Kamap Fri Long Rot Bilong Tok i Tru

LONG Yunaitet Stets, winim wan milion manmeri i kalabus. Na kot i tok inap 3,000 bilong dispela lain i mas dai. Tingim olsem yu wanpela bilong ol. Bai yu pilim olsem wanem? Taim yu tingim dispela samting, ating bel bilong yu i hevi, a? Tasol yumi ken tok, olgeta manmeri i stap kalabus, wankain olsem ol dispela man. Baibel i tok: “Yumi olgeta man yumi bin mekim sin, na yumi no inap i stap wantaim God.” (Rom 3:23) Tru tumas, yumi ol tumbuna pikinini bilong Adam, yumi stap “kalabus” long sin. (Rom 5:12) Long olgeta de yumi karim ol hevi bilong dispela samting, wankain olsem aposel Pol, em i tok: “Mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi.”​—⁠Rom 7:23.

Sin i stap long skin bilong yumi, olsem na dai i mas painim yumi olgeta, long wanem, Baibel i tok: “Sin i save givim pe long ol wokboi bilong en. Dispela pe em dai tasol.” (Rom 6:23) Moses, em wanpela man bilong raitim Song, em i stori gut long i stap bilong yumi olsem: “Mipela i save stap inap 70 yia tasol. Na sapos mipela i gat strong, mipela i ken i stap inap 80 yia. Tasol long dispela olgeta yia mipela i stap, mipela i save hatwok na painim hevi tasol. Dispela olgeta yia i pinis kwiktaim, na mipela tu i go pinis.”​—⁠Song 90:​10; skelim wantaim Jems 4:14.

Jisas i tingim ol man i stap kalabus long sin na indai taim em i tokim ol disaipel olsem: “Tok tru bai i mekim yupela i kamap fri.” (Jon 8:32) Long dispela tok Jisas i mekim, em i laik helpim ol disaipel long wetim wanpela samting i winim tru pasin bilong kamap fri na no ken i stap moa aninit long gavman bilong Rom​—⁠em i laik helpim ol na bai sin bilong ol i ken tekewe na dai i no ken kalabusim ol moa! Olsem wanem bai dispela samting i painim ol? Jisas i tokim ol, “Sapos Pikinini i mekim yupela i kamap fri, orait yupela i stap fri tru.” (Jon 8:36) Em nau, taim “Pikinini,” em Jisas, em i givim laip bilong em, em i kamap olsem wanpela ofa bilong baim bek samting i lus long Adam. (1 Jon 4:10) Dispela i opim rot long olgeta manmeri i bihainim tok ol i ken lusim kalabus bilong sin na i dai. Dispela wanpela Pikinini tasol bilong God em i dai bambai “olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”​—⁠Jon 3:16.

Olsem na dispela tok i tru em inap mekim yumi i kamap fri, em i stap long Krais Jisas. Ol man i kamap disaipel bilong em ol i wet long lusim kalabus bilong sin na i dai long taim Kingdom bilong God i bosim graun olgeta. Tasol long nau tu, ol man i bilip long tok i tru bilong Baibel ol i stap fri tru. Ol i stap fri olsem wanem?

Ol i No Pret Moa Long Ol Daiman

Planti milion manmeri long nau ol i save pret long ol daiman. Bilong wanem? Long wanem, lotu bilong ol i lainim ol olsem taim ol i dai, tewel bai lusim bodi na i go long wanpela ples spirit. Long dispela as, long planti kantri ol wanblut bilong man i dai pinis bai bung na was long skin bilong dispela daiman inap planti san na nait. Planti taim ol bai singsing strong na paitim kundu wantaim. Ol man i krai ol i ting dispela samting bai amamasim man i dai pinis na pasim spirit bilong em long kam bek oltaim na pretim ol man i stap yet. Ol lotu i holim nating nem Kristen ol i bin lainim ol man long ol bilip giaman long ol man i dai pinis, na dispela i strongim tru dispela pasin ol i save mekim taim man i dai pinis.

Tasol Baibel i kamapim tok i tru long ol man i dai pinis i stap olsem wanem. Em i tok klia olsem yumi gat laip; yumi no gat wanpela tewel bai stap laip yet taim yumi dai. (Stat 2:7; Jop 14:10) Na tu, ol daiman i no stap long bikpaia na kisim pen, o stap long wanpela ples spirit na mekim sampela samting long ol man i stap yet. Baibel i tok: “Ol man i dai pinis, ol i no inap save long wanpela samting. . . . Yu no inap mekim wok o tingting o kisim gutpela tingting na save long ples bilong ol man i dai pinis [matmat], dispela ples bai yu go long en.”​—⁠Saveman 9:​5, 10.

Ol dispela tok i tru bilong Baibel i bin helpim planti man na ol i no pret moa long ol man i dai pinis. Ol i no mekim moa ol ofa i gat bikpela pe bilong mekim gut tewel bilong ol tumbuna, na ol i no tingting planti olsem ol famili bilong ol i dai pinis ol i wok long kisim bikpela pen long ol rong ol i bin mekim. Ol i kisim save olsem Baibel i tok long gutpela samting bai painim ol man i dai pinis, long wanem, long taim God i makim, em “bai kirapim bek ol man i dai pinis, em ol stretpela man na ol man nogut wantaim.” (Aposel 24:15; Jon 5:​28, 29) Olsem na ol man i dai pinis ol i malolo tasol​—⁠i olsem ol i slip strong tru.​—⁠Skelim wantaim Jon 11:​11-14.

Dispela tok i tru long ol man i dai pinis i stap olsem wanem na long yumi ken wetim taim bilong ol bai kirap bek, em inap helpim yumi na taim wanpela i dai, bel bilong yumi i no bagarap olgeta. Dispela bilip i bin strongim tupela marit long Yunaitet Stets taim birua i painim pikinini man bilong ol i gat 4-pela krismas na em i dai. Mama bilong em i tok, “Mipela i lus long wanpela samting na mipela i save, mipela i no inap painim dispela samting inap long taim pikinini bilong mipela i kirap bek na mipela inap lukim em gen. Tasol mipela i save, bel hevi bilong mipela em bilong liklik taim tasol, long wanem, Jehova i tok promis long em bai mekim drai aiwara bilong yumi em bel hevi i kamapim.”​—⁠KTH 21:​3, 4.

Ol i No Pret Moa Long Ol Samting Bai Kamap Bihain

Wanem ol samting bai painim yumi long bihain? Ating bom nuklia bai kukim graun bilong yumi? O ating bai yumi no inap stap moa long graun, long wanem, olgeta samting long graun i bagarap? Ol man i lusim pinis ol stretpela lo, olsem na ating bihain ol bai bikhet olgeta long gavman na long olgeta lo? Ol dispela samting inap kamap, olsem na planti man long nau ol i pret.

Tasol Baibel inap helpim yumi na ol dispela kain pret nogut i no ken bosim yumi moa. Em i tok olsem: “Graun i no save senis. Oltaim em i stap olsem tasol.” (Saveman 1:⁠4) Jehova i no wokim graun bilong yumi bambai ol man i no gat save long lukautim ol i ken bagarapim. Nogat. (Aisaia 45:18) Jehova i wokim graun bilong kamap ples Paradais bambai olgeta manmeri i ken stap long en na i stap wanbel olsem wanpela famili. (Stat 1:​27, 28) Dispela laik bilong God i no senis. Baibel i tok, God bai “bagarapim ol man i bin bagarapim graun.” (KTH 11:18) Na bihain, “ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”​—⁠Song 37:11.

Yumi ken bilip tru long dispela tok promis, long wanem, God i no save giaman. Jehova i tok long maus bilong profet Aisaia olsem: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.” (Aisaia 55:11; Taitus 1:⁠2) Olsem na yumi ken bilip na wetim truim bilong tok promis bilong God i kamap, em i stap long Baibel long 2 Pita 3:13: “Tasol God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.”

Ol i No Pret Moa Long Ol Man

Baibel i stori long ol man na meri ol i bin givim bel long God na ol i no pret, na ol i gutpela piksa tru bilong yumi ken bihainim. Sampela bilong ol em Gideon, Barak, Debora, Daniel, Esta, Jeremaia, Abigel, Jael​—⁠na i gat planti moa. Ol dispela gutpela man na meri i gat wankain tingting olsem man bilong raitim Song, em i tok: “Mi save bilip long God, olsem na mi no ken pret long wanpela samting. Bai ol man inap mekim wanem samting long mi? Nogat.”​—⁠Song 56:11.

Long bipo, aposel Pita na Jon i bihainim wankain pasin, na taim ol kaunsil i tokim ol long ol i no ken autim tok moa, ol i sanap strong na ol i no pret. Ol i bekim tok olsem: “Mitupela i no inap pasim maus. Mitupela i mas autim tok long olgeta samting mitupela i bin lukim na harim.” Pita na Jon i strong yet long autim tok, olsem na bihain ol i kalabusim tupela. Taim God i helpim ol long lusim kalabus, ol i kirap gen long autim tok na ol i wok yet long “tokaut strong na ol i no pret.” I no longtaim na ol i kisim Pita wantaim ol narapela aposel i go na sanapim ol long ai bilong kaunsil bilong ol Juda. Hetpris i tokim ol olsem: “Mipela i bin tambuim yupela tru long yupela i no ken autim tok long ol manmeri long nem bilong dispela man. Tasol yupela i wok yet long autim tok, na ol manmeri long olgeta hap bilong Jerusalem i harim pinis tok bilong yupela.” Pita wantaim ol narapela aposel i bekim tok olsem: “Mipela i mas bihainim tok bilong God tasol. Mipela i no ken bihainim tok bilong ol man.”​—⁠Aposel 4:​16, 17, 19, 20, 31; 5:​18-20, 27-29.

Taim ol Witnes Bilong Jehova i mekim wok bilong autim gutnius bilong Kingdom bilong God, ol i wok strong long bihainim pasin bilong ol Kristen bilong pastaim, em ol i strong long autim tok. Ol yangpela namel long ol tu i save strongim bel na tokim ol narapela long bilip bilong ol. Tingim sampela stori hia.

Stacie, em wanpela yangpela meri, em i meri bilong sem. Olsem na pastaim em i gat hatwok long tokim ol narapela long bilip bilong em. Em i mekim wanem bilong daunim dispela pasin bilong sem? Em i tok: “Mi save stadi long Baibel bambai mi ken save gut long ol samting mi laik toktok long en. Dispela i helpim mi na mi no hatwok moa long toktok.” Stacie i gat gutpela nem long skul, na wanpela nius bilong dispela hap i stori long en. Wanpela tisa long skul bilong em i raitim dispela stori na i tok: “Bilip bilong [Stacie] i strongim em long sakim planti traim i save painim klostu olgeta yangpela. . . . Em i ting wok bilong God i mas stap olsem nambawan samting long tingting bilong em.”

Papamama bilong Tommy i kirap skulim em long Baibel long taim em i gat 5-pela krismas tasol. Na taim em i liklik yet, em i strong long bihainim lotu i tru. Taim ol liklik wanklas bilong em i wok long droim ol piksa i makim ol bikpela de, Tommy i save droim ol piksa bilong Paradais em God i promis long kamapim. Taim em i yangpela man, Tommy i lukim olsem planti sumatin i no klia tumas long bilip bilong ol Witnes Bilong Jehova. Tasol em i no pret na pasim maus, em i askim wanpela tisa long larim em i mekim wanpela tok long klas na ol i ken tromoi ol askim na em i ken bekim olgeta askim bilong ol long dispela taim. Tisa i orait long em i mekim olsem, na em inap autim gut tok long ol.

Taim Markietta i gat 17 krismas, em i painim wanpela gutpela rot bilong tokim ol narapela wanklas long bilip bilong em. Em i tok: “Tisa i tokim mipela long mekim wanpela tok. Mi makim buk Sampela Askim Bilong Ol Yangpela​—⁠Ol Gutpela Bekim, bilong mekim tok bilong mi long en.a Mi makim 5-pela sapta bilong buk na raitim nem bilong ol long blakbot. Nau mi askim klas long kamapim tingting bilong ol, ol i ting wanem ol sapta i bikpela samting moa na i mas go paslain na wanem ol sapta i mas kam bihain.” Bihain em i mekim tok na klas tu i insait long toktok. Markietta i tok olsem: “Mi soim dispela buk long klas, na planti sumatin i tok ol i laik kisim wanpela. Na tisa bilong mi tu i tok em i laikim wanpela.”

Tok i Tru Inap Helpim Yu Long Kamap Fri

Olsem yumi lukim pinis, tok i tru bilong Baibel inap helpim olgeta man, maski wanem krismas bilong ol, long kamap fri taim ol i stadi long en na pilim tru ol tok bilong en. Em i helpim ol na ol i no pret moa long ol man i dai pinis, na long ol samting bai kamap long bihain, na long ol man. Na bihain, ofa bilong Jisas bai helpim ol man i bihainim tok na bai ol i kamap fri na lusim kalabus bilong sin na i dai. Olaman! Bai yumi amamas tru long i stap oltaim oltaim long Paradais long graun, long taim sin i no kalabusim yumi moa!​—⁠Song 37:29.

Olsem wanem? Yu laik kisim sampela save moa long ol gutpela samting God i promis long kamapim? Sapos olsem, yu mas mekim wanem? Jisas i tok: “Na laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:⁠3) Olsem na sapos yu laik kamap fri olsem Jisas i bin tokim ol disaipel long en, yu mas kisim save long God Jehova na Pikinini bilong em. Yu mas kisim save long laik bilong God na bihainim, long wanem, Baibel i tok: “Dispela graun bai i pinis, na olgeta pasin bilong dispela graun, . . . ol tu bai i pinis wantaim. Tasol man i bihainim tok bilong God, em bai i stap oltaim.”​—⁠1 Jon 2:17.

[Futnot]

[Piksa long pes 7]

Taim Kingdom bilong God i bosim yumi, ol man bai kamap fri na lusim kalabus bilong sin na i dai