Kolim Stret Ol Tok

I NO olgeta Kristen i bin i go planti yia long ol skul bilong graun. Ol bikman bilong lotu Juda i tok long aposel Pita na Jon olsem ol “i no bin skul” na ol “i man nating tasol.” (Ap. 4:13) Tasol em i bikpela samting long yumi mas kolim stret ol tok taim yumi autim tok i tru bilong Baibel, long wanem, taim yumi popaia long kolim sampela tok dispela inap mekim na ol man i no putim gut yau long tok yumi autim.

Ol Samting Bilong Tingim. Olgeta tok ples i no gat wankain lo long pasin bilong kolim stret ol tok. Planti tok ples ol i raitim long ol leta olsem ABC. Tok ples Latin i gat ABC bilong ol yet na ol narapela tok ples olsem Arabik, Grik, Hibru, na Sirilik tu i gat. Taim ol i raitim tok Saina ol i no raitim ol leta, ol i gat ol narapela kain mak na ol dispela mak i makim ol wan wan tok o hap bilong wanpela tok. Maski tok Japan na Korea i yusim sampela mak bilong tok Saina, ol dispela mak i no gat wankain krai na mining olsem bilong tok Saina.

Bilong kolim stret tok long ol tok ples i gat ol ABC, yu mas kolim stret krai bilong ol wan wan leta o krai bilong sampela leta ol i bungim wantaim. Taim wanpela tok ples i bihainim wankain lo long kolim ol tok long olgeta taim, olsem tok Grik, Spen, na Zulu i save mekim, i no hatwok tumas long kolim stret ol tok. Tasol sampela taim wanpela tok ples bai kisim sampela tok long narapela tok ples na dispela bai mekim na ol bai bihainim narapela pasin long kolim sampela tok. Olsem na sampela taim ol bai bihainim wanpela pasin bilong kolim wanpela leta o sampela leta ol i bungim wantaim na sampela taim bai i gat narapela pasin bilong kolim ol dispela leta, na ating sampela taim ol dispela leta i no gat krai bilong ol. Ating yu mas wok long holim ol dispela tok long tingting na mekim wok long en planti taim long toktok bilong yu. Long tok Saina, bilong kolim stret ol tok yu mas holim long tingting mining bilong planti tausen mak. Long sampela tok ples, taim yu senisim pasin bilong yu long kolim wanpela tok dispela inap senisim mining bilong dispela tok. Long kain tok ples olsem, sapos yu no was gut long dispela samting yu inap givim tingting kranki long ol man.

Long ol tok i gat tupela o tripela hap bilong en bai i gat wanpela hap yu mas kolim strong, na em i bikpela samting long mekim olsem. Planti tok ples i gat pasin bilong bihainim bilong kolim ol tok long maus. Taim wanpela tok i no bihainim dispela pasin, ating ol bai putim wanpela kain mak bilong makim pasin bilong kolim stret dispela tok. Dispela i mekim na i no hatwok long kolim stret dispela tok. Tasol sapos pasin bilong kolim ol tok i no wankain long olgeta taim, em bai hatwok long kolim stret ol tok. Bilong winim dispela hevi yu mas holim long tingting planti tok bambai yu inap kolim stret ol tok.

I gat sampela pasin bilong kolim ol tok yu mas abrusim. No ken kolim long narapela kain pasin, nogut ol i ting yu hambak o yu ting yu samting tru. Na no ken bihainim pasin bilong kolim tok olsem ol i bin kolim bipo tasol nau ol i no kolim olsem, long wanem, dispela bai kirapim ol man long tingim man i mekim tok. Tasol tu, yu mas abrusim pasin bilong sotim ol wan wan tok na kalapim sampela hap bilong en. Yumi stori pinis long sampela bilong ol dispela tok long sapta “Kolim Klia Tok.”

Pasin bilong kolim stret ol tok bilong wanpela tok ples i no wankain long olgeta kantri, na sampela taim i no wankain long olgeta hap bilong wanpela kantri. Man bilong narapela kantri bai kolim tok ples bilong kantri em i sindaun long en long nek i narapela kain. Sampela dikseneri i save makim tupela pasin i stret long kolim wanpela tok. Sapos man i no bin kisim planti skul, o tok ples nau em i mekim i no tok ples bilong em yet, orait em i ken putim gut yau long tok bilong ol man i save mekim gut dispela tok ples na bihainim pasin bilong ol long kolim ol tok, na dispela bai helpim em gut tru. Wanpela samting em inap helpim tru ol man i no bin kisim planti skul, o helpim man long mekim tok ples i no tok ples bilong em yet, em sapos ol i putim gut yau long tok bilong ol man i save mekim gut dispela tok ples na bihainim pasin bilong ol long kolim ol tok. Yumi ol Witnes Bilong Jehova i laik mekim tok long pasin i save litimapim tok yumi autim na yumi laik mekim tok ol man long hap bilong yumi i save long en.

Taim yu toktok wantaim ol man em i gutpela long mekim wok long ol tok yu save gut long en. Ating bai yu no gat hevi long pasin bilong kolim stret tok taim yu toktok wantaim narapela. Tasol taim yu ritim tok long maus, ating yu mas kolim sampela tok yu no save yusim taim yu toktok wantaim narapela. Na ol Witnes Bilong Jehova i save ritim tok long maus planti taim. Yumi ritim Baibel long ol man taim yumi autim tok long ol. Ol i makim sampela brata long ritim ol paragraf long taim bilong Stadi Wastaua o long Buk-Stadi Bilong Kongrigesen. Em i bikpela samting yumi kolim stret tok na yumi no popaia long kolim sampela tok na ol man bai i no inap putim gut yau long tok yumi mekim.

Olsem wanem? Yu save hatwok long kolim sampela nem i stap long Baibel? Bilong lain gut long kolim stret ol dispela nem yu ken brukbrukim ol nem long planti liklik hap, na bihain traim long kolim wan wan liklik hap i stap insait long dispela longpela nem. Olsem: Bel-te-sa-sar. Bihain yu ken skruim ol dispela liklik tok wantaim na kolim stret dispela nem olsem wanpela tok tasol.

Bilong Kamap Gutpela Moa. Planti man i no save ol i gat hevi long kolim stret tok. Sapos wasman skul i tokim yu long sampela samting yu inap mekim bambai yu ken kolim stret tok, orait yu mas amamas long gutpela pasin bilong em long tokim yu long dispela samting. Orait taim yu save pinis long dispela hevi bilong yu, yu ken mekim wanem bilong stretim?

Namba wan samting yu ken mekim bilong lain long kolim stret ol tok i olsem: Taim ol i givim asainmen long yu long ritim tok long maus, painim ol tok yu no save long en. Askim wanpela man i save gut long kolim stret ol tok long tokim yu long pasin bilong kolim dispela tok yu no save long en. Taim em i tokim yu pinis long pasin bilong kolim dispela tok, orait kolim dispela tok planti taim.

Namba tu: Askim wanpela man i save gut long kolim stret tok long putim yau long tok yu ritim na askim em long stretim ol popaia bilong yu.

Namba tri pasin bilong lain long kolim gut ol tok i olsem: Yu ken putim yau long tok bilong ol man i save gut long mekim tok. Sapos i gat ol kaset bilong Baibel New World Translation o Wastaua na Kirap! long tok ples bilong yu, orait yu ken mekim wok long ol dispela samting. Taim yu harim ol dispela kaset, luksave long ol tok ol i kolim i no wankain olsem yu save kolim. Raitim ol dispela tok long not-buk samting na kolim kolim ol dispela tok. Isi isi bai yu kolim stret olgeta tok na dispela bai mekim pasin bilong yu long toktok i kamap gutpela moa.