na bihainim mi.” (Matyu 16:24) Bilong i stap narapela kain bambai yumi ken mekim wok bilong God, i no olsem yumi go lotu long Sande o go long wanpela ples lotu na em tasol, nogat. Olgeta samting long i stap bilong yumi na wokabaut bilong yumi i mas insait long dispela wok. Bilong i stap Kristen, yumi mas daunim laik bilong yumi yet taim yumi mekim wok bilong dispela God em Krais Jisas i bin mekim wok bilong em, em Jehova. Na Kristen i save “karim diwai” bilong em taim em i karim hevi ol man i putim long em long wanem em i bihainim Krais.
Nambawan Piksa Tru
4 Taim Jisas i stap long graun, em i kamapim klia ol samting man i mas mekim taim em i dediket long Jehova. Em i tok: “Yu no laik bai ol i kilim abus na mekim ofa. Tasol yu bin redim wanpela bodi bilong givim long mi.” Na em i tok moa: “God, mi kam pinis. Olsem bipo ol i raitim tok long mi long buk. Nau mi kam pinis bilong bihainim laik bilong yu.” (Hibru 10:5-7) Jisas i bilong wanpela lain i dediket pinis long Jehova, olsem na taim mama i karim em, em i dediket pinis long Jehova. Tasol taim em i kirap mekim wok bilong autim tok, em i kisim baptais bilong makim olsem em i givim em yet long Jehova bilong mekim laik bilong Em, na wanpela wok bilong dispela i olsem: Em i mas i dai na givim skin bilong em olsem ofa bilong baim bek ol man. Olsem na em i stap olsem gutpela piksa bilong ol Kristen; ol i mas mekim olgeta samting Jehova i laik bai ol i mekim.
5 Taim Jisas i baptais pinis, em i bihainim rot i bringim em i go long i dai na givim skin bilong em olsem ofa. Em i no tingting long kisim bikpela mani o kisim gutpela sindaun i no gat hatwok long en, nogat. Nambawan tingting bilong em, em bilong mekim wok bilong God. Em i tokim ol disaipel, ol i mas “wok pastaim long painim kingdom bilong God wantaim stretpela pasin bilong em,” na em yet i bihainim dispela tok. (Matyu 6:33, Nupela Testamen bilong 1988) Na wanpela taim em i tok: “Ol weldok i gat hul long graun, na ol pisin i gat haus bilong ol. Tasol Pikinini Bilong Man em i no gat ples bilong slip.” (Matyu 8:20) Em inap senisim liklik ol tok em i skulim ol man long en na bai em i ken pulim sampela mani long lain bilong em. Na em i wanpela kamda, olsem na em inap wokim wanpela gutpela samting bilong haus na kisim liklik mani long en bilong helpim em. Tasol em i no mekim sampela wok long ol dispela save bilong em bilong kisim ol samting bilong skin. Orait, yumi ol wokman bilong God i dediket pinis long em, yumi bihainim stretpela tingting bilong Jisas long ol samting bilong skin?—Matyu 6:24-34.
6 Jisas i putim wok bilong God i go pas long ol laik bilong em yet. Em i mekim wok bilong autim tok inap 3-pela yia hap, na long olgeta taim em i daunim ol laik bilong em yet. Wanpela taim em i bin mekim bikpela wok na em i no gat taim bilong kaikai, tasol em i lukim bikpela lain manmeri ol i “stap nogut tru, olsem ol sipsip i no gat wasman” na em i sori long ol, olsem na em i skulim ol. (Matyu 9:36; Mak 6:31-34) Na wanpela taim Jisas i bin wokabaut longwe na skin bilong em i les, tasol em i kirap skulim wanpela meri Samaria em i bin i kam long wanpela hul wara long Sikar, bipo Jekop i bin wokim. (Jon 4:6, 7, 13-15) Long olgeta taim Jisas i tingting long helpim ol narapela man, na em i no tingting tumas long ol samting bilong em yet. (Jon 11:5-15) Yumi inap bihainim pasin bilong Jisas sapos yumi lusim sampela laik bilong yumi yet bilong mekim wok bilong God na helpim ol man. (Jon 6:38) Sapos yumi tingting long ol samting yumi ken mekim bambai God i ken amamas long yumi, na yumi no tingting long mekim liklik hap wok tasol na em inap, bai yumi truim dediket bilong yumi.
7 Jisas i no tingting long helpim ol man bambai em i ken kisim biknem. Em i dediket long God bilong mekim laik bilong Em. Olsem na long olgeta wok em i mekim, em i strong long Papa bilong em Jehova tasol i mas kisim biknem long en. Wanpela hetman i bin kolim Jisas olsem ‘Gutpela Tisa,’ tasol Jisas i tokim em, “God wanpela tasol em i gutpela.” (Luk 18:18, 19; Jon 5:19, 30) Orait, taim yumi mekim wanpela gutpela wok, yumi bihainim pasin bilong Jisas na yumi strong long Jehova yet i mas kisim biknem long dispela wok, na yumi nogat?
8 Taim Jisas i stap long graun, long olgeta taim em i kamapim long ples klia olsem em i makim em yet bilong i stap narapela kain bambai em i ken mekim wok bilong God. Em i stap klin long olgeta pasin bilong em, “olsem wanpela pikinini sipsip i no gat mak o sua samting i bagarapim skin bilong en,” na em inap givim em yet olsem ofa bilong baim bek ol man. (1 Pita 1:19; Hibru 7:26) Em i bihainim olgeta tok long Lo Bilong Moses, na long dispela rot em inapim tru dispela Lo. (Matyu 5:17; 2 Korin 1:20) Na olgeta tok bilong stretpela pasin em i bin skulim ol man long en, em i bihainim ol dispela tok. (Matyu 5:27, 28) I no gat wanpela man inap tok stret olsem sampela tingting nogut long bel i kirapim Jisas long mekim ol wok. Em i “no laikim tru pasin nogut.” (Hibru 1:9) Yumi ol wokboi bilong God i mas bihainim pasin bilong Jisas, olsem na pasin bilong yumi na bel bilong yumi i mas stret long ai bilong Jehova.
Ol i Stap Olsem Piksa
9 Jisas i bin i stap olsem gutpela piksa, tasol ol Israel i stap olsem piksa yumi no ken bihainim. Ol i bin tokaut olsem ol bai bihainim olgeta tok bilong Jehova, tasol ol i no mekim laik bilong em. (Daniel 9:11) Aposel Pol i laik kirapim ol Kristen long tingim ol samting i bin painim ol Israel na bai ol i no ken bihainim pasin bilong ol. Orait nau yumi ken skelim sampela samting ol i bin mekim, em Pol i stori long en long namba wan pas em i bin raitim long ol Korin, na bai yumi ken save long ol samting ol wokboi bilong God long nau i dediket pinis long em ol i mas abrusim.—1 Korin 10:1-6, 11.
10 Pastaim Pol i toksave olsem yumi no ken “mangal long ol samting nogut.” (1 Korin 10:6) Ating bai yu tingim dispela taim ol Israel i les long kaikai mana tasol na ol i toktok planti long en. Orait Jehova i salim ol pisin olsem abus long ol. Wanpela yia samting paslain long dispela, wankain samting i bin kamap taim ol Israel i stap long ples drai ol i kolim Sen, klostu long taim ol i tokaut olsem ol i dediket long Jehova. (Kisim Bek 16:1-3, 12, 13) Tasol samting i bin kamap long dispela taim i no wankain stret. Taim ol Israel i toktok planti long kaikai long namba wan taim na Jehova i salim ol pisin long ol, em i no givim strafe long ol. Tasol long namba 2 taim i no olsem. “Taim ol manmeri i stat long kaikai mit bilong ol pisin, orait wantu Bikpela i belhat long ol na i salim bikpela sik nogut i kam long ol na planti manmeri i dai.” (Namba 11:4-6, 31-34) Wanem senis i kamap na nau ol i kisim strafe? Dispela lain ol i dediket pinis long Jehova, na nau Jehova i skelim ol long ol samting ol i mekim. Maski ol i tok promis pinis olsem ol bai bihainim olgeta tok bilong Jehova, ol i no tenkyu long em long ol kaikai samting em i givim long ol. Na i olsem tu sapos yumi toktok planti long ol kaikai bilong spirit Jehova i givim long yumi. Sampela i no tenkyu long Jehova long ol kaikai bilong spirit em i givim long yumi long rot bilong “wokboi i gat gutpela tingting.” (Matyu 24:45-47) Tasol yumi mas save yumi dediket pinis long Jehova, na long olgeta taim yumi mas tingim ol samting Jehova i bin mekim bilong helpim yumi, na yumi mas amamas long ol kaikai bilong spirit Jehova i save givim long yumi.
11 Orait nau Pol i toksave olsem: “Yupela i no ken lotu long ol giaman god, olsem sampela bilong ol i bin mekim.” (1 Korin 10:7) Ating aposel Pol i toktok long taim ol Israel i kirap lotuim bulmakau bihain stret long taim ol i bin mekim kontrak wantaim Jehova long maunten Sainai. Ating bai yu tok, ‘Tasol mi dediket pinis long Jehova na mi stap wokboi bilong em, olsem na mi no inap lotuim wanpela god giaman.’ Tru, tasol tingim ol Israel: Ol i no ting ol i lusim wok bilong lotuim Jehova; tasol ol i kirapim pasin bilong lotuim bulmakau—em samting nogut tru long ai bilong God. Ol i mekim wanem bilong lotuim dispela bulmakau? Ol i wokim ol ofa long ai bilong en, na bihain ol i “sindaun long kaikai na dring, na bihain ol man i go pilai long ol meri.” (Kisim Bek 32:4-6) Long nau sampela i tok ol i save lotuim Jehova. Tasol ating ol i gat bikpela tingting long kisim amamas long ol samting bilong dispela graun, na i no long lotuim Jehova. Tru, dispela i no nogut olsem brukim skru long wanpela bulmakau gol, tasol taim yumi skelim dispela samting, em i no narapela kain tumas, a? Sapos ol laik bilong skin i kamap olsem god bilong yumi, yumi no truim dediket yumi bin mekim long Jehova.—Filipai 3:19.
12 Na i gat narapela kain amamas Pol i toktok long en bilong givim tingting long yumi. Em i tok: “Yumi no ken mekim pasin pamuk, olsem sampela bilong ol i bin mekim, na long wanpela de tasol 23,000 bilong ol i bin lus.” (1 Korin 10:8) Ol meri Moap i grisim ol Israel long kisim amamas long mekim pasin pamuk, na ol i kirap lotuim god Bal bilong maunten Peor long Sitim. (Namba 25:1-3, 9) Bilong daunim laik bilong yumi yet bambai yumi ken mekim laik bilong Jehova, yumi mas bihainim lo bilong em i makim wanem pasin i stret na wanem pasin i no stret. (Matyu 5:27-30) Long nau ol man i lusim pinis stretpela pasin, olsem na tok bilong Pol i kirapim tingting bilong yumi olsem yumi mas givim baksait long pasin pamuk na olgeta narapela kain pasin sem, na yumi mas daun long Jehova na larim em i makim wanem pasin i gutpela na wanem pasin i nogut.—1 Korin 6:9-11.
13 Tru, planti ol i pundaun na mekim pasin pamuk long ples Sitim, tasol sampela Israel i bihainim dediket em lain bilong ol i bin mekim long Jehova. Wanpela em Finias, em i givim bel tru long Jehova. Wanpela taim em i lukim wanpela hetman bilong Israel i kisim wanpela meri Midian i kam insait long haus sel bilong em, na kwiktaim Finias i kisim spia na sutim tupela wantaim. Jehova i tokim Moses: “Finias i kilim tupela, olsem na mi no moa kros long ol manmeri bilong Israel. Long wanem, em i . . . strong long ol i mas lotu long mi wanpela tasol. . . . Olsem na mi no bin bagarapim olgeta manmeri.” (Namba 25:11) Em nau, man i dediket tru long Jehova, em i strong long lotuim Jehova wanpela tasol, na ol narapela god, nogat. Yumi no ken tru larim wanpela samting i kisim ples bilong dispela dediket yumi bin mekim long Jehova. Em i mas i stap nambawan long bel bilong yumi. Yumi givim bel tru long Jehova na dispela i kirapim yumi tu long toksave long ol elda sapos yumi save long sampela i bin mekim pasin pamuk o kain pasin nogut olsem, long wanem, yumi laik bai kongrigesen i ken i stap klin. Yumi no ken orait liklik long dispela pasin nogut.
14 Pol i toksave long narapela samting tu, olsem: “Na yumi no ken traim [Jehova] tu, olsem sampela bilong ol i bin mekim, na ol snek nogut i kaikaim ol na ol i bagarap.” (1 Korin 10:9) Pol i toktok long taim ol Israel i bin tok kros long God, long wanem, “ol i wokabaut i go i go na ol i les tru long rot.” (Namba 21:4) Olsem wanem? Sampela taim yu mekim pasin kranki olsem? Taim yu dediket nupela long Jehova, yu bin ting Armagedon i klostu pinis? Yu bin ting Jehova i no ken isi long ol man inap planti yia moa olsem? Tasol yu mas tingting: Taim yumi dediket long Jehova, yumi no bin kolim wanpela yia na tok bai yumi dediket inap long dispela taim o yumi dediket inap long Armagedon tasol, a? Dediket bilong yumi em i bilong i stap oltaim oltaim. Olsem na “yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.”—Galesia 6:9.
15 Laspela toksave, em Pol i toktok long pasin bilong “tok kros” long ol wokman Jehova i bin givim namba long ol insait long lain bilong em. (1 Korin 10:10) Ol Israel i tok kros nogut tru long Moses na Aron taim 12-pela man bilong lukstil long graun bilong Kenan i kam bek na 10-pela i mekim ol tok i pretim ol Israel na ol i no laik i go insait long en. Na ol i tok long makim narapela hetman bilong ol, olsem senis bilong Moses, na em bai bringim ol i go bek long Isip. (Namba 14:1-4) Orait, olsem wanem long yumi long nau? Yumi save daun long ol man Jehova i bin makim long rot bilong spirit holi long bosim yumi? Yumi lukim kaikai i pulap tru long tebol spirit, em lain wokboi i gat gutpela tingting ol i givim long yumi, na dispela i kamapim long ples klia wanem lain Jisas i mekim wok long en bilong ‘skelim kaikai long taim bikman i makim.’ (Matyu 24:45) Sapos yumi dediket long Jehova long bel bilong yumi olgeta, bai yumi daun long ol wokman Jehova i bin makim bilong bosim yumi. Yumi no ken kamap olsem sampela man bilong nau i tok kros long ol man i gat namba long bosim ol na i olsem ol i makim narapela man bilong bringim ol i go bek insait long pasin bilong dispela graun.
Mi Givim Strong Bilong Mi Olgeta?
16 Sapos ol Israel i bin tingim gut dediket bilong ol, em ol i dediket long mekim olgeta laik bilong Jehova na i no gat mak bilong en, orait ol i no inap pundaun na mekim ol dispela rong. Tasol Krais Jisas i no olsem ol dispela Israel i no bilip liklik long Jehova—em i bihainim dediket bilong em i go inap long taim em i dai. Orait yumi ol man i bihainim Krais, yumi bihainim pasin bilong em long givim bel olgeta long God, na yumi “no bihainim moa ol laik bilong olpela bel”—bai yumi “bihainim laik bilong God tasol.” (1 Pita 4:2; skelim wantaim 2 Korin 5:15.) Long nau Jehova i gat laik long “kisim bek olgeta manmeri, bai ol i ken save long as bilong tok tru.” (1 Timoti 2:4) Olsem na long nau yumi mas autim dispela “gutnius bilong kingdom” taim las de i no kamap yet. (Matyu 24:14) Tasol olsem wanem? Yumi strong tru long mekim dispela wok? Yumi ken askim skin bilong yumi: ‘Mi mekim long strong bilong mi olgeta?’ (2 Timoti 2:15) Strong bilong yumi i no wankain. Jehova “i save ting long ol samting ol wan wan man ol inap long givim . . . Em i no save ting long ol samting man i no gat, na em i skelim pasin bilong en.” (2 Korin 8:12; Luk 21:1-4) Yumi no ken skelim dediket bilong narapela man, em i givim bel olgeta long truim dediket bilong em o nogat. Yumi mas skelim yumi yet, yumi givim bel olgeta long Jehova o nogat. (Galesia 6:4) Sapos yumi laikim tru Jehova, bai yumi askim skin bilong yumi, ‘Mi ken mekim wanem na bai Jehova i ken amamas?’
17 Taim yumi wok long pilim tru ol gutpela samting Jehova i bin mekim bilong helpim yumi, bai yumi wok long givim bel moa yet long em. Wanpela manki long Japan i gat 14 krismas em i dediketim skin bilong em long Jehova na em i kisim baptais long wara bilong kamapim klia dediket bilong em. Bihain em i laik go long bikpela skul na kamap saientis. Em i no bin tingting long mekim wok autim tok long olgeta de, tasol em i dediket pinis long Jehova, olsem na em i no laik lusim Jehova na oganaisesen bilong em. Orait, bilong inapim laik bilong em long kamap saientis, em i go long skul yunivesiti. Long dispela yunivesiti em i lukim ol sumatin i winim skul ol i mas dediketim laip bilong ol olgeta long kampani bilong ol o long stadi. Nau em i tingting, ‘Mi mekim wanem long dispela yunivesiti? Mi no inap bihainim pasin bilong ol na dediketim laip bilong mi long mekim wanpela wok bilong skin. Mi dediket pinis long Jehova.’ Em nau, bel bilong em i pilim pinis na em i kamap wanpela painia oltaim. Em i wok long save gut long as bilong dediket bilong em na em i pasim tok long bel olsem em bai go long wanem wanem hap i no gat planti man bilong autim tok. Em i go long Skul Bilong Lainim Wok Bilong Lukautim Kongrigesen, na bihain ol i salim em i go long narapela kantri bilong mekim wok misineri.
18 Yumi mas tingim dediket bilong yumi long olgeta samting yumi mekim. Yumi mas daunim laik bilong yumi yet na bihainim pasin bilong Jisas “long olgeta de.” (Luk 9:23) Yumi daunim pinis laik bilong yumi yet, orait yumi no ken askim Jehova long givim malolo long yumi. Yumi bihainim ol lo Jehova i makim bilong ol wokboi bilong em. Long sampela samting yumi yet inap skelim samting yumi bai mekim, tasol long ol dispela samting tu i gutpela sapos yumi skelim i stap bilong yumi, yumi strong long bihainim dediket bilong yumi long mekim laik bilong Jehova o nogat. Taim yumi mekim wok bilong em long olgeta wan wan de, na yumi wok strong long mekim ol samting em i laikim, bai yumi inapim wok bilong yumi olsem Kristen, na Jehova, em dispela Man em inap tru long yumi givim bel olgeta long em, em bai amamas na orait long yumi.
Yu Inap Stori Long Dispela?
◻ Krais Jisas i mekim wanem bilong truim dediket bilong em?
◻ Bilong wanem yumi no ken tok kros long Jehova?
◻ Yumi ken mekim wanem na bai yumi no kisim pasin bilong lotuim god giaman?
◻ Yumi mas tingim wanem samting bambai yumi no ken “les” long mekim wok bilong God?
[Askim Bilong Stadi]
1. Wanem wanpela rot yumi ken skelim wok bilong yumi olsem Kristen, em i kamap gutpela o nogat?
2. Wanpela buk dikseneri i stori olsem wanem long dispela tok “dediket”?
3. Stori long dediket bilong Kristen.
4. Baptais bilong Jisas i makim wanem samting?
5. Olsem wanem Jisas i kamapim klia tingting bilong em long ol samting bilong skin?
6. Olsem wanem yumi ken bihainim pasin bilong Jisas na lusim sampela laik bilong yumi yet olsem wokboi bilong God i dediket pinis long em?
7. Olsem wanem yumi ken bihainim pasin bilong Jisas long givim biknem long Jehova long olgeta taim?
8. (a) Jisas em wanpela man i dediket pinis long Jehova, orait olsem wanem em i stap narapela kain long ol lain bilong dispela graun? (b) Yumi mas mekim wanem bilong bihainim pasin bilong em?
9. Pol i laik givim toksave long yumi na em i stori long wanem lain? Bilong wanem yumi mas tingim ol samting i bin painim ol?
10. (a) Ol Israel i mekim wanem na ol i “mangal long ol samting nogut”? (b) Long namba tu taim ol i toktok planti long kaikai, bilong wanem ol i gat rong long dispela taim, winim bilong namba wan taim? Dispela samting ol i mekim inap skulim yumi olsem wanem?
11. (a) Ol Israel i mekim wanem na ol i lotuim god giaman na bagarapim lotu ol i mekim long Jehova? (b) Yumi tu inap mekim wanem na i olsem yumi lotuim god giaman?
12. Stori bilong ol Israel i bin lotuim Bal bilong maunten Peor, em inap givim wanem tingting long yumi long pasin bilong daunim laik bilong yumi yet?
13. Olsem wanem pasin bilong Finias i helpim yumi long save long ol samting yumi mas mekim bilong truim dediket yumi bin mekim long Jehova?
14. (a) Ol Israel i mekim wanem na ol i traim Jehova? (b) Taim yumi dediket olgeta long Jehova, olsem wanem dispela i helpim yumi na yumi no ken “les”?
15. (a) Ol Israel i tok kros long husat? (b) Yumi dediket long Jehova na olsem wanem dispela i helpim yumi long daun long ol man Jehova i putim bilong bosim yumi?
16. Ating ol wokboi bilong Jehova i dediket pinis long em ol i laik givim wanem ol askim long ol yet?
17. Olsem wanem long pasin bilong givim bel olgeta long Jehova na pilim tru ol samting em i bin mekim bilong helpim yumi? Stori long dispela samting.
18. (a) Taim yumi dediket long Jehova, i gat wanem ol samting yumi mas mekim? (b) Yumi ol man i dediket pinis long Jehova, yumi inap kisim wanem gutpela samting long en?
[Piksa long pes 17]
Ol Kristen i dediket pinis ol i no save “les long mekim gutpela pasin”