Yumi Kamap Olsem Wanem?
BILONG WANEM BEKIM BILONG DISPELA ASKIM I BIKPELA SAMTING? Ol i skulim planti man olsem olgeta samting i gat laip i kamap nating. Ol i tok long rot bilong evolusen ol manmeri i kamap na ol inap pilim na skelim ol samting, na ol i gat laik long save long as tru bilong i stap bilong ol.
Tasol tingim: Sapos yumi bin kamap long rot bilong evolusen na i no gat Man Bilong Wokim yumi, bai i olsem yumi no gat papa. Bai i no gat wanpela i stap we ol man i ken go long em bilong kisim savetingting winim bilong yumi man, na bai i no gat man we yumi inap kisim tok bilong helpim yumi long stretim ol hevi. Bai i gat save bilong ol man bilong graun tasol bilong helpim yumi long abrusim bagarap bilong win ren samting, stretim hevi bilong wok politik, na stretim ol hevi bilong yumi yet.
Olsem wanem? Taim yu tingim dispela samting, dispela i mekim tingting bilong yu i stap isi? Sapos nogat, orait tingim olsem i gat wanpela man i stap na em i gat bikpela save bilong helpim yumi. Ating bai yumi amamas moa long dispela, a?
Tok Baibel i Mekim
Baibel i tok God i bin wokim ol man. Yumi no kamap long rot bilong evolusen. Yumi pikinini bilong wanpela gutpela Papa husat i gat bikpela save. Lukim ol dispela tok Baibel i mekim:
Stat 1:27. “God i wokim ol manmeri na ol i kamap olsem God yet. God i mekim ol i kamap man na meri.”
Song 139:14. “Mi pret long yu, olsem na mi save litimapim nem bilong yu. Olgeta samting yu wokim i narakain na i nambawan tru. Mi save gut long dispela samting na mi pilim tru.”
Matyu 19:4-6. “Jisas i bekim tok olsem, ‘Ating yupela i no bin ritim tok i stap long buk bilong God? Dispela tok i tok olsem, “Bipo tru taim God i wokim olgeta samting, em i wokim ol manmeri, na em i mekim ol i kamap man na meri. Na God i tok, ‘Olsem na man i save lusim papamama na i pas wantaim meri bilong en, na tupela i kamap wanpela bodi tasol.’ God i tok olsem na tupela i no i stap olsem tupela moa. Nogat. Tupela i kamap olsem wanpela bodi. Olsem na samting God i pasim pinis, em man i no ken katim.” ’ ”
Aposel 17:24, 25. “God i bin wokim skai na graun wantaim olgeta samting i stap long en, dispela God em i Bikpela bilong heven na bilong graun. Olsem na em i no save sindaun insait long ol haus lotu ol man i wokim. Em i no sot long wanpela samting na yumi man i mas mekim wanpela samting long han bilong yumi bilong helpim em. Nogat. Em yet i save givim laip na win na olgeta samting long olgeta manmeri.”
KTH 4:11. “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.”
Olsem Wanem Bekim Bilong Baibel i Mekim Bel Bilong Man i Stap Isi Tru?
Taim yumi save olsem ‘God yet i givim nem long olgeta lain,’ dispela inap senisim tingting yumi holim long ol arapela. (Efesus 3:15) Dispela save yumi kisim i stiaim tu tingting yumi holim long yumi yet na ol hevi bilong yumi. Dispela inap stiaim tingting bilong yumi long ol samting olsem:
Taim yumi mas wokim ol bikpela disisen, bai yumi no tingting tumas long tingting bilong ol man i pait wantaim. Bai yumi bilip long tok bilong Baibel. Bilong wanem? Long wanem, “spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.”—2 Timoti 3:16, 17.
Tru, bilong bihainim tok bilong Baibel, yumi mas wok strong na bosim gut yumi yet. Sampela taim tok bilong Baibel inap makim olsem yumi mas bihainim pasin em yumi no laikim. (Stat 8:21) Tasol sapos yumi bilip olsem wanpela gutpela Papa i bin wokim yumi, i stret long ting olsem em i save long gutpela rot yumi mas bihainim. (Aisaia 55:9) Baibel i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:5, 6) Sapos yumi bihainim dispela tok, bai yumi no wari na tingting planti taim hevi i painim yumi na yumi mas wokim disisen.
Taim sampela man i tingting nogut long yumi, bai yumi no larim dispela samting i mekim na yumi pilim olsem yumi samting nating, na ol man bilong narapela skin o lain i winim yumi. Nogat. Yumi bai kisim pasin bilong amamas long yumi yet. Bilong wanem? Long wanem, Jehova, em “i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
Na tu, dispela bai helpim yumi na yumi no larim pasin bilong tingting nogut long narapela i mekim na yumi no gat stretpela tingting long ol arapela. Yumi bai save olsem i no gat as na yumi ting yumi winim ol man bilong narapela lain o skin, long wanem, God “i bin mekim olgeta lain manmeri i kamap. Na em i putim ol i stap long olgeta hap bilong graun.”—Aposel 17:26.
Tru tumas, taim yumi save olsem i gat wanpela Man i bin wokim yumi na dispela Man i tingim yumi, dispela i stap olsem as na bel bilong yumi i stap isi. Tasol yumi mas mekim sampela samting moa bilong i stap olsem.
[Rait long pes 4]
Olsem wanem? Ol man i bin kamap nating tasol?
[Piksa long pes 5]
Taim yumi save olsem Man Bilong Wokim yumi i save tingim yumi dispela i save givim bel isi long yumi