“Kaikai” i Kam Long Taim Stret
1 Taim yumi harim pinis program bilong wanpela spesel de kibung, yumi save tok: “Man! Ol tok bilong dispela kibung i stret tru long yumi!” Wanpela wasman sekit i tok long ol lain long sekit bilong em olsem, taim ol i harim pinis program bilong wanpela spesel de kibung ol i tokaut olsem ol i laik mekim bikpela wok moa bilong autim tok. Wanpela wasman raun i tok: “Dispela program bilong kibung i helpim mipela long skelim gut ol samting mipela i mekim long laip bilong mipela, na mipela i kisim stretpela tingting long wanem kain taim mipela i stap long en long nau.” Narapela wasman raun i tok: “Sampela pablisa i tok olsem dispela kibung i kirapim tru tingting bilong ol long tingim bikpela wok yumi mas mekim long nau, em wok bilong autim gutnius long ol man.” Spesel de kibung i helpim yu olsem wanem?
2 Ol tok bai kamap long program bilong spesel de kibung bilong 2011 bai i stret tru long yumi. As tok bilong kibung i kam long Song 118:8, 9, olsem “Jehova Em Ples Hait Bilong Yumi.” Sampela bilong ol tok bai kamap long kibung em olsem: “Jehova Em i Ples Hait Bilong Yumi Long Taim Bilong Hevi,” “Helpim Ol Narapela Long Painim Ples Hait Aninit Long Jehova,” “Bihainim Pasin Bilong Jehova Long Stap Olsem Ples Hait,” “Yupela Ol Yangpela, Bilip Strong Long Jehova!” na “Paradais Bilong Spirit—Em Ples Hait Jehova i Givim Long Yumi.”
3 Bilong Program i Ken Helpim Yumi: Taim yupela i kisim pinis toksave long det bilong spesel de kibung, nau yet yu mas stretim rot bilong i go long dispela kibung, na invaitim ol Baibel stadi bilong yu tu long kam long dispela kibung. Bilong yumi ken ‘stap strong na karim kaikai,’ yumi mas tingim ol tok yumi harim. (Lu. 8:15) Olsem na putim gut yau long program bilong kibung, na raitim sampela bikpela tok long notbuk, na tu raitim ol skultok em yu laik bihainim long sindaun bilong yu na long wok autim tok. Bihain long kibung, yu na famili bilong yu i ken stori gen long ol tok i bin kamap long kibung, na tingim sampela rot bilong bihainim ol tok yupela i bin harim.
4 Spesel de kibung bilong yumi em i olsem wanpela naispela kaikai em pasin laikim i bin kirapim ol long tingim gut na redim. Jehova i ken blesim ol samting yu mekim bilong i go long dispela kibung na long kisim helpim long “kaikai” i kam long taim stret bilong strongim bilip bilong yumi ol wokman Kristen.—Mt. 24:45.
[Askim Bilong Stadi]
1. Spesel de kibung bilong dispela yia i helpim yu na ol narapela olsem wanem?
2. Wanem ol tok bai kamap long spesel de kibung bilong 2011?
3. Sapos yumi go long dispela kibung, dispela bai helpim yumi olsem wanem?
4. Bilong wanem yumi mas amamas long i go long spesel de kibung?