Jehova Em i Husat?
JEHOVA i tokim wanpela gutpela man i save lotu long em: “Yu no inap lukim pes bilong mi, long wanem, sapos wanpela man i lukim pes bilong mi bai em i dai.” (Kisim Bek 33:20) “God em i Spirit,” na ol man i no inap lukim em long ai bilong ol. (Jon 4:24) Sapos long belo yumi lukluk stret i go long san, dispela bai bagarapim tru ai bilong yumi, na olsem tasol bai yumi bagarap tru sapos yumi lukim As bilong bikpela strong i bin kamapim dispela san i save lait strong tru na ol narapela milion milion san i stap long ples antap.
Tasol gutpela tru yumi no gat wok long lukim God na bai yumi inap kisim save long em. Baibel i kamapim long ples klia dispela Man i bin wokim dispela gutpela mekpas bilong yumi, em dispela graun, na Baibel i kamapim klia ol pasin bilong em. Olsem na yumi mas lukim ol tok bilong Baibel bambai yumi ken kisim save long dispela Papa em i bin givim laip long yumi na givim gutpela ples tru long yumi bambai yumi ken amamas long i stap laip.
Nem Bilong Em i Bikpela Samting
Olgeta nem i gat insait bilong en, tasol long nau planti manmeri i no save long insait bilong nem bilong ol. Olsem: Wanpela nem em planti man bilong Inglan i holim, em Devit, na dispela nem i kam long wanpela tok Hibru, insait bilong en i olsem “Laikim Tumas.” Nem bilong Man bilong wokim yumi, Jehova, em tu i gat insait bilong en. Wanem insait bilong en? Long tok Hibru ol i bin raitim Baibel long en long pastaim, ol i raitim nem bilong God long 4-pela leta, olsem YHWH, na em i kamap klostu 7,000 taim insait long hap bilong Baibel ol i bin raitim pastaim long tok Hibru. Insait bilong nem bilong God i olsem “Em i Mekim i Kamap.” Dispela i makim olsem long gutpela tingting na save Jehova i save mekim em yet i kamap wanem wanem kain em i laikim bambai em i ken kamapim ol laik bilong em. Em i Man bilong wokim olgeta samting, na Jas, na Man bilong kisim bek ol man, na Man bilong helpim olgeta samting long i stap laip, olsem na em inap truim ol tok promis bilong em. Na tu, long tok Hibru dispela nem Jehova i makim wanpela wok i go yet na klostu em bai pinis. Em nau, Jehova i wok yet long mekim em yet i kamap Man bilong kamapim tru ol laik bilong em. Em i wanpela God i gat laip!
Ol Pasin Bilong Jehova
Baibel i tok, Man bilong wokim yumi em i wanpela God i ‘as bilong marimari na sori. Na em i no save belhat kwik. Em i save laikim tru olgeta manmeri, na em i save bihainim olgeta tok bilong em. Em i save laikim tumas planti tausen lain manmeri, na em i save lusim ol kain kain sin na bikhet pasin bilong ol.’ (Kisim Bek 34:6, 7) Dispela tok “laikim tru,” ol i kisim long wanpela tok Hibru i gat bikpela insait bilong en na i makim pasin bilong laikim tru na givim bel long wanpela samting na i stap olsem i go inap long taim dispela samting i mekim pinis wok bilong en. Na yumi inap tanim tu olsem “laikim tru wanpela man na stap gut long em.” Jehova i save laikim tru ol manmeri em i bin wokim na dispela pasin sori bilong em i save kamapim tru ol gutpela laik bilong em. Ating yu laik tru long kisim dispela kain sori bilong Man i bin givim laip long yu, a?
Jehova i no save belhat kwik, na em i save hariap long lusim ol rong bilong yumi. Taim yumi pas gut long kain man olsem, dispela i save mekim gut bel bilong yumi. Tasol dispela i no makim olsem em i save orait long man i mekim rong. Em i tokaut olsem: “Mi save laikim stretpela pasin tasol. Mi no save laikim pasin bilong stil na pasin bilong mekim nogut long ol arapela [olsem ol pasin i no stret].” (Aisaia 61:8) Jehova em i God bilong laikim stretpela pasin tasol, olsem na ol sinman i strong long bihainim pasin nogut bilong ol, em i no inap larim ol i mekim olsem long olgeta taim, nogat. Olsem na yumi save, long taim em i makim Jehova bai stretim ol samting i no stret em ol man i save mekim. Em i no ken givim baksait long ol manmeri ol narapela i save givim bikpela hevi long ol.
I hatwok tru long skelim mak bilong pasin sori na mak bilong stretpela pasin yumi mas mekim. Sapos yu wanpela papa o mama, yu hatwok long save wanem taim yu mas stretim ol pikinini bilong yu taim ol i mekim pasin bikhet? Na yu hatwok long save bai yu stretim ol olsem wanem, na bai yu mekim inap long wanem mak? Bilong skelim stret mak bilong stretpela pasin na pasin sori yumi mas mekim, yumi mas i gat gutpela tingting na save tru. Jehova i save kamapim dispela pasin moa yet long ol manmeri bilong graun. (Rom 11:33-36) Tru tumas, long olgeta hap yumi inap lukim gutpela tingting na save bilong dispela Man bilong wokim yumi, olsem long ol gutpela gutpela samting em i bin wokim long ples antap na long graun.—Song 104:24; Sindaun 3:19.
Tasol gutpela tingting na save tasol i no inap. Bilong kamapim tru laik bilong em, Man bilong wokim yumi i mas i gat strong tu, na Baibel i kamapim klia olsem em i gat bikpela strong tru: “Yupela lukluk i go antap long skai na lukim ol sta samting i stap antap. Husat tru i bin wokim ol? Em Bikpela tasol. Ol dispela samting i olsem lain ami bilong Bikpela. Em i save long namba bilong ol, na em i save long nem bilong wan wan bilong ol, na em i save kolim ol long nem bilong ol. Em i gat olgeta strong, olsem na i no gat wanpela bilong ol dispela samting inap lus.” (Aisaia 40:26) Jehova i gat “olgeta strong,” olsem na em i save mekim tru ol wok bilong em. Ating dispela kain pasin bilong em bai kirapim yu long laikim em tru, a?
God Bilong Olgeta Lain Man
Ating bai yu tingting olsem: ‘Tasol Jehova em i God bilong “Olpela Testamen,” em God bilong ol Israel bilong bipo, a?’ Tru, Jehova i bin kamapim em yet long ol Israel. Tasol em i bin wokim namba wan man na meri, olsem na em i God “bilong olgeta lain i stap long . . . graun, na em yet i givim nem long olgeta dispela lain.” (Efesus 3:15) Sapos yu bilip olsem i stret yu mas mekim gut long ol tumbuna bilong yu, orait i stret yu mas brukim skru long Man i bin givim laip long namba wan man, em tumbuna bilong yumi olgeta, em i as bilong olgeta lain i stap nau long graun.
Man bilong wokim yumi i no laikim sampela lain tasol. Tru, long wanpela taim bipo em i bin kisim lain Israel olsem lain bilong em yet. Tasol em i mekim gut tu long olgeta manmeri i singaut long nem bilong em. Wanpela king bilong Israel i gat gutpela tingting na save em i bin beten long Jehova olsem: “Ol man bilong ol arapela kantri i bin harim tok long biknem bilong yu, . . . na sapos wanpela bilong ol i laik lotu long yu na i lusim as ples bilong en na i kam klostu long dispela haus na i beten long yu, orait . . . yu ken harim beten bilong en na mekim ol samting em i askim yu long mekim. Olsem na bai olgeta lain man long olgeta kantri i ken save long [nem bilong] yu na i stap aninit long yu.” (1 King 8:41-43) Long nau tu ol manmeri bilong olgeta lain ol inap kisim save long Jehova na pas gut wantaim em. Tasol dispela i mekim wanem long yu?
Taim Yu Save Long Jehova
Orait yumi ken kamapim gen tok piksa long stori i kamap paslain long dispela, olsem: Sapos yu kisim wanpela presen ol i bin pasim long naispela pepa, yu laik save, bilong wanem ol i salim dispela presen long yu. Yu mas mekim wanem wok long en? Na yu mas mekim wanem bilong lukautim gut? Olsem tasol yumi laik save, God i gat wanem tingting taim em i redim dispela graun bilong yumi ken i stap long en. Baibel i tok, em “i no wokim graun bilong i stap nating. Nogat. Em i bin wokim bilong olgeta samting [olsem ol manmeri] i ken i stap long en.”—Aisaia 45:18.
Tasol klostu olgeta manmeri i no bin lukautim gut dispela presen God i bin givim long ol. Ol i wok long bagarapim graun, na Jehova i no amamas liklik long dispela. Tasol olsem nem bilong em i makim, Jehova i strong long kamapim laik bilong em bilong pastaim tru long ol man na dispela graun. (Song 115:16; KTH 11:18) Em bai stretim bek dispela graun na givim long ol man ol i amamas long i stap olsem ol pikinini bilong em i bihainim tok.—Matyu 5:5.
Laspela buk bilong Baibel i stori long i stap bilong ol man taim dispela samting i kamap: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. . . . Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:3, 4) Long dispela taim bihain, i no gat wanpela man bai krai long bel hevi o krai sori long wanpela bilong famili i dai. I no gat wanpela man bai painim taim nogut na em i mas singaut long wanpela man i helpim em, o kisim bikpela pen long ol sik nogut i save bagarapim man. Na God “bai i pinisim dai tu.” (1 Korin 15:26; Aisaia 25:8; 33:24) Em nau, Jehova i laik bai yumi stap olsem taim em i bin wokim tupela tumbuna bilong yumi bilong pastaim tru.
Dispela kain i stap bilong ol man olsem long paradais, nau yu inap lukim liklik piksa bilong en namel long ol manmeri i lotuim Jehova. Em i tokim ol: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” (Aisaia 48:17) Jehova em i gutpela Papa na em i save skulim yumi ol pikinini bilong em long ol pasin yumi mas bihainim na bai i stap bilong yumi i gutpela. Ol lo em i putim bilong soim rot long yumi, ol i bilong lukautim yumi—i no bilong putim planti tambu long yumi. Sapos yumi bihainim ol dispela lo, bai yumi stap fri tru na i stap amamas, olsem Baibel i tok: “Sapos Spirit bilong Bikpela i stap long wanpela man, orait i no gat wanpela samting i pasim dispela man. Nogat. Em i stap fri.” (2 Korin 3:17) Ol manmeri i laik i stap aninit long wok king bilong Jehova, taim ol i bihainim ol lo bilong Baibel bilong soim rot long ol, nau bel bilong ol i stap isi—em dispela kain bel isi bihain bai i stap long olgeta manmeri bilong graun.—Filipai 4:7.
Tru tumas, Jehova em i gutpela Papa tru bilong mekim gut long yumi! Olsem wanem long yu? Yu laik kisim sampela save moa long dispela Man em yet i bin wokim olgeta gutpela samting bilong ples antap na bilong graun? Ol man i laik mekim olsem, long nau bai ol i kisim ol gutpela samting tru long en. Na bihain ol bai kisim ol gutpela samting i go inap oltaim oltaim.
[Piksa long pes 5]
Long banis bilong planti olpela haus lotu yumi inap lukim nem bilong God ol i bin raitim long 4-pela leta Hibru