Mekim Wok Autim Tok i Kamap Gutpela Moa—Bekim Tok Long Man i Laik Pasim Yu Long Autim Tok
Em i Bikpela Samting: Tingim olsem wanpela bikpela bagarap i wok long kam klostu na ol manmeri bai dai sapos ol i no ranawe. Yu go long haus bilong wanpela neiba na toksave long em, tasol em i katim tok bilong yu na tok em i bisi. Tasol yu strong yet long helpim em na yu no givap kwik! Planti man long teritori i no laik harim tok. Ol i no save olsem tok yumi autim em i bikpela samting bilong helpim ol long kisim laip. Taim yumi laik toktok long ol, ating ol i bisi long planti samting. (Mat. 24:37-39) O ating ol i bilipim ol tok giaman em ol narapela i mekim long yumi. (Mat. 11:18, 19) Na ol i ting olsem yumi wankain long ol narapela lotu em ol i save kamapim ol kaikai nogut. (2 Pita 2:1, 2) Sapos man bilong haus i no laik harim tok, yumi no ken givap kwik.
Rot Bilong Mekim:
• Paslain long yumi go long autim tok, lusim liklik haptaim long tingim ol tok em ol man i save kamapim bilong pasim yumi long autim tok, na tingting long hau bai yu bekim.
• Sapos man i mekim sampela tok bilong pasim yu, long pasin isi traim long toktok yet wantaim em. Ating yu ken mekim olsem long rot bilong mekim tok amamas long em. Olsem, Sapos em i tok em i gat lotu bilong em, yu ken tok: “Mi laik bungim kain man olsem yu husat i save tingim ol samting bilong lotu.” Sampela taim sapos yumi luksave long samting man i tingting long en, dispela inap helpim yumi long toktok yet long em. Olsem, sapos em i tok em i bisi, yu ken tok: “Mi lukim olsem yu bisi, olsem na mi laik givim yu dispela.” O yu ken givim wanpela askim long man, na sapos em i tok em i no laik harim, yu ken tok, “Yu no laik harim tok bilong Baibel, o yu no laik harim ol tok bilong lotu?”
• Bihainim savetingting. Tingim, Jehova i no save fosim ol man long harim tok bilong em. (Lo 30:19) Em bai skelim olgeta man wan wan long ol wok samting ol i mekim. (Gal. 6:5) Olsem na sapos man bilong haus i kros, i gutpela yumi lusim em. Taim yumi soim rispek long tingting bilong em, ating yumi opim rot long ol narapela pablisa i ken autim tok long em long narapela taim.—1 Pita 3:15.
Long Dispela Mun, Traim Dispela:
• Taim yupela bungim wanpela man i laik katim tok, na bihain long yupela lusim em, stori long poroman bilong yu long ol gutpela rot bilong bekim tok long man.