Ol Samting Bilong Kibung Yumi Mas Tingim
Taim: Musik bilong kirapim program bai kamap long 9:20 long moning long olgeta 3-pela de bilong kibung. Taim musik i kirap, yumi olgeta i mas i go long ples sindaun bilong yumi bambai program i ken kirap long taim stret. Program bilong Fraide na Sarere bai pinis long 4:50 long apinun. Program bilong Sande bai pinis long 3:45 long apinun. HARIM: Long ol kibung bilong 2-pela de, em Sarere na Sande, program bai kirap long 8:20 long moning. Program bilong Sarere bai pinis long 5:15 long apinun, na program bilong Sande bai pinis long 4:25 long apinun.
“Singim Ol Song Bilong Litimapim Nem Bilong [God]”: Long bipo tru, ol manmeri bilong God i singim ol song bilong litimapim nem bilong Jehova, na long nau tu, pasin bilong singim ol song em i bikpela samting long lotu i tru. (Sng. 28:7) Musik i save kamap long kirap bilong olgeta wan wan program bilong rijinel kibung. Dispela em i no musik nating, nogat. Ol i redim dispela musik bilong helpim yumi long kisim save long Jehova na lotuim em. Olsem na taim siaman i mekim toksave olsem musik bai kirap, dispela em taim bilong sindaun na putim gut yau na pilim tru ol musik yumi harim, na yumi no ken toktok yet wantaim ol narapela. Taim yumi mekim olsem, dispela i soim olsem yumi pilim tru hatwok bilong lain (Watchtower orchestra) i redim musik. Inap 2-pela taim long yia, ol dispela bratasista i save baim rot bilong ol yet long i go long Patterson, New York, bambai ol inap redim naispela musik bilong yumi ken amamas long harim. Bihain long yumi harim musik, yumi olgeta i mas bungim nek na singim ol song bilong Kingdom na litimapim nem bilong Jehova.
Ples Bilong Putim Kar: Long ol ples em kibung i kamap long en, bai i gat ples bilong putim kar, tasol i no gat pe bilong en. Ples bilong putim kar i no bikpela, olsem na bihainim gut tok bilong ol atendan.
Ples Sindaun: Long moning, yumi no ken bihainim pasin i olsem yumi resis wantaim ol narapela husat i kam long kibung long kisim ples sindaun. Yumi mas tingim ol bratasista bilong yumi na daunim laik bilong yumi yet. Dispela bai soim klia olsem yumi stap Kristen tru, na dispela bai kirapim ol narapela long givim biknem long God. (Jon 13:34, 35; 1 Kor. 13:5; 1 Pita 2:12) Yu ken kisim sia bilong ol lain i kam wantaim yu long wankain kar, ol lain i stap wantaim yu long wankain haus, na ol Baibel sumatin bilong yu. No ken putim ol samting long ol sia em yupela i no inap yusim. Taim yu bihainim tok, ol narapela bai luksave olsem ol dispela sia i stap fri. I gat ol sia em ol i redim bilong ol lapun na ol manmeri i gat sampela bagarap long bodi. Ol dispela sia i no planti, olsem na sapos i gat sampela i lukautim wanpela lapun o man i gat bagarap long bodi, orait 1-pela o 2-pela tasol i ken sindaun wantaim ol.
Bilas Gut: Long taim bilong kibung, bilas bilong yumi i mas stret, na soim klia olsem yumi bihainim pasin daun, na yumi no bihainim stail bilong ol manmeri bilong dispela graun long bilas. (1 Tim. 2:9) Maski yumi go i kam long hotel na yumi malolo o mekim ol narapela samting paslain na bihain long kibung, oltaim yumi mas bilas stret. Sapos yumi mekim olsem, yumi bai amamas long pasim kat bilong kibung na yumi no inap sem long autim tok taim rot i op. Sapos yumi pasim bilas i stret na bihainim stretpela pasin taim yumi go i kam long kibung, dispela bai kirapim ol man i gat gutpela bel long putim yau long tok bilong Baibel, na tu, dispela bai mekim Jehova i amamas.—Sef. 3:17.
Bihainim Savetingting Taim Yu Yusim Ol Elektronik Masin: Yumi soim gutpela pasin taim yumi senisim seting bilong fon bai em i vaibret na no ken ring. Long dispela rot, yumi no inap distebim ol narapela. Sapos yumi laik yusim kamera, vidio rekoda, o tablet samting, yumi mas tingim ol narapela bambai dispela i no ken pasim rot bilong ol long lukim ol samting i kamap long pletfom. Na tu, yumi no ken salim nating teks mesis o e-mail long taim bilong program.
Kaikai Long Belo: I gutpela yu bringim kaikai bambai yu no ken lusim ples kibung bilong i go baim kaikai long taim bilong belo. Yu ken putim ol kaikai insait long liklik eski we yu inap putim aninit long sia. No ken bringim ol bikpela eski na ol glas kontena i go long ples kibung.
Ol Kontribiusen: Yumi ken soim tenkyu bilong yumi long bikpela wok ol i mekim bilong redim ol kibung, na yumi ken givim kontribiusen bilong helpim wok long olgeta hap bilong graun. Sapos yu laik givim sek olsem kontribiusen, orait yu mas raitim “International Bible Students Association” o “IBSA” long en.
Marasin: Sapos dokta i makim marasin bilong yu long kisim, orait yu mas bringim dispela marasin i kam wantaim yu long ples kibung, long wanem, ol kain marasin olsem bai i no stap long ples kibung. Sapos sampela i gat sik suga na ol i mas givim sut long ol yet, orait ol i mas pasim gut ol sut na nidol na bringim i go bek wantaim ol na tromoi, na no ken putim nating long ol rabis bin long ples kibung.
Ol Su: Taim yupela i wokabaut, yupela i mas was gut, nogut yupela i trip na pundaun. Long olgeta yia, ol sista i save kisim bagarap, long wanem, ol i werim ol hai-hil su. I gutpela long makim ol su we inap helpim yupela long wokabaut gut long ol ples wokabaut ol i wokim long simen, ain, o plang.
Ol Lain Em Yau i Bagarap o Ol i No Save Harim Gut: Long ol kibung long Pot Mosbi, ol bai kamapim program bilong kibung long rot bilong redio long ples kibung, long wanpela redio stesin (FM 88.1). Yu mas yusim fon o liklik redio na putim yaufon long harim.
Wilka Bilong Bebi na Ol Plastik Sia: No ken bringim ol wilka bilong bebi na ol plastik sia i kam long ples kibung. Tasol sapos i gat ol liklik sia bilong ol pikinini, orait mobeta ol dispela sia i stap klostu long hap we papamama i sindaun long en.
Fom Plis Go Lukim (S-43-MP): Yusim fom Plis Go Lukim bilong raitim nem na atres bilong man yu autim tok long em long taim bilong kibung. Taim yu raitim pinis nem na atres bilong man, yu mas givim dispela fom long ol brata bilong Bukrum o long kuskus bilong kongrigesen bilong yu taim yu go bek long hap bilong yu.
Haus Kaikai: Taim yumi kaikai long restron, yumi mas bihainim ol gutpela pasin i givim biknem long Jehova. Klos na bilas bilong yumi i mas i stret long pasin bilong ol Kristen.
Ples Slip:
Taim kongrigesen bilong yu i kisim ol fom long Dipatmen Bilong Rum Slip, orait yu mas toksave kwik long kuskus sapos yu laik kisim ples slip.
No ken makim sampela ples slip moa em yu no gat wok long en, na no ken kalapim mak bilong haus slip long hamas man i ken slip long wanpela rum. I gutpela long baim ples slip bilong yu pastaim.
Sapos yu rausim nem bilong kisim ples slip, orait kwiktaim toksave long Dipatmen Bilong Rum Slip.—Mat. 5:37.
No ken kukim kaikai long ol rum o hap i gat tambu long mekim paia long en.
Taim yu stap wantaim ol brata long haus bilong ol, tingim ol na helpim ol long baim kaikai, kukim kaikai, na helpim ol long mekim sampela wok long haus.
Sapos yu stap wantaim ol brata long haus bilong ol, tingim gutpela pasin ol i mekim long singautim yu long stap wantaim ol, no ken stap yet bihain long kibung i pinis sapos yu no bin pasim tok wantaim ol paslain long kibung long mekim olsem.—Snd. 25:17.
Bihainim ol pasin bilong holi spirit taim yu go long ples kibung long stretim hap em yu bai stap long en, na taim yu stap long ples slip, na long taim yu laik lusim ples slip bihain long kibung. Taim yu mekim gutpela pasin, pasin isi, na bihainim stretpela pasin, olgeta man bai amamas long yumi.
Ol papamama i mas lukautim gut ol pikinini bilong ol.
Sapos wanpela hevi i kamap long ples slip, orait toksave long Dipatmen Bilong Rum Slip na ol bai helpim yu.
Wok Volantia: Ol man husat i laik mekim wok volantia, ol i mas toksave long Dipatmen Bilong Wok Volantia long kibung. Ol pikinini i no winim 16 krismas, ol tu inap helpim wok taim ol i wok aninit long lukaut bilong papa o mama o narapela bikpela man em papamama i orait long em i lukautim ol.