Tul Bilong Helpim Ol Yangpela Long Tingim God

“GOD i bin wokim yumi olgeta. Olsem na long taim yupela i yangpela yet, yupela i mas tingim em,” em tok saveman Solomon i bin raitim inap 3,000 yia i go pinis. (Sav. 12:1) Nau ol yangpela Kristen i gat narapela tul bilong helpim ol long mekim olsem. Ol i kamapim buk Questions Young People Ask​​—Answers That Work, Volium 2, long “Holi Spirit i Stiaim Yumi” Kibung Distrik bilong ol Witnes Bilong Jehova. Dispela kibung i bin kamap long olgeta hap bilong graun kirap long Me 2008 i go inap long Janueri 2009.

Insait long karamap bilong buk i gat wanpela pas bilong Gavening Bodi i go long ol yangpela. Hap tok bilong pas i tok olsem: “Mipela i beten strong olsem ol tok bilong dispela buk bai helpim yupela long sanap strong na sakim ol hevi na traim i painim ol yangpela bilong nau. Na buk bai soim yupela long olsem wanem yupela i ken wokim ol disisen i stret wantaim laik bilong God.”

Ol papamama i laik ‘skulim ol pikinini bilong ol long tok bilong Bikpela.’ (Ef. 6:4) Tasol taim ol pikinini i kamap tineja, planti ol i tingting planti na ol i laik bai sampela i soim rot long ol. Sapos yu papa o mama bilong wanpela yangpela, olsem wanem yu inap helpim pikinini bilong yu long kisim helpim long dispela buk? Daunbilo i gat sampela samting yu ken mekim.

▪ Kisim wanpela buk bilong yu yet na save gut long olgeta tok bilong en. Bilong mekim olsem, i no olsem yu ritim tasol, nogat. Traim long pilim gut ol dispela tok. Buk i no tok tasol long wanem samting i stret na wanem samting i no stret, nogat. Buk i skulim “tingting bilong ol” yangpela long skelim gut wanem pasin i stret na wanem pasin i no stret. (Hi. 5:14) Na buk i soim ol tu long olsem wanem ol i ken sanap strong na mekim pasin i stret. Olsem: Sapta 15 (“How Can I Resist Peer Pressure?”) i no tokim ol yangpela long tok nogat na em tasol. Nogat. Em i soim pasin bilong mekim wok long ol stiatok bilong Baibel bilong stretim ol hevi na rot bilong “bekim gut tok bilong olgeta man.”​—Kl. 4:6.

▪ Mekim gut wok long ol hap bilong buk i kamapim sampela askim na i gat spes bilong raitim bekim. Tru, ol dispela hap i bilong ol yangpela, tasol long buk bilong yu yet yu ken raitim sampela tok bilong kamapim tingting bilong yu taim yu ting i stret long mekim.a Long pes 16 i gat tupela askim long pasin bilong prenim man o meri, na taim yu wok long skelim dispela samting, traim long tingim bek ol tingting i stap long bel bilong yu taim yu gat wankain krismas olsem pikinini bilong yu. Long hap spes bilong raitim bekim, yu ken kamapim tingting bilong yu taim yu yangpela yet. Yu ken askim yu yet: ‘Tingting bilong mi long dispela samting i bin senis olsem wanem insait long ol yia i kam inap long nau? Kirap long taim mi yangpela yet na i kam, mi bin kisim wanem gutpela tingting na save? Olsem wanem mi ken kamapim gut dispela long pikinini bilong mi?’

▪ No ken fosim pikinini long kamapim ol samting em i raitim long buk. Ol dispela hap bilong buk i gat spes bilong raitim ol tok, i bilong kirapim pikinini long raitim sampela tok long samting sapta i stori long en o long skelim gut long tingting. Yu gat wok long pilim tingting i stap long bel bilong em, na i no long lukim ol tok em i bin raitim long buk. Long pes 3 bilong hap i gat het tok “A Note to Parents,” buk i tok: “Bilong kirapim ol pikinini long raitim tok i kamapim tru tingting bilong ol, no ken lukim ol tok ol i raitim​—em samting bilong ol yet. Ating bihain ol bai tokim yu long ol samting ol i bin tingim na raitim.”

Helpim Bilong Mekim Famili Baibel Stadi

Buk Young People Ask, Volium 2, em i wanpela gutpela helpim tru bilong mekim wok long en taim yupela i mekim Famili Lotu. Buk i no gat ol askim bilong olgeta wan wan paragraf, olsem na yu ken mekim wok long en olsem wanem? Yu ken skelim gut na mekim stadi long pasin em inap helpim tru ol pikinini bilong yu.

Olsem: Ating sampela famili i laik prektis long ol tok pikinini i ken mekim taim ol i stadi long hap i gat het tok “Peer-Pressure Planner” long pes 132 na 133. Namba wan askim inap helpim pikinini man o pikinini meri bilong yu long luksave long samting ol i hatwok moa long sakim. Namba tu askim i kamapim klia wanem taim dispela traim inap kamap. Taim yupela i toktok pinis long ol samting inap kamap sapos pikinini i bihainim o sakim tok bilong ol wanlain i laik pulim em, orait nau buk i askim pikinini long tingim sampela tok em i ken mekim bilong daunim o mekim i dai ol dispela tok bilong pulim em. Helpim pikinini man o pikinini meri long wokim tingting na redim ol bekim i no gat hatwok long en na em inap kamapim long pasin i soim olsem em i bilipim tru tok em i mekim.​—Sng. 119:46.

Tul Bilong Helpim Pasin Bilong Toktok Gut Wantaim

Buk Young People Ask​, Volium 2, i kirapim ol yangpela long toktok gut wantaim papamama. Olsem: Ol blok “How Can I Talk to Dad or Mom About Sex?” (pes 63-64) na “Talk to Your Parents!” (pes 189) i kamapim sampela gutpela tok long olsem wanem ol yangpela i ken kirapim toktok long ol samting ol i sem long toktok long en. Wanpela yangpela meri i gat 13 krismas, em i tok: “Dispela buk i strongim bel bilong mi long toktok wantaim papamama long ol samting mi wok long tingim​—na sampela samting mi bin mekim.”

Dispela buk i helpim pasin bilong toktok gut wantaim long ol narapela rot tu. Long pinis bilong olgeta wan wan sapta i gat wanpela blok, “What Do You Think?” Em i no wanpela riviu tasol​—yupela i ken yusim dispela blok olsem autlain bilong famili stadi. Klostu long pinis bilong olgeta sapta tu i gat wanpela blok nem bilong en “Action Plan!” Dispela blok i givim rot long ol yangpela long raitim sampela rot bilong bihainim ol tok ol i bin lainim long dispela sapta. Laspela hap bilong ol wan wan blok “Action Plan!” i tok: “Ol samting bilong dispela tok mi laik askim papamama long en i olsem . . . ” Dispela inap helpim ol yangpela long lukluk i go long papamama bilong kisim gutpela skultok.

Putim Tok i Go Long Bel!

Yu papa o mama yu gat wok long putim tok i go daun long bel bilong pikinini bilong yu. Buk Young People Ask, Volium 2, em inap helpim yu long mekim olsem. Tingim pasin bilong wanpela papa long yusim dispela buk bilong kirapim em long toktok gut wantaim pikinini meri bilong em.

“Mitupela Rebekah i gat sampela naispela ples mipela i save wokabaut, o raun long baiskol, o draivim ka i go long en. Ol dispela naispela ples i save helpim Rebekah long kamapim tingting i stap long bel bilong em.

“Namba wan hap mipela i skelim long dispela buk em pas i kam long Gavening Bodi na ‘A Note to Parents.’ Mi laik bai pikinini meri bilong mi i save olsem em i ken raitim ol tok long buk i kamapim olgeta tingting i stap long bel bilong em, na mi no ken lukim ol tok em i raitim, olsem pes 3 i tok.

“Mi larim Rebekah i makim wanem ol sapta em i laik bai mipela i toktok long en na wanem sapta em i laik toktok long en long pastaim. Wanpela sapta em i makim, em ‘Should I Play Electronic Games?’ Mi no bin ting em bai makim kain sapta olsem! Tasol i gat as na em i makim. Sampela pren bilong em ol i save pilaim wanpela vidio gem i nogut tru. Mi no bin save olsem dispela gem i soim pasin bilong pait na bagarapim man na mekim ol tok nogut! Tasol ol dispela samting i kamap ples klia taim mitupela i toktok long “Action Plan!” long pes 251. Na dispela blok i helpim Rebekah long redim sampela tok sapos wanpela i laik subim em long pilaim dispela gem.

“Long nau, Rebekah i save tokim mi long olgeta samting em i bin raitim long buk bilong em. Taim mipela i stadi, mipela i no save malolo long toktok. Mitupela i save senis senis long ritim ol paragraf, na nau em i laik toktok long olgeta samting, ol piksa na ol blok tu. Dispela i opim rot long mi long stori long ol samting i bin painim mi yet long taim mi gat wankain krismas olsem em, na nau em i save stori long ol samting i painim ol yangpela long nau. Em i laik stori long mi long olgeta samting!”

Sapos yu wanpela papa o mama, ating yu bin amamas tru taim ol i bin kamapim dispela buk. Orait nau yu gat rot long mekim gutpela wok long en. Gavening Bodi i laik bai dispela buk Questions Young People Ask​​—Answers That Work, Volium 2, i helpim gut famili bilong yu. Gutpela sapos em i helpim yumi olgeta​—na moa yet ol gutpela yangpela bilong yumi​—long ‘larim holi spirit i stiaim wokabaut bilong yumi.’​—Ga. 5:16.

[Futnot]

[Blok long pes 30]

Tok Bilong Sampela Yangpela

“Dispela em i wanpela kain buk we yu mas sindaun na holim pensil na ritim gut na tingim tingim long bel ol tok yu ritim. Ol i wokim dispela buk bilong mipela i ken yusim olsem dairi, na dispela i givim rot long mipela long skelim gut ol samting na bai mipela i ken makim gutpela rot long bihainim.”​—Nicola.

“Planti ol i wok long fosim mi long kisim boipren​—sampela bilong ol i ting olsem ol i laik helpim mi. Namba wan hap bilong dispela buk i soim mi olsem, maski ol i tok wanem, mi no redi yet long prenim wanpela man.”​—Katrina.

“Dispela blok ‘Are You Thinking of Getting Baptized?’ i bin helpim mi long tingim gut baptais bilong mi. Em i kirapim mi long skelim gut pasin bilong mi long stadi na beten.”​—Ashley.

“Papamama Kristen bilong mi i bin skulim mi kirap long taim mi liklik yet, tasol dispela buk i helpim mi long skelim gut ol samting mi mas mekim long laip bilong mi. Na buk i helpim mi long kamapim tingting bilong mi long papamama.”​—Zamira.

[Piksa long pes 31]

Papamama, yupela i mas save gut long olgeta tok bilong dispela buk

[Piksa long pes 32]

Putim mak olsem yu laik bai pikinini i pilim tru tok bilong yu