Long Ol Brata i Lukautim Ol Hap Bilong Miting Bilong Wok
Kirap long dispela Wok Kingdom, ol i sotim sampela tok bilong sediul bilong Miting Bilong Wok. Ol tok daunbilo bai senisim na kamapim klia mining bilong ol tok i stap long stori “Rot Bilong Redim Ol Miting Bilong Wok Autim Tok,” i stap long Wok Kingdom bilong Me 2009.
◼ Tok: Dispela i makim olsem brata i kisim tok long buk o magasin samting em sediul i makim na odiens i no insait long en. Brata i mas kamapim ol tok i helpim tru kongrigesen.
◼ Ol Askim na Bekim: Olsem Stadi Wastaua, dispela hap i gat sotpela tok long kirap bilong en na long pinis bilong en, na brata i kamapim ol askim long olgeta wan wan paragraf. Brata i lukautim dispela hap, em i no ken stori tumas. Em i ken makim ol bratasista long ritim sampela skripsa i kamapim ol bikpela poin. I no gat wok long ritim ol paragraf, tasol sapos sediul i tok long ritim, orait mekim olsem.
◼ Tok na Mekim Sampela Askim: Dispela hap em i wanpela tok na odiens i insait long en. Em i no wanpela tok tasol, na tu, em i no ol askim na bekim tasol.
◼ Ol Soim na Inteviu: Taim sediul i tok mekim soim, dispela i makim olsem em wok bilong brata i lukautim hap bilong miting long stretim rot long wanpela i mekim soim; i no olsem em yet i mas mekim soim. Ol bratasista em i makim bilong mekim soim, ol i mas inap long mekim gut soim na ol i mas i stap gutpela piksa, na em i mas toktok paslain tru wantaim ol dispela bratasista na stretim soim, sapos em inap. No ken askim ol nupela pablisa o ol pablisa i no save gut long mekim wok autim tok long mekim soim long pasin bilong autim tok, no ken ting dispela bai givim sans long ol long mekim soim long pletfom, tasol i orait long makim sampela nupela long stap olsem man bilong haus. Ol pablisa husat i mekim soim, ol i mas sanap gut na bai odiens i ken lukim pes bilong ol. Ol lain insait long inteviu i mas kamapim tok bilong ol long pletfom, na i no long hap ol i sindaun long en. Brata i mas stretim rot bilong mekim traim long ol soim na inteviu. Sapos miting i go ovataim na brata i mas sotim hap bilong en, orait em i no ken lusim ol soim o inteviu, em i mas mekim yet. Paslain long ol kongrigesen sevan i makim ol bratasista long insait long hap bilong ol, ol i mas askim kodineta bilong lain elda o wanpela narapela elda sapos i orait long yusim ol dispela bratasista.
Sapos wanpela hap i gat ol narapela tok long pasin bilong mekim dispela hap, orait brata i mas bihainim gut dispela tok. Taim ol brata i bihainim ol dispela tok i stap antap taim ol i mekim ol hap bilong Miting Bilong Wok, ol i helpim ol Miting Bilong Wok long “bihainim stret ol gutpela pasin bilong lotu.”—1 Ko. 14:40.