Askim

Ol lo bilong Baibel i stori long stretpela pasin bilong mekim wok long blut, olsem na ol Witnes Bilong Jehova i ting olsem wanem long pasin bilong mekim wok long blut bilong ol yet taim ol dokta i mekim wok bilong ol?

Olgeta wan wan Kristen i no ken tingting tasol long laik bilong em yet o bihainim tok bilong ol dokta, nogat; olgeta wan wan i mas skelim gut tok bilong Baibel bilong save em bai mekim wanem. Em i samting bilong em na Jehova.

Jehova i bin givim laip long yumi, na em i putim wanpela lo olsem yumi no ken kaikai blut. (Stat 9:​3, 4) Long Lo bilong ol Israel bilong bipo, God i pasim ol long mekim planti samting long blut, long wanem, blut i makim laip. Em i tok: “Blut i save givim laip long olgeta man na animal. Olsem na mi tokim yupela olsem. Pris i mas kapsaitim blut bilong ofa long alta, bilong rausim ol sin bilong yupela manmeri. Blut tasol i as bilong laip.” Olsem wanem sapos wanpela man i kilim i dai wanpela animal bilong kisim kaikai? God i tok: “Em i mas kapsaitim blut bilong dispela samting na karamapim dispela blut long graun.”a (Wok Pris 17:​11, 13) Jehova i kolim dispela lo planti taim. (Lo 12:​16, 24; 15:23) Wanpela buk bilong ol Juda (The Soncino Chumash) i tok: “Ol i no inap putim blut long wanpela kap dis samting, nogat; ol i mas kapsaitim long graun bambai ol man i no ken kaikai.” Ol man bilong Israel i no ken kisim, o putim i stap long dis samting, o mekim wok long blut bilong narapela man o animal, em laip bilong ol i bilong Jehova.

Taim Mesaia i dai pinis ol Juda i no gat wok moa long bihainim Lo Bilong Moses. Tasol tingting bilong God long blut em i samting holi, em i stap yet. Spirit holi bilong God i kirapim ol aposel long tokim ol Kristen long ‘abrusim blut.’ Dispela lo i no liklik samting tasol. Nogat. Em i bikpela samting wankain olsem lo i tok yu no ken pamuk o lotuim ol god giaman. (Aposel 15:​28, 29; 21:25) Taim pasin bilong givim na kisim blut i kamap bikpela long taim bilong yumi, ol Witnes Bilong Jehova i save dispela pasin i no stret wantaim Tok Bilong God.b

Sampela taim ol dokta bai kirapim sikman long larim ol long kisim sampela blut bilong sikman yet sampela wik paslain long taim ol bai katim em, na sapos ol i mas givim blut long sikman ol bai givim em blut bilong em yet ol i bin kisim. Tasol dispela pasin bilong kisim blut, na putim i stap, na givim blut, em i pait wantaim tok i stap long Buk Wok Pris na Lo. Yumi no ken putim blut i stap long glas samting, nogat; yumi mas kapsaitim​—⁠olsem givim i go bek long God. Tru, yumi no stap aninit long Lo Bilong Moses long nau. Tasol ol Witnes Bilong Jehova i save daun long as tingting bilong ol dispela lo God i bin kamapim, na ol i strong long ‘abrusim blut.’ Olsem na mipela i no save givim blut, na mipela i no save putim blut bilong mipela yet i stap long glas samting bilong mekim wok long en long bihain. Dispela kain pasin i save pait wantaim lo bilong God.

Ol lo bilong God i no tokaut klia, i stret o i no stret long mekim sampela narapela wok na pasin em ol i save mekim long blut bilong man yet. Olsem: Planti Kristen ol i larim ol dokta i kisim liklik hap blut bilong ol bambai ol inap glasim blut bilong painim sik samting, na bihain ol i tromoi dispela blut. Ol dokta inap tok, i gutpela long mekim sampela narapela wok moa long blut bilong sikman.

Olsem: Taim ol dokta i katim sikman, sampela taim ol i mekim wanpela kain pasin (hemodilution) em olsem ol i senisim rot bilong blut bambai hap blut i lusim bodi na i go stap insait long wanpela masin samting. Ol bai putim sampela kain wara samting insait long rop bilong blut bilong bung wantaim blut i stap yet long bodi bilong sikman. Bihain, ol bai stiaim blut i stap ausait long bodi i go bek insait long en bambai mak bilong strong bilong blut bai kamap klostu olsem mak stret bilong en. Na tu, taim ol dokta i katim sikman, blut bai kapsait na pulap long dispela hap ol i katim man long en, na ol inap sipim dispela blut bilong kisim ol retpela sel na putim ol i go bek long bodi bilong sikman. Narapela samting ol i mekim em i olsem: Ol bai senisim rot bilong blut bambai blut i lusim bodi na i go insait long wanpela masin i mekim wok bilong wanpela hap bilong bodi, olsem klok o wetlewa o kidni, na bihain blut i go bek insait long bodi gen. Na tu, ol i save senisim rot bilong blut i go insait long wanpela narapela kain masin (centrifuge) bambai ol i ken rausim hap bilong blut i bagarap. O ol i laik kisim wanpela hap bilong blut na mekim wok long en long narapela hap bilong bodi. Na tu, bilong skelim gut blut, ol i save rausim liklik hap blut na tanim wantaim sampela kain wara o marasin samting, na bihain putim i go bek long sikman.

Ol samting ol dokta i laik mekim long ol sikman i no wankain, na long olgeta taim ol bai kamapim ol nupela pasin bilong helpim ol sikman na bilong glasim blut. Em i no wok bilong mipela long skelim olgeta wan wan samting ol dokta inap long mekim, na tokim ol man long wanem samting i stret o i no stret long mekim. Em i samting bilong wan wan Kristen yet long makim ol samting ol dokta i ken mekim long blut bilong em taim ol i katim em, o glasim blut, o mekim samting bilong oraitim sik. Paslain long dokta i mekim wanpela samting long blut bilong wanpela Kristen, dispela Kristen i mas kisim save long ol dokta long ol samting ol bai mekim long blut bilong em taim ol i mekim wok bilong ol. Na em i mas bihainim maus bilong bel na makim wanem samting ol i ken mekim. (Lukim blok.)

Ol Kristen i mas tingim dediket bilong ol long God na wok bilong ol long ‘laikim em tru long bel, na long spirit, na long strong, na long tingting bilong ol.’ (Luk 10:27) Ol Witnes Bilong Jehova ol i no wankain olsem planti man bilong dispela graun, nogat, ol i pilim olsem em i bikpela samting long pas gut wantaim God. Man Bilong Givim Laip em i kirapim olgeta man long bilip long blut bilong Jisas. Baibel i tok: “Krais i dai pinis bilong baim bek yumi, na long blut bilong en, God i lusim olgeta sin bilong yumi.”​—⁠Efesus 1:⁠7.

[Ol Futnot]

[Blok/Ol Piksa long pes 31]

OL ASKIM BILONG ASKIM YU YET

Sapos ol i senisim rot bilong blut bilong mi na blut bilong mi i ran ausait long bodi bilong mi na inap hap taim em i no ran i kam bek insait long bodi, maus bilong bel bilong mi bai larim mi long ting olsem dispela blut em i stap olsem hap bilong bodi bilong mi na mi no gat wok long ‘kapsaitim long graun’?

Maus bilong bel bilong mi em Baibel i bin skulim pinis bai i gat tok sapos taim ol dokta i glasim blut o oraitim sik, ol i kisim hap blut bilong mi na mekim sampela samting long en, na bihain putim i go bek long bodi bilong mi?